Dawei Ah Uico Rawl A Petu Pa 2 SAC Ralhrang Nih Voi 50 Leng An Kah Hna Ca Ah An Thi
=========
Tanintharyi ramṭhen, Dawei peng Bonmaw sang le Saw Minyo sang tonnak ah uico rawl a petu pa pahnih hna cu khuachung ah aa chawkmi SAC ralhrang nih meithal in an kah hna caah an nunnak a liam, tiah tualchungmi hna nih an chim.
May 30, zan suimilam 9:00 tluk ah a thlithup in aa chawkvakmi SAC ralhrang nih uico rawl a petu pa pahnih Ko Hein Zaw Aung (kum 38) le a hawipa Ko Aung Aung hna cu a ruang um loin voi 50 renglo meithal in an kah hna caah an nunnak a liam hi a si. A ho hmanh leng ah kan chuak ngam lo” tiah tualchungmi pakhat nih Western News ah a chim. SAC ralhrang nih pa pahnih an kahthahmi hna cu an chungkhar hna sin ah atu tiang an ruak zong an pe duh hna lo, tiah tualchungmi hna nih an chimchap.
Tuluk Tlangtlaknak In SAC Ralhrang Le AA, TNLA, MNDAA Hriamtlai Hna Cu Mongla Khuapi Ah Tonnak An Ngei Lai; SAC ralhrang le Myanmar ram chaklei hriamtlai ṭangṭi phu thum hna, Arakan Army(AA), Ta’ang National Liberation Army(TNLA), Myanmar National Democratic Alliance Army(MNDAA/MNTJP)- Kokang phu hna cu June ni 1 ah i tonnak an ngei lai, tiah Mongla News nih a langhter.
An i tonnak ding hmun cu Shan ramkulh, nichuah lei hmunram Mongla khuapi ah a si lai, tiah theih a si. “Tuluk tlangtlaknak in i tonnak ngeih ding in kan i timhlamh mi a si ca ah zeibantuk cheihhmainak dah kan ngeih timi tu cu i tonnak kan ngeih dih hnu ah thawng kan thanh te lai” tiah TNLA in chimphuannak nawlngaitu pakhat nih BBC ah a chim.
SAC ralhrang lei in Deputy General Yar Pyi hruaimi National Unity and Peace Making Coordination Committee aiawhtu lai, tiah theih a si. Cu pinah Tuluk ram in Foreign Affairs Ambassador, Mr. Kopang zong aa tel lai, tiah BBC nih a langhter chih. Myanmar ram chaklei hriamtlai ṭangṭi phu thum AA, TNLA le (MNDAA/MNTJP)- Kokang phu hna zong in a kai dingmi ai-awhtu (palai) hna zong Mongla khuapi an phan cang, tiah, Mongla News nih a langhter.
Kum 2 Chung Karenni Ramkulh Ah Kahdohnak Voi 1,000 Leng A Chuak, Hriamthil 600 Leng Kan Laak Khawh__KNDF; Karenni ramkulh ah kum 2 chung kahdohnak voi 1,000 leng a chuak i SAC ralhrang sin in hriamngan le hriamhme 600 leng kan laak chih khawh, tiah Karenni Nationalities Defence Force (KNDF) an dirhnak kum 2 tlin camtuak May 31 ah KNDF Chairman Khon Bi Htoo nih a chim.
“Kum 2 chung ah kahdohnak voi 1,000 leng hi KNDF kan i tel kho i, cu kahdohnak ah SAC ralhrang hriamngan le hriamhme 600 leng kan laak khawh pin ah an sakhan hmemi he fonh in 10 laaknak zong ah KNDF kan i tel kho. Battalion hna hriamnam serchuahnak le raltuk thiamnak lei zong ah kan ṭhangcho ngai cang” tiah a cunglei upa nih a chim.
Cu pinah kan hmailei ca zoh tik ah SAC ralhrang a thazaang dernak le kanmah lei kan thazaang a ṭhawnnak kan i theih i, timhlamhnak kan ngeih ahcun atunak in kan hlawh a tling deuh lai, tiah a chimchap. SAC ralhrang kuttang in mipi hna kan luat khawhnak ding caah tiin ram le miphun caah nunnak a petu KNDF chungtel minung 153 an si naak zong a langhter chih.
Karenni ralkap (KA) hruainak hi upat ding le KNDF telh in Karen ramkulh chung um mipi ralkap dihlak lungrualnak cu atu naak in ṭhawnter ding le SAC ralhrang nih mipi ralkap hna karlak ah ṭhencheunak a tuahmi ah ralrin a herhnak zong a chim chih. “Karenni cozah hi Karenni ramkulh chung lawng silo in ram pumpi ca zong ah a ṭhawngmi mizapi cozah uknak a hmu khotu zong a si cang lai” tiah a chimchap. Credite; Lungmili Post