Falam-Hakha Lam Ah A Tlaumi Pahnih Cu Mei In An Khangh Hna nak Ruak Hmuh An Si
=======
Falam-Hakha lam ah a rak tlaumi Tedim khuami pahnih cu May 22 ah mei in an khangh hna nak ruak an chungkhar nih an hmuh hna, tiah theih a si. Hniarlawn khuathar pawng Tiphul lam ah umhmun a khuarmi SAC ralkap sakhan ah May 22 zinglei ah mei in an khangh hna nak ruak cu an chungkhar nih an hmuh hna, tiah mithi hna chungkhar he naihniam in a ummi pakhat nih a chim.
A luancia May 2 ah Tedim khua in Ciin Hau Vung le Hakha um Lian Za Thawn cu Falam in Hakha lei ah cycle in an kal lio ah Chuncung le Hakha karlak SAC ralkap sakhan pawng hrawng ah an rak tlau, tiah theih a si.
An chungkhar hna nih SAC ralkap le Chin ralkap sin zong ah hlathlainak an rak tuah ko nain an rak hmu hna lo. May 22 ah SAC ralkap nih sakhan an chuahtaak hnu in cuka hmun cu an va zoh tikah an pahnih ruak cu an hmuh hna, tiah theih a si.
SAC Ralkap Nih Naungkone Khua Bomb An Thlak Ruangah Khuate 18 In Minung 21,880 An Zaam; KNU Brigade 3 hmunram um Mu peng Naungkone khua cu SAC ralkap nih drone in voi 2 bomb an thlak i tualchung mi inn le cacawnnak sianginn an kaang, tiah KNU Central nih cathanh an chuah.
SAC ralkap hna nih cun Naungkone khua cu May 21 zanlei suimilam 1:20 ah voikhat, 2:15 ah voikhat, tiin drone hmang in bomb an thlak. Naungkone khua cu inn 117 a um i, milu 782 an umnak a si. Khuami hna cu a himnak hmun ah an zam hna, tiah theih a si.
SAC ralkap nih KNU hmunram Mu peng chung ah May 10 in an lut i, khuami hna cu an thah hna pinah an inn le lo an khanghpiak hna ruangah Mu peng khuate 18 in minung 21,880 cu a himnak hmun an zam, tiah theih a si.
SAC nih nawlngeihnak an laak hnu in KNU hmunram Mu peng khuate ah hriamngan, drone le vanlawng in kahdohnak an tuah leng ah tualchungmi an thah hna ruangah khuami tampi cu ralhrial in an zam. An kaltaakmi an inn le lo vialte zong SAC ralkap nih an khanghpiak hna, tiah KNU Central nih cathanh an chuah.
Monywa Khuapi Ṭamhnak Dawr Pakhat Cu Mifir Nih Luhhnawh In Phaisa Kyats Sing 700 Leng An Fir; Sagaing ramṭhen, Monywa khuapi um Ngwe Zar Hlaing ṭamhnak dawr dawr cu May 22 chun suimilam 12:00 tluk ah mifir nih an luhhnawh i phaisa kyats sing 700 leng le dawr hngaktu ngeihmi sui tampi zong an chuh hna, tiah Sangchung ummi hna nih an chim.
“Nu pakhat cu dawr chung ah a rak lut i cu hnu ah a hawile(pa) a auh hna. Dawr ngeitu cu cawl kho loin meithal in an hmuah hnu ah dawr chung a ummi phaisa vialte le dawr hngaktu hna an sui vialte cu an laak dih,” tiah dawr pawng a ummi pakhat nih a chim.
SAC nih nawlngeihnak an laak hnu in Monywa khupi ah, mifir nih dawr luhhnawh in phaisa le suingun chawva chuhnak atu le atu a cang nain mifir an tlaih khawhmi ngaingai an um lo, tiah tualchung mi hna nih cun an chim. Credite; The Chin Post