A Poi Tuk E; Kan mino pawl cu Kawlram an chuah tak dih cang ko lai hi ta!!

Thla 4 Chungah MoU System In Riantuan Dingah Thailand A Phan Mi KAwlram Mi, Minung 30,000 Leng An Si!
==============================
Thailand ram ah MoU in Kawlram mi riantuantu thlah hram cu kum 2022 May thla in thawk a si i, thla 4 chungah riantuantu minung 30,000 (thawngsawmthum) leng thlah khawh an si tiah riantuantu zung nih thawngthanhnak a tuah. Thailand ram ah MoU system in Yangon-Myawady-MeSot (မဲဆောက်) lam thluan, Yangon-Kawthaung-Ranaong lam thluan hna in kum 2022 May thla ni 10 in thlah nak cu a hram thawk than a si i, a tu tiang ah minung 30,000 (thawngsawmthum) leng cu riantuan dingah va thlah khawh an si tiah kan theih.

Kawlram mi riantuantu tam bik cu serchuahnak rian hmun, A kik khan sehzung (Cold storage), Workshop hna ah riantuanter an si i, riantuannak vuanci zung nih a dang tein chuah piak mi Thailand ram Licensed agency, Overseas Employment Service Agency (Foreign Employment Services Agency) hna nih an va thlah mi hna an si tiah kan theih.

A tu Thailand a phan mi riantuannak tu hna nih riantuan khawhnak cu kum 2 chung cain min an thut i, cu kum 2 tintan a dih in tattan chap than in riantuan than khawh a si tiah kan theih. Kawlram in Thailand ram ah phung ningin a va thlah tu hna Agency hi, a zapiin 140 an um tiah kan theih. Cu Thailand ram ah riantuan in a kal mi Kawlram mi hna chungah a tam bik cu mino lawngte an si tiah kan theih.

Nattalin PDF Nih SAC Tilawng Dinhnak Gate An Kah I SAC ralkap 7 Leng An Thi, Bago ramṭhen Nattalin peng SAC tilawng dinhnak gate pakhat cu Nattalin PDF nih an kah hna caah SAC ralkap 7 leng an thi tiah MRF Nattalin sinin theih a si.

“Nihin september ni 18 zingah SAC talkap tilawng dinhnak gate pakhat cu hriamngan le hriamhme he kan kah hna caah chikhat te ah SAC ralkap 2 an thi, cu hnu ah minute 15 hrawng kaphnih kar kahdohnak a chuak ṭhan i a dang 5 zong an thi than” tiah Nattalin PDF in ṭuanvongeitu pakhat nih a chim. Cu kahdohnak cu MRF Nattalin phu hna nih tuah mi a si i, khuami pakhat nih lam a hmuhsak hna tiah an chim tiah theih a si.

Tualchung hriamtlai phu nih Pale palik sakhan an kah hna caah SAC ralkap 6 an thi, Sagaing ramṭhen, Pale palik sakhan cu tualchung hriamtlai phufonh nih September 17 ni ah an kahdoh hna caag SAC ralkap 6 an thi tiah God of Myaing People’s Defence Force nih an chim. Cu palik sakhan ahcun SAC ralkap, palik le pyosawhṭi tiin minung thazaang 100 hrawng nih umhmun an khuar tiah theih a si.

” Zaanlei suimilam 5:47 hrawng in kan kah hna, kutser 90mm, 40mm, 60mm hmang in kan doh hna, anmah lei zong nih 60mm le 90mm hmang in an kan kah ve. Kaphnih kar i kahdohnak suimilam pakhat leng kan rau, suimilam 7:00 a luan hnu ah kanmah lei hlianhma tuarnak um loin hnu kan tolh kho” tiah God of Myaing People’s Defence Force chungtel Bo Satphi nih a chim.

Kaphnih kar i kahdohnak ah MVRF in ralkap pakhat nih a kee ah hliamhma a tuar, SAC ralkap lei in minung 6 an thi 3 nih hliamhma an tuar tiah theih a si. Cu kahdohnak cun God Of Myaing People’s Defence Forc, Pale battalion 1, Pale pengkomh battalion 8(Pale battalion 2), Pale battalion 4, Pale battalion 6, MPL, Thein Hngiat Ni, Shwe Hin Thar,

TKGF, Nagani, A Ngyia May, PCM, Angyia Daung, Khine Lay, Ever Freedom, MVRF(Pakokko battalion 6), Saka pah-kah-phah le Pale tualchung hriamtlai phufonh hna nih an kah hna tiah theih a si. Tanse Kahdohnak Ah SAC Ralkap 20 Leng An Thi, Sagaing ramṭhen Tanse peng tualchung hriamtlaiphu fonh le SAC kar kahdohnak ah SAC ralkap 20 leng an thi tiah theih a si.

