Shan-Karenni Ramri Cu Thlichia Le Ruah Lak Ah Kahdohnak A Chuak, SAC Ralhrang Nih Cunglei In A Hel Lengmang Hna
=========
Shan ramkulh thlanglei Pinlaung, Hpekon peng hna le Shan-Karenni ramri ah mipi hriamtlai phu hna le SAC ralhrang kar ah kahdohnak a chuak i SAC ralhrang nih ngiatthlainak vanlawng in an hel lengmang hna, tiah theih a si.
Shan-Karenni ramri ah a luancia February 24 in May 14 tiang thlathum chung nifate in kahdohnak a chuak i SAC ralhrang nih nifate cunglei hriamngan in a kah, tiah MeKong News nih a langhter.
“Atu lio cu thli le ruah a faak ngai caah SAC ralhrang nih cunglei ngiatthlainak lawng a hman i a hel lengmang ko. Cunglei in a hel tlawmpal ah cun caan raulo ah jet vanlawng a hman colh. A luancia May ni 10 zong ah jet vanlawng in bomb a thlak caah mipi ralkap 5 nih hliamhma an tuar” tiah Medic Unit – Demoso in ṭuanvo ngeitu pakhat nih a chim.
May 10 ah ngiatthlainak vanlawng nih chunnitlak nawn in a hel i zanlei hnu cu vanlawng lawngte in caan saungai a kah caah hliamhma tuarmi mipi ralkap 5 hna cu sizung ah kan kalpi hna, atu tiang thlopbul cuahmah lio an si, tiah a chimchap.
Hliamhma tuar mipi ralkap 5 hna cu mizaw phurhnak motor nih a zaat hna lo caah VIGO motor tiang in kan hman, mizaw hna caah cun a sikho deuh lo, tiah Medic Unit – Demoso nih a chim.
Shan-Karenni ramri cu atu hrawng hi hruahpi le thlihran a faak ngaingai. Ngiatthlainak vanlawng nih a hel lengmang hna pin ah SAC ralhrang nih hriamngan in an kah lengmang hna caah harsatnak tamngai kan tuar, tiah mipi ralkap lei nih an langhter.
SAC ralhrang nih uknak a laak in nihin tiang Shan-Karenni ramri ah Karenni hriamtlai ṭangṭi phufonh le SAC ralhrang kar ah kahdohnak voi 663 a chuak cang i SAC nih chunglei in voi 363 a kah cang, tiah Karenni hriamtlai PKPF nih a luancia May 1 zong ah thawngthanhnak a rak tuah bel cang.
Sittwe Khuapi Sang Cheukhat Thlichia le Tilian Nih A Den Cuahmah, Innchungah Aa Hrengmi An Um Len; Rakhine ramkulh Sittwe khuapi sang cheukhat cu Mocha thlichia le tilian nih a den cuahmah i zam manh loin innchungah aa hrengmi an um len tiah theih a si! Inn a rawkmi, thingkung a pur mi le phone tung a rawk mi zong an um len caah phone, internet le wifi zong a ngah ti lo tiah theih a si!
Thlichia A Hran Ruangah Yegyi Le Taungkauh Peng Ah Minung Pahnih Nunnak A Liam! Ayeyarwaddy ramṭhen, Yegyi peng le Rakhine ramkulh Taungkauh peng ah nihin May 14 ah thlichia fak ngai in a hrang i, thlichia ruangah pa pahnih nunnak a liam, tiah theih a si.
Ayeyarwaddy ramṭhen, Yegyi peng Tasaungyu khua pawng ah cycle aa citmi pahnih chung ah pakhat cu thingkung a kiakmi nih a tlak ruangah a nunnak a liam, tiah Tasaungyu khuami hna nih an chim.
Rakhine ramkulh Taungkoh peng Gyukyiakwin khuakomh, Salu khua zong ah nihin May 14 zinglei ah khan fak ngai in thlichia a hran ruangah thingkung a pur mi nih pa pakhat a nenh i a nunnak a liam. Nunnak a liammi Nay Lin Aung cu Chin miphun a si, tiah theih a si.
Nihin May 14 zinglei ṭhiam ah Mandalay ramṭhen, Pyin Oo Lwin peng ah thingkung a pur mi nih kum 55 tluk pa pakhat a nenh ruangah a nunnak a liam pinah Tachileik zong ah nuva hna an nunnak a liam, tiah theih a si. Credite; The Chin Post