A Poi Tuk E; Mipi ralkap an theih lo kar ah SAC ralhrang an kahdoh hna caah!!

PDF Minung Pa 4 Bomb An Remh Lio Ah Kahdohnak An Tong, An Zapiin An Thi Dih!!
==========================
Sagaing ramthen, Khin-U, October (29) ah PDF le SAC ralhrang karah kaphnih in kahdohnak a chuah i PDF lei in minung pa 4 nih ram le miphun caah an nunnak an peek tiah theih a si. PDF ralkap hna cu ral leiin timhtuahnak an ngeih cuahmah lio, an theih lo karah MakyiTung (မကျီးတုံ) khuate um Pyusawthi (ပျူစောထီး) hna nih an rat hnawh hna i an kahdoh hna caah a tubantuk in an nunnak a liam hi a si.

“SAC ralhrang thawngpang pee tu. Dalaan pakhat a rakra lai tiah thawngpang theih a si caah tlaih dingin zaan lei suimilam 4:00 hrawng ah PDF pawl cu an kal. A sinain khat lei nih lehnak an tuah ve hna caah hnu lei ah an kir than. Mah dalaan cu Sii-ai thlopbul a herh tiin motor in an chuah lio ah PDF pawl nih bomb an remh.

Cu bomb an remh cuahmah lio ah Pyisawthi hna nih, cu thawngpang cu an theih caah an va kal hnawh hna i an va kah hna. Cu kaa hmun ah cun PDF minung pa 4 ningin an nunnak a liam tiin an chim.” tiah tualchung mi pakhat nih a chim. Khin-U khuapi nichuah lei KanGawYet (ကံကော်ရိပ်) thlang lei ah Mission pakhat langhter dingin aa zuam mi mipi ralkap minung pa 4 cu SAC ralhrang phu le,

MakyiTung (မကျီးတုံ) khuate um Pyusawthi (ပျူစောထီး) hna nih kharceh in an kahdoh hna caah an nunnak a liam nak kong le nizaan zaan lei sangah an nunnak a liam mi mipi ralkap an ruak cu ngah a si cang, tiah tualchung thawngzamh nih a tial tiin Burma VJ nih a langhter.

Monywa Khuachung Motor Ṭawlnak Dawr Ah I Kahnak A Chuak, 3 An Thi, Sagaing ramṭhen, Monywa khuachung Nandawon sang ah um mi Sanmin motor ṭawlnak dawr ah, October 29 ah meithal i kahnak a chuak i, dawr ngeitu telh in minung 3 an thi tiah mi bawmchantu phu chungtel pakhat nih nihin October 31 ah a chim tiah theih a si.

Meithal i kahnak a chuah ruang ah Sanmin motor ṭawlnak dawr ngeitu Daw Kyin Nuh(kum 45), U Kyaw Htay(kum 76) le U Myat Noe Kyaw(kum 51) tiin minung 3 an thi. Myingyan Black Tiger (MBT) phu nih cun pyusawhṭi hruaitu sang khuabawi U Myat Noe Kyaw kan fimhlawm tiah October 30 ah cathanh an chuah. Myingyan Black Tiger (MBT) phu hna cu October 29 ni Nyaung U peng Ngatayauk palik sakhan luhhnawh in kahdoh a rak si lio ah ai tel ve mi phu an si.

Kachin Ramkulh Cozah Zung Chungah Bomb A Puak, Tualchung Mi Pakhat A Nunnak Liam, Kachin ramkulh, Myintkyina(မြစ်ကြီးနား) khua, ramkulh cozah zung chungah nizan October 30 zanlei ah bomb puahnak a chuak i, tualchung mi pakhat a thi, tiah tualchung mi hna nih an chim.

