Thailand Ram Ah Phungning Loin A Lutmi Myanmar mi 49 Tlaih An Si
========
Thailand ramchung Myanmar ramri Kanchanaburi pengkomh ah phungning loin a lutmi Myanmar mi 49 cu May 24 zinglei ah Thailand nawlngeitu hna nih an tlaih hna, tiah Bangkok Post nih a langhter.
Kanchanaburi pengkomh ramlak ah aa thupmi Myanmar mi hna thawngpang cu palik sinah thawngpang petu an um ruangah palik nih an va tlaih hna, tiah theih a si.
Tlaih a tongmi hna chung in pa 29 le nu 20 an si i, an dihlak in phungning loin Thailand ram ah a lutmi an si. Yangon, Mawlamyaing, Bago le Rakhine ram in an si hna, tiah an chim. Tlaih a tongmi hna cu Thailand ram ah rianṭuan ding in a kalmi an si i, Thailand luh khawh nakding hin minung pakhat ah Baht 20,000 in 30,000 kar agent sinah an pek, tiah theih a si.
Myanmar rammi hna cu Thailand nawlngeitu hna nih upadi ningin bia an ceih hna lai i Myanmar ram ah kuat ṭhan an si lai. May thla chung ah phungning loin Thailand ram chung ah a lutmi Myanmar rammi 350 tluk an si cang.
Taungngu Thonginn In A Zaammi Thongtla 9 Hna Cu PDF Thiamhlei Ralkap An Rak Si i, PDF Sinah An Kir Ṭhan Cang; Bago ramṭhen, Taungngu thonginn in a zaammi thongtla 9 hna cu PDF thiamhlei ralkap chungtel an si i, Taungngu pengkomh chung a himnak hmun pakhat an phan cang i an umnak hmun in rian an ṭuan ṭhan cang lai, tiah PDF in ṭuanvo ngeitu pakhat nih a chim.
May 18 chun suimilam 2:55 hrawng ah Taungngu thonginn, biaceih ding in thongtla an chuah hna lio ah ramkhel lei thongtla 12 nih thongtla hngaktu hna meithal cu an chuh hna i, cu chungah thongtla 9 cu meithal zun 4 he an zaam kho nain 3 cu an tlaih khawh ṭhan hna, tiah theih a si.
Thongtla hngaktu hna cu an kah hna i, SAC ralkap sergeant 1 a thih pinah Pyusawhti chungtel 1 zong hliamhma a pu. MA11 zun 1, Cabine zun 1, thalpaak zun 1 le G3 zun 1 an zaampi. Thongtla 9 an zaam zan May 18 ah a zaam vemi thongtla pakhat Thiha Aung a inn cu SAC ralkap nih an luhhnawh i, hringtu a nu an tlaih. May 25 tiang ah an thlah rih lo, tiah theih a si.
Hakha Ah Bomb Puahnak In Minung 5 Hliam An Tuar, 1 Nunnak Liam! Chin ramkulh, Hakha khuapi ah bomb hmanhmi i lamhsualnak in minung 5 hliamhma an pu i, 1 a nunnak a liam, tiah theih a si.
May 24 ah meheh rawl kawl ding in aa thawhmi Pu Chan Kian cu meheh rawl a kawlnak in a ṭin ti lo caah a chungkhat nih nihin May 25 zinglei ah an va kawl i cu an va kawlnak ah cun Pu Chan Kian a tupa nih bomb aa lamh sual caah minung 5 hliamhma an pu, tiah tualchung mi pakhat nih The Chin Post ah a chim.
Pu Chan Kian chungkhar he naihniam in a ummi pakhat nih, “Pu Chan Kian cu Meheh rawl kawl ding in aa thawh i bomb aa lamhsual ruangah ka bawm u tiin a authawng zong a theimi an um. Nihin May 25 ah a ruak va kawl dingin Pu Chan Kian a chungkhat minung 7 hrawng cu an kal i, Chin ramkulh Ministers hna umnak inn lei kap ah bomb nih a puah hna caah minung 5 hliamhma an pu,” tiah a chim.
Hliamhma pumi hna cu pa 4 le nu 1 an si i, Hakha sii-inn ah an tlikpi hna. Pu Chan Kian tupa hi a orhlei ke a bul. A dang hi an ke, an baan le an ṭaang ti bantuk ah bomb pelpawi nih a peh hna, tiah theih. Credite; The Chin Post