A Poi Tuk E; Kawlram mipi kan caah thawngpang chia taktak thanhnak an tuah !!

SAC Ralhrang Cozah Cu Russia, China Le India Nih Bomhnak An Peek!!
====================
SAC ralhrang cu China, India le Russia ram hna nih bomhnak an peek tiah ASEAN Parliamentarians for Human Rights (APHR) nih cathanh a chuah mi ah a langhter. SAC ralhrang nih a nawlngeihnak a zohkhenh khawhnak, minung nawlngeih buarnak pawl pehzulh in SAC ralhrang nih a tuah nak ah China, India le Russia ram hna nih bomhnak an peek ti zongin ASEAN Parliamentarians for Human Rights (APHR) phu nih cathanh ahcun an langhter.

SAC ralhrang lei nih ASEAN ii lungtlinh mi phun 5 cu tlamtinter khawh dingah thanchonak a um lo lio ah China le Russia nih SAC ralhrang cu bomhnak an peek. India cu SAC ralhrang bomhnak a pee mi ram hna chungin aa tel ve mi ram a si ii, SAC ralhrang cozah cu a cohlang mi a si ii tuahkel ningin chawhlehnak cu pehzulh in a tuah mi a si pinah ramri tlunkal nak rian a tuan mi a si, ti zongin an langhter.

CNDF Nih Tender Tuah An Onh I 10% An Lak Hna!, Chin National Defense Force (CNDF) nih, Chin ramkulh Falam peng chungah Tender tuahnak nawl an pek hna tiah, theih a si. “SAC nih kawhmi Tender tuahnak nawl an pek hna i tender hmumi Company hna nih CNDF sinah Zatuak ah 10% an pek ter hna tiah, Company riantuannak ah a telmi pakhat nih, The Chin Post ah a chim. CDF-Mindat zong nih Tender tuah an onhnak kong an rak thanh bel ve cang. CNDF cu nai teah CJDC chungtel sinak in ka chuak tiah a timi Phu pakhat an si.

Lawngtlai Ah Electric Mei Tha Tlaihnak Ruangah Rianṭuantu Pakhat A Nunnak A Liam!, Nihin November 3, zanlei suimilam 4(Indian Standard Time) hrawng ah Electric department rianṭuan, Pu Francis Rocungnunga(kum 30) cu Electric mei tha nih a tlaih ruangah a nunnak a liam tiah theih a si.

Lawngtlai College sang i khuasa mi Pu Francis Rocungnunga cu November 3, zanlei suimilam 4 hrawng ah AOC sang ah Electric mei line a rawkmi dingah electric tung a kai i a tuah cuahmah lioah mei tha nih a tlaih hi a si. Pu Francis Rocungnunga cu District Hospital(Lawngtlai Peng Sizung) an phanhpi manh ko nain sibawi te nih an chanh manh khawh ti lo caah a nunnak a liam.

Pu Francis nih hin electric tung a kai hlan ah control room lei tuanvo ngeitu sinah ṭha tein pehtlaihnak a tuah hmasa ko, tiah Mizoram tualchung news nih an ṭial. Pu Francis hi miṭha le Pathian aa bochan ngai mi a si i, Lairam Isua Khrista Baptist Kohhran(LIKBK) Zion Unit ah Minobu hruaitu, Assistant Secretary rian a tlai lio mi a si.

Pu Francis nihhin a nupi le a fale pahnih(kum 2 mi le kum 1 mi) a tan tak hna. A ruak hi Lawngtlai AOC ah tuzan zanvarpi a si hnu thaizing lei ah an khua, Cheural khua lei ah tlunpi a si lai, tiah theih a si.
A luancia thla zong ah khan Lawngtlai District Rulkual khua ah Power & Electricity Department rianṭuantu hna a bawmtu tualchung mi 3 cu mei tha nih a tlaih hna caah an nunnak a rak liam cang.

Paletwa Pengchung Kahdohnak Ruang Ah Tualchung Mi 500 Leng Ral An Zaam, Chin ramkulh, thlanglei Paletwa peng Tayakone, Kyaukpalin(ကျောက်ပလ္လင်) le Sattalawa(ဆတ္တလာဝ) khua thum i a um mi tualchung mi 500 leng cu SAC ralkap le AA kar kahdohnak a chuak lai ti an phan caah, October 30 in Paletwa peng Miza khua ah ralhrial dirhmun an phan tiah tualchung mi hna nih an chim tiah theih a si.

