Myonwa Pengkomh Hrambunh PDF Sakhan Pakhat Cu Mei Nih A Kangh I Kyats Sing 300 Man Hrawng A Ciam
=========
Sagaing ramṭhen, Monywa pengkomh ah hram a bunhmi Monywa pengkomh Battalion (2,3,4) Chindwin Attack Force hna hriamnam sernak sakhan pakhat cu mei nih a kangh caah kutser meithal telh in kyats sing 300 man hrawng a ciam, tiah chimphuannak nawlngeitu pakhat nih a chim.
“June 19 ah hriamnam kan ser cuahmah lio ah thil pakhat khat a can sual ruangah kan sakhan cu a kaang i Ks. Sing 150 in 200 man hrawng kan chiahmi zen, rifle, kutser meithal le motor telh in kyats sing 300 man hrawng a ciam,” tiah Chindwin Attack Force in chimphuannak nawlngeitu nih cun a chim.
Khatlei phu nih thir an sengh, khatlei phu nih kuanbawm an tuah. Cu lio ah mei kanghnak cu a chuak. Zun khat ah kyats sing 20 man hrawng a simi rifle zong a ciam dih, tiah a chim chap. A luancia April 10 lio zong ah khan Monywa pengkomh hrambunh Danger Force LPDF hna hriamnam sernak sakhan cu a rak kang i kyats sing 70 man hrawng a rak ciam, tiah theih a si.
Magway Ramṭhen, Sidoktaya Peng Palik Sakhan Cu PDF Nih An Laak, Pyusawhti Pahnih An Tlaih Hna; Magway ramṭhen, Sidoktaya peng um Tapun khua palik sakhan cu PDF nih an kah i an laak khawh pinah pyusawhti pahnih an tlaih hna, tiah NUG runvennak zung nih an thanh.
June 15 zanlei suimilam 5:45 hrawng ah Khah Lah Yah 253, 254, 255 le Kah Pah Sah 20 in SAC ralkap 40 hrawng nih umhmun an khuarnak Tapun khua palik sakhan cu Minbu pengkomh Battalion 3 nih an kah i an laak, tiah theih a si.
Tapun palik sakhan cu SAC ralkap nih an chuahtak i PDF nih pyusawhti pahnih an tlaih hna pinah cycle pakhat le riahcaw tlawmpal zong an laak, tiah theih a si. SAC ralkap nih sakhan cu an chuahtak hnu in sakhan cu PDF nih an khangh. PDF lei in a thimi le aa hliammi an um lo, tiah NUG runvennak zung nih an thanh. Crd; The Chin Post