Naypyidaw Pengchung Um SAC Ralhrang Sakhan Pakhat Mipi Ralkap Hna Nih An Laak
=========
Naypyidaw peng, Aung Nang Cho le Labet Taung karlak ah ummi SAC ralhrang sakhan pakhat cu mipi ralkap hna nih an kah caah ralhrang 5 an thi, hriamthil tam ngai zong an laak chih khawh, tiah mipi ralkap thawngthanhnak in theih a si.
June 12, zinglei suimilam 7:00 tluk ah mipi ralkap Naypyidaw-PDF Battalion hna, KA le Tantaung nitlak lei hriamtlai ṭangṭi phufonh nih luhhnawh in an kah hi a si i, SAC ralhrang lei thimi a tlawm bik 5 an si, tiah theih a si.
“SAC ralhrang sakhan ah ummi pawl hi thazaang 60 hrawng an si, ralbawmtu ah thazaang 100 hrawng an rakchap hna i, bomb in an puahhnawh hna caah SAC ralhrang a tom in an tla ti ah an chim. SAC ralhrang sin in MA3 meithal zuun 1, 60MM bomb hna le hriamthil dang hna zong an laak chih. Mipi ralkap in minung pakhat nih hliamhma faktuk lo a tuar” tiah mipi ralkap thawngthanhnak nih a chim.
Hiace Motor Brake Rawknak In Cansualnak A Chuak Minung 19 Hliam An Tuar; June 12, zanlei sang ah Keng Tung in Taunggyi lei kalnak Motor lampi ah Hiace Motor pakhat brake a rawk sual ca ah cansualnak a chuak i a chung aa cit mi minung 19 hliam an tuar tiah kan theih.
June 12, zanlei suimilam 4:00 tluk ah Keng Tung in Taunggyi lei ah a kal mi khualtlawng Motor minung 19 phurtu Hiace cu brake ciankuan lo ruangah can sualnak a chuak i minunh 19 hliam an tuar tiah theih asi.
“Phone in pehtlaihnak an kan tuah caah kan va kal i kan va bawmh hna” tiah chiatṭhat zohkhenh tu phu chung in ṭuanvo ngei tu pakhat nih a chim. Motor can sualnak in hliam tuar mi 19 hna hi chaitṭhat zohkhenh tu phu nih si-inn pi ah an tlik pi hna tiahtheih asi.
Mese Khuapi Palik Sakhan Pakhat Mipi Ralkap Nih An Lak, SAC Ralhrang Thimi An Tam Caah Cunglei In Bomb A Thlak; Karenni ramkulh, Mese khuapi palik sakhan cu mipi vengtu ralkap hna nih luhhnawh in an kah caah palik bawi (Sakhan hmu) telh in SAC ralhrang lei a thimi an tam ngai, tiah tualchung mipi nih an chim.
June 13, zinglei suimilam 4:50 tluk ah mipi ralkap ṭangṭi phufonh nih luhhnawh in an kah caah an sakhan an laak khawh. Cu hnu ah mipi ralkap hnu lei an tolh ṭhan i, SAC ralhrang nih helicopter in an kah. Cu pinah hriamngan hna hmang in voi 30 renglo Mese khuapi chung an kah, tiah tualchung mipi nih Khit Thit ah an chim.
“Atu hi helicopter pawl in an hel cuahmah lio a si. An sakhan cu an lakpiak cang hna i, palik bawi zong a thi an ti. Hriamthil zeimawzat zong mipi ralkap nih an laak chih khawh. SAC ralhrang nih tlang cung in khuapi chung ah hriamngan voi tam ngai an kah caah mipi hna cu inn tang le khur chung ah kan i thup hna” tiah tualchung mipi pakhat nih a chim ve. Crd; Lungmili Post