A fano umhpah in, Online Facebook ah thil a zuar i a hmuh mi phaisa in CNF a bawm tu Pi Mang Kai le Chungkhar!

A fano umhpah in, Online Facebook ah thil a zuar i a hmuh mi phaisa in CNF a bawm tu Pi Mang Kai le Chungkhar hmanthlak! “CNF dohthlennak a dih hlan tiang ka si khawhnak lam pauh in CNF cu ka bawmh lai..” By Pi Mang Kai (Partha Nu)

Ka phone a ring i ka vun thlaih. A min ka save mi a si lo caah a ho dah a si hnga tiah ka ruat nawn. A tlawm pal kan ni chawnh ah Pi Mang Kai (Aibur) a si ti a aw in ka vun theih. Ka pu CNF caah phaisa tlawmpal bawmh ve ka duh i kan pa nih a rak in pek hna lai a ka ti. A nai ah fano a ngeih ti ka theih mi a si caah rian na ttuan kho cang maw tiah ka hal. Inn ah ka fa ka zoh pah in Online Facebook in thil ka zuar i tlawmpal cu ka hmuh ve ko. USA ka phanh in rian ka ttuan lai i CNF ka bawmh lai ti ka ruat zungzal nain, fa le (3) he ka si i kan pa lawng a ttuan tawn caah a tu lawng hi ka bawmh khawh hna a ka ti.

Anmah ca hmanh i tuak loin miphun caah an caan vialte aa pe mi CNF cu an dohthlennak a dih hlan tiang ka si khawhnak lam pauh in ka bawmh hna lai ka ti zungzal mi a si a ka ti. Mirum si ning law tampi bawmh ka duh hna nain a tu cu kan fa le an no tuk i ka duh ning in zeihmanh a si kho rih lo a ti chap. Kan ni lawm tuk tiin vei 2,3 ka ti i phone kan chiah. A tlawmpal ah an pa a rak phan i phaisa $400 cu cash in a rak put. Phaisa a tam a tlawm a biapi lo, a miphun dawtnak lungthin aa dawh tuk!

Chin miphun kan far, kan nu le pawl fano umhpah te te in FB ah thil an zuar. A cheu nih kan lawmh hna, a cheu nih hna-hnawk ah kan ruah hna, kan sawi hna. Thlacamnak te he lungsau tein an ttuan i an hmuh mi hnih khat te in kan miphun dirhkamhnak CNF ah an pek mi vun hmuh ah hin thil tamtuk a ka ruah ter. A hlei in lawmh a um i CNF rianttuan tu caah mitha an thawh ter. Kan hnu lei ah Pi Ngun Tang (David nu) nih hi bantuk thilttha hi a rak tuah rih. Hi kan far le pawl an nun le an thilttha tuahnak nih hin mikip lungthin ah rian ttuan seh law kan miphun vialte kan Chinram ah zalawnnak kan hmuh tiang ttuanvo rian kan ngei ti hi a thar in kan theih ter ko seh. Pi Mangkai (Partha nu) le a chungkhar nan cung ah kan ni lawm tuk! Credit: Daniel Sakhong