A Poi Ko; Hakha ah SAC Ralhrang nih Pa Pakhat an Kah caah Hliamhma Pu

Hakha ah SAC Ralhrang nih Pa Pakhat an Kah caah Hliamhma Pu
————
Nizaan November 6 ah Hakha, Dauchim lam ah SAC ralhrang nih kum 50 a simi pa pakhat an kah caah hliamhma a pu, tiah thawng kan theih.

“Nizaan zinglei sml. 9:45 hrawng ah Khuangthlak chak ah an i kap. Sml. 11:00 hrawng ah SAC ralhrang pawl nih Dauchim lam in an hngah i an hmuhmi paoh an tlaih hna. Meithal in kah a tongmi pa hi motorcycle hnulei ah aa pherhmi a si.

SAC ralhrang pawl nih lam an conghmi an hmuh tik ah an lau i cycle an mer than. Mah lio ah cun an kah hna i a ttawk ah an khen,” tiah khuami pakhat nih thil sining a chim.

Meithal in kah a tongmi pa hi a hliamhma he a zaam kho. Dauchim lam ah SAC ralhrang nih an hmuhmi paoh an tlaih hna i pa 19, nu 6 le ngakchia 3 tlaih an tong, tiah a cunglei khuami nih a chim.

Hakha Haithlan ah Kawl ralkap nih bomb le meithal an puah, khuami 2 an tlaih hna. Nihin November 7 zaan lei suimilam 3:30 PM hrawng ah Ralhrang nih Hakha Haithlan ah meithal le Bomb an puah tiin khuami pakhat sin in kan theih.

“Dalaan nih Haithlan ah CDF an um tiin a chim hna caah Ralkap an ra. A ra mi an tam ngai. Meithal tamlak an puah. Bomb voikhat an puah. Khuami pahnih an tleih hna. Tin Tin Pa te inn zawng an bauh i thilri zawng an lak” tiah khua mipakhat nih The Chin Post ah a chim.

An tleih mi hna pahnih cu ho an si theih asi rih lo. 3:30PM hrawng Hakha thar lam ruk ton nak zong ah Ralhrang nih meithal an puah sawh sawh tiin Hakha thar khuami pakhat sin in kan theih.

Tedim kahdohnak ah Kawl ralkap 2 thah, meithal zuun 2, phone 2 le tangka laak. November 5 lio, Tedim Peng chung Kennedy tlanghram kahdohnak ah CDF-KKG-CDM-Siyin, le PDF-Zoland nih Kawl ralkap 2 an thah hna, meithal zuun 2, phone 2 le tangka an laak, tiah theih a si.

Hi kahdohnak ah Kawl ralkap lei aa hliam mi an tam i BA-meithal zuun 2, phone 2 le tangka an laak, tiah CDF-Kalay-Kabaw-Gangaw (CDF-KKG) nih an thanh. CDF-KKG lei in Tg. Pau Gin Thang mual a liam ve, tiah theih a si.

Pinlebu ah CDM tuah hmasabik palek Myo Thant Zin Hein mual a liam. November 5 lio Sagaing Ramthen, Katha Pengkomh, Kawlin Peng, Pinlebu kahdohnak lio ah Pinlebu Peng in CDM tuah hmasabik mi palek Myo Thant Zin Hein cu a nunnak a liam, tiah PDF Channel nih a langhter.