Kyiv Khuapi Cu Russia Raltuknak Vanlawng In Faktukin An Kah!

Kyiv Khuapi Cu Russia Raltuknak Vanlawng In Faktukin An Kah, Nuclear Ralpi A Tho Sual Lai Timi UN Thinphang!
==========
Ukraine ramchung Khiv khuapi cu Russia raltuknak vanlawng nih March 14 zaan ah faktukin kahdohnak a tuah, minung umnak inn tiangin an kah. Kyiv khuapi chungun minung umnak inn nganpi cu raltuknak vanlawng hmangin an kah tikah minung (2) nunnak a liam i, a dang (35) cu kan khamh manh hna tiah Ukraine nawlngeitu nih an chim.

Cu bantukin vanlawng in kahdohnak an tuah ruangah a chiatmi inn lo hna cu Sviatoshynskyi pengkomh ah a ummi dot (9) sangmi le dot (16) sangmi inn (2), Podiskyi pengkomh ah a ummi dot (10) sangmi minung umnak, Darnytskyi pengkomh ah inn (1), Lukyanivska vawlei tang tlamglawng station zong tlawmpal a chiat nain station cu nifatin tein a kal kho peng tiah nawlngeitu nih an chim.

Ukraine cungah Russia nih atu bantukin kahdohnak a tiah ruangah nuclear ralpi hmanh a tho khomi dirhmun a phan caah thinphang taktak a si tiah UNO chief secreatary nih March 14 ah khan a chim. Nuclear hriamnam ngeitu ram dihlak telh in Russia President Putin nih ralthawh aa timhmi a si tiah atu bantukin a chim i, tih a nung taktakmi nuclear ralpi cu atu hi a takin a cang khomi dirhmun kan phan cang tiah a chim chih.

Atu ahcun Ukraine cu Russia i kahnak le dohnak ruangah Ukraine ralzaam mipi zat cu 2.8 millions bak an phan cang tiah UNO nih a thanh.

Russia He Remdaihnak Hnatlaknak Cu A Rauh Hlanah Minsen Kan Tthut Khawh Cang Tiah Ukraine President Ruahnak Cheutu Nih Chim! Russia le Ukraine karlak ah hmaizarh chungah remdaihnak hnatlaknak minsen kan tthu kho tiah Ukraine President ruahnak cheutu Alexey Arestovich nih March 14 ah khan a chim.

May thla ahcun ramhnih karlak remdaihnak hnatlaknak minsen kan tthu khawh ko lai ka zunh, May thla thar asiloah cu nakin tuan deuh hmanhah a si kho tiah amah nih cun a chim. Russia ralkap hna cu anmah umnak ram ah an tlun khawh nakhnga kaphnih hnatlaknak minsen tthunak cu hmaizarh asiloah zarhnolh ahcun minsen tthutnak kan ngei lai tiah a chim.

Nizan ah kaphnih online cungin tonbiaruahnak cu ramhnih karlak ah remdaihnak lei a panh thluahmah ko tiah a chim.
Russia-Ukraine karlak ah ni (19) chung kahdohnak ah hin Russia vanlawng (80) le raltuknak tank (100) lengkai an sungh tiah Ukraine President nih a chim.

Ukraine leikap ah tank 1300 dengmang siseh a dang kuanfang a kham khomi motor telhin drone 145 hna cu kan hrawhpiak hna tiah Russia runvennak zung nih ca cawn nikhat ni ah khan cathanh an chuah ve.

Russia Nih Ukraine Tukmi Kongah; Russia nih Ukraine a tuk ni 20 a tling cang nain Kharson peng kulh ti dah lo cu lak khawhmi an ngei ruam rih lo. A ralkap tamtuk an thi cang i tamtuk nih hliam an tuar fawn tikah le vawleicung ram rum vialte ti tluk nih sanctions phun 6,000 tluk in an hrem caah a celh ruam ve ti lo. Russia an sanctions mi hi vawleicung tuanbia ah a fak bikmi asi. Russia nihhin Ukraine hi kan tu lo “Special operations” kan ngeihmi asi tiin ai dawhnak in a bia cu ai hmanter ve.

Kan Laimi catial thiam tampi nihcun EU, NATO le ram rum tampi nih Russia sanctions an tuahmi hi Putin a zeihmanh a poi lo an ti len nain taktak ti ahcun tu hi Russia cu vava a tum cang. Russia nih Ukraine a tuk mi a lo hma a kal khawh ti lo tikah Ukraine a rak bawmtu le sanction a tuahtu pawl cungah biatak tein a thin a hung cang, a bikin US cu a hrocer khun.

