A Fak Tuk Hringhran Ko E

Kawl ralkap ralhrang phu nih hi bantuk in mi sawhsawh minung an kan thah mi hi cu a poi tuk hringhran ko. Ahohmanh nih ngaihthiam khawh lomi bak a si cang. Tapung le ralhrang thah bak in mi sawhsawh an tlaih khawhmi hna cu an thah cuahmah cang hna ti khawh a si. Tutan an thahmi pa hmanthlak zoh tikah aho hmanh nih celh ding a si lo. A Faktuk hringhran ko. Thonginn chungah cun zeitluk in dah an sual chinchin lai le mipi an tlaihmi hna an tuar ing lai timi kong ruah ah lung a fak tuk ee.

North Okkalapa, Yangon khualipi ah ralhrang phu (terrorists) nih mi sawhsawh cu ningcang loin lampi cungah an thah mi cu hmuh dih a si. Hihi sandahpiah ngam hna hlah sehlaw, kan tih hna seh ti an duhnak maw a si hnga? North Okkalapa hi an thah ning cu a hnangawng ah hri in an reng chih i, an thah ning cu a si. Minung fa nih celh ding le tuar khawh ding a si lo. A ralai mi ni le caan chung zongah Chin ramkulh chungah kan ton lai lo ti khawh a si lo. Ralhrang phu le palik hi nikhat hnu nikhat in an sual a zual chin lengmang cang. Cucaah laihlum a ummi kan unau vialte hna pumpak pakhat cio rak i ralrin hram ko uh.

Relchap, Hakha Mino nih nulepa kan in hlam hna. Nihin in Hakha ah ralkap uk duh lo kan langhternak hi a ni 41nak a si cang. A ni 1nak February 7 kan rak thok ni ah minung 1000 hrawng kan rak si. A ni 2nak ah minung tlawmpal kan vun karh. A ni 3nak in a ni 15nak tiang hrawng kan karh thluahmah. Asinain, a ni 16nak in cun kan zor cuahmah than.

February 7 in cheuthum cheu hnih le cheu hi cu mino lawngte kan si ti ning law ka palh theng lai lo dah. Nulepa kan in hlam taktak ko hna. Hakha ah inn thong tampi a um. Inn khat ah a tlawm bik pathum cu kan um ko lai dah. Nifatin te inn khat ah a tlawm bik pakhat tal hi cu chuak kho cio usih law kan tam taktak ko hnga. Kan tam a si cun ralkap le palek zong nih an kan tih lai. Hnahnawh zong an kan pe ngam hnga lo tiah ka hei ruah. Atu cu kan tlawm deuhdeuh. Ralkap lei an ral a tha deuhdeuh. An duhnak poh ah an kan dawi an kan kham cang.

Hi bantuk dirhmun kan si ca ah nulepa kan in herh bak ko hna. Nanmah nan rat khawh lo nan i tel khawh lo hmanh ah fale tal hi cu thlouh loin rak kan thlahpiak hram ko uh. Thlacamnak in dirpi lawng a zaa ti lo. Mah mipum bak i langhter hau dirhmun kan si cang. Nan kan telpi, nan kan tanpi, hmai nan kan suangpi ding kan i ruahchan. Kan duh taktak mi a si fawn. A ni khatnak in nihin tiang a chuak mi mino zong kan tha chia loin hmai ah nor chin hram ko hna usih. Atu kan ram a sining hi nangmah le keimah pumpak liangcung ah aa hngatchan. Nulepa kan in hlam tuk cang hna. Nan fale hi nanmah pum i langh bak in kan chuahpi ve cang uh. Kan dirpi ve cang uh.