A luancia September ni 16 ah Sagaing ramṭhen Tanse peng Okphoaing ( အုတ်ဖိုအိုင်) khua ah sentari congmi tualchung hriamtlaiphu le tualchungmi 10 hna cu SAC ralkap tatmah 33 nih meikhangh buin an rak thah hna ruangah a tuban tuk in tualchung hriamtlaiphu hna i fonh in teirulchamnak ah kan kahdoh hna hi a si tiah tualchung hriamtlai phu hna sin in theih a si.

SAC ralkap rallam an sialnak ah bomb an hmanhmi lungthum an i lamh pin ah 30 mm in an kah hna i SAC ralkap 22 cu hmakhat te ah an thi, cu hnu ah tualchung hriamtlaiphu lei in bawmchantu phu dang an ra i an kahṭhan hna caah SAC ralkap 3 an thi ṭhan Hi kahdohnak cu Tanse PDF, Guerrilla War Fare KPK, TSR, Tanse Tiger, Nine Star, PLA, TCRF PLA, TPC battalion 6,7,8,10,16 hna i bawm in an tuah mi si tiah theih a si.

Thantlang Peng Kong Theihtlei, 1948 Kum Kawlram luatnak ngah hnu 1972 kum ah Thantlang cu khuapi sinak (myone) kan hmuh i Sang 1 le khuakomh (ohsuh) 38 kan rak um. 2008 Kum ah Thantlang peng cu khuapi chung sang 1 (Myoma Block)kha Sang 3 (No.1 Block, No.2 Block, No.3 Block) le khuakomh (ohsuh) 37 ah sersiam than a rak si.

2017 Kum ah Thantlang peng chungum Hnaring khua cu khuapi dirhmun (myo) a hmuh i Sang 2 a um caah Thantlang peng cu Khuapi (2), Sang (5), Khuakomh (36) le Khuate (85) in ai sersiam than. Thantlang peng cu vawlei tang rili in a san pe 4962 a si, tlang sangbik kan ngeih mi hi Bawinu tlang a si i a san pe 8973 a sang.

Thantlang peng chungah Khuapi chungum mi milu 9151 (chungkhar 2051) kan si i khuate lei a um mi milu hi 43127 a si caah milu 52278 um a si. Cu lakah Chin miphun milu 52243 kan um i Kawl miphun 35 an um. (Ref:2019 GAD Report)
Thantlang milurel dihlak chungin 52242 hi Khirhfa biaknak a biami kan si i minung 35 hi Buddhist an si, cun Islam biaknak a biami hi minung 1 kan um.

Thantlang peng chungin hluttaw palai a tuan bal mi hna cu , Ramkulh hluttaw palai: Pu Robin, Ramkulh hluttaw palai: Pu Lal Maung Cung, Pyituh hluttaw palai: Pi Za Tlem, Amyotha hluttaw palai: Pu Paul Thang Thai, Ramkulh hluttaw palai: Pu Van Thawng, Ramkulh hluttaw palai: Dr. Hmuh Thang, Pyituh hluttaw palai: Pi Ni Sui Lian, Amyotha hluttaw palai: Pu Bawi Khing (Pu Henry Van Thio thim a hmasa a si nain Vice President ah thim a si caah amah airawltu ah Pu Bawi Khing hi thim than a si) Pehthan te ding…. Sources: 2019 GAD Report & Others.

WMD Hriamnam Hman Lo Dingah Biden Nih Putin Ralrin A pek, US President Biden nih Ukraine kahdohnak ah Weapons of Mass Destruction (WMD) hriamnam hmang lo dingin Russia President Putin cu ralrin a pek tiah theih a si. “Weapons of Mass Destruction (WMD) hriamnam cu hmang bak hlah, na hman ahcun ralpi pahnihnak( World War II) dih hnu in ton bel rih lomi ral na thawhter a si lai” tiah, US ralrin peknak kong cu CBS media nih interview an tuahnak ah Putin nih a chimphuan.

Russia nih Ukraine tuknak ah Weapons of Mass Destruction (WMD) hriamnam pawl a hman ahcun zeibantuk in dah lehrulhnak tuah a si lai timi tu cu US President Biden nih cun a chim chih lo. A luancia March thla lio ah President Biden cu European Union, G-7 le NATO ram hna he tonnak a ngeih hnu in a tu bantuk in WMD hriamnam pawl hman lo ding in Russia ralrinnak a van pek hi a si. Russia ramleng minister Sergey Lavrov nih cun Nuclear raltuknak a chuak sual lai maw tiah thinphan lengmang mi cu a tak in a chuak kho dingmi dirhmum a si ko tiah, a chim ve.

Ganmah ah phaisa 5000Ks catlap a lem tlap 299 le 10000Ks catlap a lem tlap 30 an tlaih, Magway ramṭhen Ganmah khua, Ganmah car gate in Magway lei kuat dingmi parcel bawm pakhat chungah thongnga ca tlap a lem le thonghra ca tlap a lem an tlaih tiah theih a si. Cu parcel bawm a kuatu nu a umnak inn zongah thongnga tlap a lem le thonghra tlap a lem an tlaihchap tiah theih a si.

