A men baklo nusal; Dohthlennak ah i tel hau,
DOHTHLENNAK AH I TEL HAU, REL THLU UH
========
Kansas City ah CBCUSA CDF Supporting Committee meeting ngei ding kan si i lampi Dallas airport ah suimilam 5 bak ka taang.
Airport ka um chung ah pi NGUN TAANG (Rua khua) nih a ka chawnh i kan ram Dohthlennak kong ka ruah ah zahan zaan kai hngilh kho bak lo i tuchun ah credit card bak in bank ah phaisa ka va chuah i $2000 nan nu (Vanbawi nu) sinah ka pek e tiah a ka chimh.
i NGUN TAANG hi nuhmei, fa 4 a cawm lio mi a si. Malaysia an um lio ah an pa nih a thih taak hna i an nufa rual tein US/Indy an rak phan. Mi pangpar dum ah rian a ṭuan. Ei chom te a hmu mi si. Nain, Pathian hi ai bochan tuk i zeitikhmanh ah lungretheih hi a ngei bal rua lo ka ti. A ni kho peng ko.
CNF/CNA/Chinland Club ah hin a ti khawh tawkte in a thawh peng. Hlan zong ah $300 a rak thawh i ka rak ṭial bal cang. Chinland club nih thla 1 ah $100 thawh cio ding an timi zong thla 6 bak a thawh dih cang. Atu hi CBCUSA CDF Supporting Committee nih kan aupi mi ah $2000 hi a van thawh ṭhan. Khua zei ah hme phaisa a lak hnga ti tiang a ka ruahter.
Amak ko. Pathian nih Pi NGUN TAANG hi kan ram Dohthlennak ah mi lungthawhter tu siter a timh bak lai ti ka zumh ko. Nuhmei te, fa 4 a cawm lio hmanh nih hi tluk i kan ram Dohthlennak ca i ai zuam khawh ahcun zeitinhme kan um sawh ko lai tiah khua a kan ruahter/challenge cio hrimhrim lai ti ka zumh i pi NGUN TAANG upatnak pek pah in ka lung siaherh ka van in hrawmh cio hna.
Nan lung a tho dek maw. A thawh lo ahcun rel ṭhan uh. A thawh hlei rih lo ahcun rawl uul te uuh law rawl ṭam in i hrem te uh. Credit: Vanceuuk Khenglawt
US House of Representatives nih Kawl ralkap a ziizut khawhnak phung a fehter! Kawl ralkap a ziizut khawhnak caah US nih aa zuammi Burma Act 2021 timi phung cu US House of Representatives nih April 6 ah a fehter.
Mah phung hi a fehter caah Kawl ralkap nih 2021 thok in uknak a chuh hnu, hramhram in thil a tuah ruangah mipi 1,700 leng an thi lawng si loin nuhrin covo a buarmi thiltuahnak ruangah a tuar lai timi thawngpang kan thanh a si tiah US House of Representatives Chairman of Foreign Affairs Committee Gregory W.Meeks nih cathanh a chuak.
Cun, zalonnak ngah duh ah ral a tumi Myanmar mipi pawl he kan dirṭi khawh caah kaa uangthlar tiah Mr. Meeks nih cathanh ah a telh chih.
Britain ram ah hram a bunhmi nuhrin covo phu Global Witness zong nih Burma bill an fehtermi cu kan don i Senate zong nih fehter ve ding in a forhfial hna. A tu phung cu “Burma Unified through Rigorous Military Accountability Act of 2021” a silole “Burma Act of 2021” tiah auh a si.
Mah phung hi Hluttaw a pahnihning in fehter in US President nih min a thut a si ahcun 2021 February 1 thok in ralkap nih uknak a chuhmi a bawmtu minung pawl, a bawmtu phu pawl a ziizutnak, zalonnak phihkhanhnak, nuhrin covo an buarmi, mipi pawl hrem an sinak le minung thinlung ngei lomi an thiltuah pawl he pehtlai in a phichuak vialte cungah tuarter ṭhan khawhnak nawl a um lai.
US Ministry of Foreign Affairs zong nih Myanmar ram Democracy ngah ṭhan khawhnak caah Coordinator phakhat rianpeknak nawl a ngei lai i Myanmar kong hmaithlak in aa zuammi American cozah department pawl karlak biaruahnak, ramdang nih a lamkip in phihkhar khawhnak nawl zong a um lai.
Cun, Myanmar ram i a pawngkam ram a simi Thai, Bangladesh lei in mipi lei phu pawl bawmh khawhnak nawl a um lai. UN nih SAC fak piin a ziizut khawhnak hnga American cozah nih hneknak nawl a ngei fawn lai.
A tu phungning ahcun 2012 thok in Rohingya a silole a dang tlangcung miphun cungah Kawl ralkap nih a buarmi sualnak pawl, 2021 February 1 hramhram in uknak a lak hnu ah a buarmi sualnak pawl he pehtlai in ruahdamhnak, Myanmar ram ah a tu bantuk in hramhram thiltuahnak pawl a um ti lonak hnga khamnak pawl, tlukruannak a um khawhnak pawl he pehtlai in mah phung an fehter ni thok in thla 3 chungah US Minister of Foreign Affairs nih Hluttaw Committee pawl sin ah an chimpuan lai tiah an langhter.