Banmauk Peng Kahdohnak Ruang Ah Tualchung Mi 10,000 Hrawng Ral An Hrial
Sagaing ramṭhen, Banmauk peng Kyawnglay khua pawng, May 20 ah SAC ralkap le PDF kar kahdohnak a chuak i, Kyawnglay khua telh in pawngkam um tualchung mi 10,000 hrawng cu ralhrial in an zam, tiah tualchung mi hna nih an chim.
Banmauk khua chung ah umhmun a khuarmi SAC ralkap he kahdohnak a chuak kho ṭhanmi a si caah tualchung mi hna cu PDF nih ralhrial chung ding in ralrin an pek hna, tiah min langhter a duh lomi pakhat nih a chim.
Kyawnglay le Manhtun khua pawng ah May 20 zinglei suimilam 9:00 in SAC ralkap le PDF kar kahdohnak a chuak i, zanlei suimilam 2:00 hrawng ah SAC ralkap vanlawng nih bomb a thlak, tiah theih a si.
SAC ralkap nih phone le internet line an phih caah bomb thlaknak ah a rawkralmi kong zeihmanh theih khawh a si rih lo, tiah theih a si. UNOCHA nih cazin an khawmhsuat mi ah SAC ralkap nih nawlngeihnak an laak hnu in Sagaing ramṭhen chung lawng ah tualchung mi sing 7 le cheu leng inn le lo an zamtaak cang, tiah an langhter.
Moe Peng Chung um Khuate Hna cu SAC Ralkap Nih Hriamngan In An Kah i Khuami 10,000 Hrawng An Zaam; Karen ramkulh, Moe Peng chung khuate cheukhat cu SAC ralkap nih hriamngan in an kah i ngakchia pakhat nunnak a liam pinah khua 9 chung in khuami 10,000 leng an zaam, tiah theih a si.
May 18 zinglei suimilaam 8:00 hrawng ah SAC ralkap khah-ma-yiah (ခမရ) 599, 590, tatma 44 le kha-la-ya (ခလရ) 48 hna cu KNU-Moe peng chung Saway khua, Kunetaw khua chung luh duh ah hriamngan pehtlai in voi 25 an kah lawng si loin Ngyionpinthar khua zong ah zuun 5 an kah i kum 14 ngakchia pakhat nunnak a liam, tiah KNU nih cathanh a chuah.
Cun, kum 47 minung Daw Hlah San, Mg Myint Myat (kum 18) hna cu hriamngan in hliam an tuar i sii-inn lei ah an thlopbul cuahmah hna. May 16 zong ahkhan Kha-la-ya 60 nih hnawngkung khua ah hriamngan zuun 7 le May 17 ah Taungsuh khua ah zuun 5 zong an kah tiah theih a si. Cun hi bantuk in khuachung ah hriamngan a kah peng caah khuami 13,991 cu khua chuahtak in an zaam dih tiah theih a si.
Ralhmai Ah Kum 2 Chung A Ummi SAC Ralbawi Pakhat Cu A Chungkhar Ngaih Tuk Lungrawk In Amah Le Amah Ai That; Karen ramkulh Myawaddy peng chung ralhmai ah kum 2 chung a ummi SAC ralbawi pakhat cu a chungkhar a ngaih tuk hna i lungrawk in May 19 ah amah le amah meithal i ai kap i a thi Khit Thit Media nih a ṭial.
Chungkhar ngaih tuk lungrawk in amah le amah ai that mi ralbawi (Corporal/တပ်ကြပ်) cu Rakhine miphun Lwin Chain (kum 53) a si. A nupi le fanu pahnih a kaltak hna. Corporal Lwin Chain cu miṭha le midaidam ngai a si. A umnak ah a kuttang ralkap hna cu raldohnak ah an kal dih caah rian a ummi vialte amah nih a ṭuan dih.
A re a thei ngaingai. Cunglei nih hrocer le rianfial a tong peng. A chungkhar sin a tlun lonak a sau cang. Hi thawng hi a lengah chuahter hrimhrim lo dingin cunglei nih nawl an pek hna tiah an kiangkap a ummi pakhat nih a chim. SAC ralkap hna cu an tlawm chin lengmang caah ralbawi si hna seh, ralkap sawhsawh si hna seh chungkhar si tlun le caankarlak i dinh zong an kham tiah theih a si. Credite; The Chin Post