May be an image of 10 people, people standing, tree and outdoors

Tayakone, Kyaukpalin(ကျောက်ပလ္လင်) le Sattalawa(ဆတ္တလာဝ) khua khatlei ral ah Rakhine ralkap AA nih hmunhma an lak, cun khuachung zong ah SAC ralkap an um caah kan zaamnak a si tiah tualchung mi hna nih an chim.
Miza khua ah a zaam mi ralhrial hartong hna caah eiding le um ṭhutdirnak kongah harnak an tong ngai tiah bawmhnak petu hna nih an chim.

May be an image of 10 people, people standing, tree and outdoors

Paletwa ah ralhrial dirhmun phanmi 20,000 leng an si i, mi tamdeuh cu Paletwa khuachung le Sami khuachung ralhrial sakhan ah an i dor hna, a cheukhat cu India, Mizoram ramkulh chung ah aa dormi zong an um tiah ralzaam bawmhnak a tuahtu hna nih an chim.

May be an image of 10 people, people standing, tree and outdoors

Kalaymyo Ah Kahdohnak Umlo In SAC Ralkap Nih Hriamngan An Kah Caah Rawlruk Pakhat A Rawk, Kalaymyo ah kahdohnak a chuak lo buin SAC ralkap nih November 3 ah tualchung mi umnak hmun hriamngan in an kah caah tualchung mi pakhat ngeih mi rawlruk a tlak i a rawk tiah Kalaymyo peng tualchung hriamtlai phu nih cathanh an chuah tiah theih a si.

Kalaymyo peng thlanglei Htaukkyant(ထောက်ကြန့်) khua cu nihin chunhnu suimilam 11:20 hrawng ah SAC ralkap nih hriamngan in an kah hi a si. Voi thum an kah i voi khat cu khuachung ah a tla” tiah tualchung mi pakhat nih a chim.
November 3 zinglei ah SAC ralkap minung thazaang 150 hrawng cu Kalaymyo GTI sianginn ah umhmun an khuar tiah an thanhmi ah an langhter chih.

Farkawn Khuami Nih Ralzam Nithum Cung Khualtlawn An Senh Hna Lo!, Myanmar ramchung ah Ralkap nih nawlngeihnak an lak ruang ah nunhimnak ding caah Mizoram ramkulh Farkawn khua ah a zammi ralzam hna cu Farkawn khuami hna nih nithum cung khualtlawnnak nawl an pe hna lo tiah, theih a si.

“Nithum cung khualtlawnnak nawl a kan pe lo, Khualtlawn le lo riah lai zong ah khuabawi sinah catlap hal hnu lawng ah kal khawh a si, nithum a tlin cun rak tlun i a thar in lak than peng a hauh caah khualtlawn le lo riahnak kong ah harnak fakngai kan tong tiah, Ralzammi pakhat nih The Chin Post ah a chim. Farkawn khuami hna nih cun a luancia September thla ah khan Khuachung ah Ralzam dawrtuah zong an rak khap cang.

Philipine Ram Ah Thlichia Nalgae A Hran Ruangah Minung 100 Leng An Thi, Philipine ram laifang ah a luancia October 28 in thlichia Nalgae a hrang i min a cimh pinah ti a lianh caah minung 100 an nunnak a liam i 33 an tlau, tiah Department of Disaster Management nih November 1 ah an langhter tiah theih a si. Nalgae thlichia cu Tuluk ram thlanglei ah aa ṭhial cang. Aa ṭhial lai ah Philipine ram khualipi Manila zong a pal pah tiah theih a si.

Philipine President Ferdinand Jr. Marcos nih, an ram thlanglei i thlichia nih a denmi Maguindanao ramkulh cu November 1 ah vanlawng in a va vehvat hna. Tikulh 76,000 a umnak Philipine ram cu kum khat ah thlichia voi 20 tluk a hrang i, Nalgae thlichia hi a voi 14 nak a si. Khua caan a dik lo chin lengmang caah vawleipi a lum chin lengmang i thlichia hrannak a karh chinchin, tiah Seintist hna nih an langhter.

Falam Palik Sakhan In Palik Pakhat CDF CDM Siyin Sinah A Zam, Chin ramkulh, Falam palik sakhan in palik pakhat cu CDF CDM Siyin sinah a zam, tiah November 3 ah theih a si. Kum 4 chung palik rian a ṭuanmi Mang Suan(Kum 25) cu a luancia November 1 ah CDF CDM Siyin sinah a zam hi a si.