Nizan October 30 zanlei sml 6:35 ah Kachin ramkulh cozah zung chung, covid i runvennak le lakhruak in i zohkhenhnak committee zung pawngah bomb puahnak a chuak i, cycle aa citmi tualchung mi pakhat cu a takpum vialte a man dih, tiah theih a si. Cu bomb puahnak kong he pehtlaiin tualchung mi pakhat nih, “Bomb aa put lioah ruah lo piin amah sinin puak sehlaw a dawh bik ko,” tiah a chim tiah theih a si.

Sayakyi Tin Luai Thahnak Kong Ah International Dai CDF Supporting Committee Le NADC Nih Duhlonak An Langhter, A luancia October 16 zan Ah CDF Matupi Dalan fimhlawmtu phu nih, sayakyi Tin Luai cu a inn chungah an luhhnawh i, biahalnak zeihmanh ngeih ta loin an thahmi cungah North America Dai Community le International Dai CDF Supporting Committee nih duhlonak cathanh an chuah tiah theih a si.

An cathanh chungah CDF Matupi dalan fimhlawmtu phu nih, sayakyi Tin Luai cu a ruang um lo le biahalnak zeihmanh tuah ta loin an thah pinah dalan a si tiin mizapi sinah theihternak cathanh zeihmanh an rak chuah mi a um lo. Cucaah Sayakyi Tin Luai cu Non-CDM sawhsawh lawng a si i, dalan a sinak zeihmanh an langhter khawhmi a um lo, tiah an langhter.

CDF Matupi dalan fimhlawmtu hna nih, ralkap zulhphung zul loin sayakyi Tin Luai cu an tlaih i, a chungkhar hmaiah an thah. Cucaah Non-CDM dantatnak kong ah NUG fimcawnnak zung nih 2022 April 2 lioah thanhnak an rak tuahmi zulhphung he aa kalh.

Cucaah CDF Matupi dalan fimhlawmtu phu nih tuaktannak zeihmanh um lo le zulhphung zul loin sayakyi Tin Luai nan thahmi cungah North America Dai Community le International Dai CDF Supporting Committee nih fak piin duhlonak kan langhter, tiah an thanh.

India Ram Ah Hlei Pakhat A Cimh Caah Minung 141 Leng An Nunnak A Liam, India ram ah kum 150 a hlun cang i, mirang chan ah rak sakmi thirhlei pakhat a cimh ruangah rammi 150 leng an nunnak a liam, tiah India palik nih nihin October 31 ah an langhter. A nunnak a liammi 141 chungah ngakchia le nu an tam deuh, cun 130 leng kan khamh khawh hna, tiah palik bawi pakhat nih a chim tiah theih a si.

Cu 1880 kum ah onnak an rak tuah mi thirhlei cu mirang British nih India a rak pen lioah an rak sakmi a si i, meter 233 a sau, cun 1.5 meter a kau i England ram in an rak phurhmi thilri in an rak sakmi a si tiah theih a si. Biaknak puai le Di Pawali puai an tuah lioah thirhlei a cim hi a si i India ke ralkap le ti ralkap hna nih an bawmhchanh hna, tiah theih a si.

Kalaymyo Ah Mifir Nih Inn An Bauh, Tangka Kyats Sing 100 Hrawng An Fir, Sagaing ramṭhen, Kalaymyo khua, Tazin sang ah mifir nih nizan October 30 zinglei ah inn an bauh i, tangka kyats sing 100 hrawng an fir, tiah Tazin sang a ummi hna nih an chim. Inn ngeitu hi biakinn a kal karah mifir nih an bauh hi a si. Tangka kyats sing 100 hrawng an fir i, thilri dang cu an fir mi a um lo, tiah sang chung ummi pakhat nih a chim.

Sagaing ramṭhen, Kalaymyo ah SAC nih nawlngeihnak a lak hnu in a bu bu in mi thilri chuh le firpiak a tam chin lengmang. Kalaymyo khua chung a him lo chin lengmang caah tualchung mi hna cu thingphang in an um, tiah theih a si. Crd-The Chin Post