“Nihin ah kan tlaihmi hi parcel bawm pakhat chungah thongnga tlap a lem tlap 86, thonghra tlap a lem tlap 5 kan hmuh. Cu thil a kuatu nu a inn cu kan kawl i, a umnak inn ah thongnga tlap a lem 213 le thonghra tlap a lem tlap 25 kan tlaihchap. Parcel bawm kong he pehtlaiin a hlan kan in thawng kan theih caah a tu bantukin kan tlaihkhawhnak hi a si” tiah Ganmah gate ah rianṭuantu pakhat nih a chim.

Sagaing ramṭhen ah SAC ralkap nih PDF sakhan an lak, Sagaing ramṭhen, Monywa tualchung hriamtlai phu hna umnak Nyaungpin(ညောင်ပင်) sakhan le Yesagyo hrambunh tualchung hriamtlai phu umnak sakhan cu SAC ralkap nih luhhnawh in an lak tiah PDF nih an thanh.

Yesagyo peng tualchung hriamtlai phu umnak sakhan cu September 16, zinglei suimilam 6:00 ah minung thazaang 200 he SAC ralkap hna nih an kan luhhnawh i an laak, sing 500mmk man tluk thilri kan sung tiah Yesagyo pah-kah-phah nih September 17 ah cathanh an chuah.

Minung i hliamhnak cu a umlo nain kan sakhan an kan hrawhpiak i an kan khanghpiak tiah Yesakyo tualchung hriamtlai phu chungtel Ko Wai Gyi nih a chim. “Sakhan cu dalan 2 nih lam hmuhsak in an ratpi hna, caan a tlai hlan ah kan hrialmanh hna caah minung i hliamhnak cu a um lo nain kan thir khawhlomi thilri meiseh, solar, motor, cycle le zeidang thilri hna cu an kangh dih” tiah a chim chap.

Cun Monywa hrambunh, Black Dragon phu hna umnak Nyaungpin(ညောင်ပင်) sakhan cu September 17 ah SAC ralkap nih an luhhnawh ṭhan tiah Black Dragon phu nih September 18 ah cathanh an chuah. PDF chuugtel hliamhma tuarmi an um lo na in, cycle, kutser meithal, 40 mm bomb le hriamthil dangdang hna an lak i, sakhan cu mei an khangh ta. Sing 200mmk man tluk hrawng kan sung tiah an thanhmi ah cun an langhter.

Pyin Oo Lwin ah ngakchia kum 12 pakhat telhin minung 5 an thah hna, Mandalay ramṭhen, Pyin Oo Lwin peng Sika khua ah Ar zuatnak dum pakhat ah nihin September 18 ni ah thah a tongmi ruak 5 hmuh a si tiah theih a si. “Thah a tongmi hna hi nu 3 le pa 2 an si i ar zuatnak dum chungah thah an ton hi a si, thah a tongmi hna chungah kum 12 tluk ngakchia pakhat aa tel” tiah Pyin Oo Lwin mi bawmchantu phu nih an chim.

“Zinglei suimilam 11:00 tluk hrawng ah ar zuatnak dum chungah thah an ton hi theih a si. Thah a tongmi hna hi an chungkhar ningin an si. Pakhat cu a thaw a um rih nain sizung phanhpi hnu ah a nunnak a liam ve. Thah an ton hi zaan ṭim a si lo ah zing deilei a si kho tiah zumh a si” tiin Pyin Oo Lwin mi bawmchantu phu chungtel pakhat nih an chim.

Taze kahdohnak ah SAC ralkap chungtel 10 an thi, Minkin ah SAC ralkap 2 an thi ṭhan, Sagaing ramṭhen, Taze peng, September 17 ni kahdohnak ah SAC ralkap chungtel 10 an thi tiah Taze PDF nih an thanh. Taze peng Aungchainta khua mei a khangtu SAC ralkap hna cu Taze PDF battalion 6, battalion 7, battalion 8,battalion 10, battalion 16, battalion 25, battalion 26, KPK, PLA le pah-kah-phah phufonh hna nih nihin zinglei suimilam 11:00 hrawng ah hriamngan le hriamhme he an kah hna caah SAC ralkap a thimi an tam tiah theih a si.

YeOoGone(ရေဦးကုန်း) khua lei ah rallam sialin a kalmi SAC ralkap ṭat-mah 33 in ralkap hna cu Taze PDF battalion 6 le battalion 7 nih nihin chunhnu suimiliam 12:20 ah an bawh hna i minutes 10 hrawng an kah hna caah SAC rallap 10 an thi tiah theih a si. Kahdohnak a dih hnu zaanlei suimilam 5:30 hrawng ah hliamhma tuarmi SAC ralkap hna cu Lawng 2 cungah an khin hna i an kalpi hna tiah theih a si.

September 17, chunhnu suimilam 1:00 ah Minkin peng Taunglat hmunram ni chuahlei zawnah umhmun khuarmi SAC ralkap le pyusawhṭi hna cu Minkin peng tualchung hriamtlai phufonh nih an kah hna caah SAC talkap 2 an thi tiah theih a si. Crd-The Chin Post