Anih hi tuan tein CDM tuah aa tim ko nain SAC ralkap nih a chungkhar an tlerhkhawn lengmang hna caah tuan tein CDM a tuah khawh lonak a si, tiah theih a si. “CDM tuah a duhmi paoh cu lunglawm tein kan don peng hna i kan cohlan peng ko hna. A luancia lio caan zong ah CDM ralkap officer pakhat zong SAC ralkap sinah a rak luh ṭhan caah ṭha tein checkhlatnak kan tuah hna,” tiah Chinland Joint Defense Committee ṭuanvo ngeitu pakhat nih a chim.

Major Myo Min Htun cu SAC ralkap he ai fonh ṭhan caah lung thawhnak men in CDM an tuah le tuah lo ṭha tein kan hlathlai hna lai, tiah a luancia October 7 lioah CDM ralkap hna nih cathanh an rak chuah. SAC nih nawlngeihnak an lak hnu in CDM tuahmi ralkap 8,000 nak tlawm lo an phan cang, tiah theih a si.

Thuhnak Khor (Bunker) I Cawh Cio A Herh, Nai hrawng cu Laitlang ah SAC vanlawng a zuan a tam ngai. Nov 2, 2022, 11:30am hrawngah SAC vanlawng ATR42 MPA cu Vanzang tlang le Camp Victoria kiangkap ah aa hel len. Laitlang hi SAC vanlawng aa hel lengmangmi hi a ruang pahnih a um tiah ka ruah.

Pakhatnak cu fur dih in cunglei kahdohnak biatak tein tuah an timh caah hmunhma an zoh. Chinram cu fingtlang le horkuang a tam caah ṭha tein hmunhma zoh hmasa lo ahcun kan i chuahsual kho ti an theih. Pahnihnak cu vanral vennak an ngei taktak maw ti an hlathlai. Cunglei kahdohnak tuah tikah an kan kap kho ve hnga maw ti theih an duh.

Atu tiang SAC vanlawng a zuangmi hna cu zeihmanh tong lo tein an kir ṭhan khawh lengmang caah vanran vennak an ngei taktak lo ti kha cunglei ah ripawt an pek lai ti a fiang. CNA nih vanlawng kahnak pakhat an rak cawkmi kha atu tiang hman a si rih lo. Kan theihnak ah voikhat an hman nain an hlawhtling lo ti a si. SAC Helicopter cu kah an timh nain a puak lo, a voihnihnak zongah a puak lo i hlat nawn a zuan hnu a voithumnak an kah i a puak nain zei san a tlai ti rua lo.

A vanlawng kahnak a ṭhat lo maw a si hnga a hmangtu an thiam lo dek a si hnga? Cu hrawnghrang lawng cu vanral vennak kongah kan dirhmun a si ko rua! SAC nih kan hnulei ah China sin in FTC-2000G tampi a cawk cang. Bomb ton 8 a ritmi tiang a phawr khotu vanlawng SU-30SME pahnih zong a Russia sin in a cawk cang. Cun Russia sin ṭhiamṭhiam in tichung tilawng a hrawh khotu Helicopter Ka-28 pali an cawk fawn cang tiah CDM ralbawi Zay Thu Aung nih a chim.

Kan hnulei zarh ah Naypyidaw Airfocre, Magwe Airforce, Tada Oo Airforce, Pathein Airforce le Myitkyina Airfocrce in vanlawng khaltu hna cu Russia vanlawng khalh thiam hna nih Russia ser SU-30 vanlawng khalh ning le hman ning an cawnpiak hna. SAC nih cun 2023, August thla ah an duhning tein thimnak an tuah khawh nakhnga cunglei kahdohnak fak piin an tuah chinchin lai, ti hi NUG le CDM a tuahmi ralbawi hna zong nih an zumhmi a si.

Cucaah kan umnak cio ah i thuhnak khor (bunker) cawh cio ding a si. Kannih cu a kan phan lai lo ti ding a si lo. A rawl a ṭammi Cenghngia nih sakhi fano zong zuah loin a ei dih bantukin an nawlngeihnak a hmunh khawhnak dingah mithah lainawn zong poi a ti lomi SAC ralkap kuanfang le bomb cu khoika poah a phan kho.

Thaizing ah zeidah a cang lai ti cu Pathian lawng nih a theih. Kannih cu kan thei lo, a si kho, a cang kho ti lawng kan chim khawh. Cucaah kan rian cu ralring tein um kha a si. Ṭhihphaihnak si loin ruahnak cheuh a si! Crd-The Chin Post