SAC vanlawng nih May 29 lio, Tiṭa i bomb an thlaknak nehnang. Inn cheukhat cu aa ṭhenṭhek dih!
https://fb.watch/kTbMPp5JQv/
Magway Ramṭhen Minhla Peng Ah PDF 8 Nunnak A Liam! Magway ramṭhen, Minhla peng Didaukkan khua pawng ah PDF nih an i citmi motor cu May 29 zan suimilam 8:00 hrawngah SAC ralkap nih an kah i PDF ralkap 8 an nunnak a liam, tiah theih a si.
Nunnak a liammi PDF cu Tayet, Kanma, Mindung in ṭangṭi phu an si i, raltuk cawn an dih in Minhla peng lei an kir lio ah atu bantuk in SAC ralkap nih an kah hna hi a si, tiah Magway ramṭhen hrambunh PDF in ṭuanvo ngeitu pakhat nih a chim.
SAC ralkap nih PDF motor an kah i ralkap 8 an nunnak a liam pinah meithal zun 7 le meithal kuan zeimawzat zong an laak. Nunnak a liammi hna chungkhar cu humhimnak ca ah kan langhter lo, tiah ṭangṭi phu in ralkap pakhat nih a chim.
May 31 zinglei zong ah Didaukkan khua in farlong 4 aa hlatnak ah meithal kuan hma in a thi mi pa pakhat ruak zong an hmuh i khuate vengtu phu chungtel a si lai tiah an zumh.
A luancia 2022 June 22 lio zong ah Pywinphyu peng Mezali hlei ah meithal phortu PDF cu Skat motor 2 in an kal lio ah SAC ralkap nih an rak kah hna i, PDF 12 nunnak a rak liam cang.
NUG Nih Yinmarbin Battalion 16 Sinah Meithal Zun 5 A Pek Hna! Sagaing ramṭhen, Yinmarbin pengkomh Battalion 16 sinah NUG runvennak zung nih meithal zun 5 a pek hna, tiah theih a si.
May 30 chun suimilam 12:00 tluk ah NUG nih meithal KA 2 zun 5 cu Yinmarbin pengkomh Battalion 16 sinah a kan pek. Hriamnam thazaang a tlawm tuk ko buin SAC ralkap kan doh, tiah Battalion Commander Bo Auk Shwe nih a chim.
“Meithal zun 5 cu kannih ca ah cun a tlawm tuk hringhran. Kan Battalion ning in meithal an kan pek tiang NUG sinah nawlnak kan tuah lai. NUG cozah zong phaisa lei in harnak tampi an ngeih ve caah an kan pek khawh rih lomi a si,” tiah a chim chap.
SAC Le Myanmar Ram Chaklei Hriamtlai Ṭangṭi Phu 3 Hna Cu Mongla Ah Tonnak An Ngei Lai; Myanmar ram chaklei hriamtlai ṭangṭi phu 3; Arakan Army(AA), Ta’ang National Lebiration Army(TNLA) le Myanmar National Democratic Alliance Army(MNDAA) hna cu SAC he June 1 ah Shan ramkulh nichuahlei Mongla khuapi ah tonnak an ngei lai, tiah theih a si.
“Tuluk tlangtlaknak in tlangcung hriamtlai ṭangṭi phu AA, TNLA le MNDAA cu SAC he tonnak kan ngei lai i tonnak kan ngeih dih in kan ceihhmai mi cu kan thanh te lai,” tiah TNLA in hruaitu pakhat nih a chim.
Cu tonnak ah cun SAC lei in Deputy General Yar Pyi nih a hruaimi National Unity and Peace Making Coordination Committee aiawhtu hna an kai lai. Cu pinah Tuluk ram in foreign affairs Ambassador Kaw Paung zong cu tonnak ah cun Tuluk ram aiawh in a kai lai, tiah BBC nih a ṭial. Tlangcung hriamtlai ṭangṭi phu in aiawhtu hna cu Mongla khuapi an phan cang, tiah Mongla News nih a langhter. Credite; The Chin Post