US nih Russia sinin a rak cawkmi Alaska le California i Fort Ross kha rak kan khirh than u tiah an ti hna. Alaska le Fort Ross khi 18th le 19th centuries hrawng ahkhan Russia nih US a a rak zuarh mi asi. Alaska khi president Andrew Johnson chan lio 1867 ahkhan $7.2 million in an rak cawkmi asi i California i a ummi Fort Ross khi cu 1841 ah an rak cawkmi asi. A herh ahcun nuclear ral tiangin tho kho dingin Russia state TV ah Sunday ni ahkhan an i hro len.

Russia nih cun cucu maw ka duh lai ti phun in sullam a ngei lemlo mi le santlaihnak zeihmanh a um lem lomi president Biden telh in minung 12 an ramchung ah luhnak nawl a pe hna lo. US nihcun zeihmanh ah rel hlei loin Ukraine cu $200 million cu hriamnam bawmhnak caah pek thiamthiam a timh rih i nizaan ahkhan anti-aircraft and anti-missile systems tha taktak petriot -104 battalion 2 cu Poland le Ukraine ramri ah a vun hun than thiamthiam. Hi petriot-104 hi meng 100 hla i a ra mi vanlawng le missile a rak veng kho tu asi i Lyiv khua in meng 50 hlatnak ramri ah a chiah.

Russia cu MAL ralhrang lo ve cang hna kaw tuhi ral an duhning in an tei khawh ti lo tikah an mipi fir le hrocer phun in an i la ve ciammam cang i Mariupol ah doctors 100 tluk telh in minung 500 hrawng cu sizung ah an hren cuahmah hna tiah an khuabawi Pavlo Kyrylenko nih cun a ti. Ukraine president Zelensky le BBC thawnglatu Monday i an i komhnak ah Russia ralkap pawl cu hro pah lem pah in bia a chim i Russia ralkap pawl hi nun dam a duhmi nan si cu ka theih, ral nan thawhka in zeihmanh phichuak nan hmuh lomi sunghnak nihhin nan lung an fianter hna kai ka zumh, rak i surrender u, tiin a ti lehlam cang hna.

Russia nih an hriamnam an sunghmi pawl 61% tluk cu Ukraine ralkap nih an kah piakmi le hrawhmi si loin an zaam takmi asi. Hi kongah Russia nih cun phung fak piin a chuah i ralkap kong i a dik lo ningin thawng zamhtu paoh cun kum 15 tiang thong thlak khawh dingin March 2 ahkhan Russia’s parliament nih approved a rak tuah bal. Hi lio ahhin Ukraine cu kan in dirpi ko timi langhternak ah Czech Republic, Poland and Slovenia an prime minister pawl nih kuan le bomb lakah an vun tlawn hna. US President Joe Biden zong nih NATO ralkap pawl cu hmaizarh ah vun tlawn ve dingin ai tim cuahmah.

Russia ralkap hi an cei ngaingai ve cang i hmai an fongh kho tuk lo pin ah khua a kik, nawncek ah an tank pipi ceilak an i tap, Ukraine nih le an ral a tha i a hmunhma an theih dih tikah tih an rak nung tuk ve. Kan hnu te i Ukraine ralkap va bawm dingin a kalmi British army sniper veteran Shane Matthews nih cun Ukraine ralkap pawl hi Russia ca lawngah a si lo vawleicung ralkap tha bik pawl hrang cio zongah tihnung tuk an rak si a ti. Khawika in ral an vun rat lai i khawika in kan rak kah lai timi hi an i fiangtuk an guerrilla tactics zoh tikah Putin ralkap kut in Kyiv hi an tlukter lai lo ka zumh ati.

Russia nihhin Kharkiv le Kyiv hi va la hmanh sehlaw Ukraine ralkap hmun biapi tukmi nitlak lei Poland ramri i a um mi Lviv hrawng vialte ahkhin sautuk defensive an celhpi khawh rih hna lai. President Zelensky hi law lei cawngmi kan ti cu fimzir tuk ve kaw zeitindah NATO ram pawl hi-hi raltuknak ah ka luhter khawh ve hna lai tiin a phunphun in lam a kawl peng ve.

Monday ahkhan Poland airspace chungah Russia Drone a hungzuang i kan kah tiah Ukraine Defense Forces nih cun an ti, President Joe Biden nihcun Russia nih NATO ramri lethmat pakhat a thih ahcun kan lehrul lai timi i zoh chih in hi drone hi hmun dang i an kahmi kha NATO member asimi Poland ramah a lut tiin Ukraine nih NATO hi raltuk ah vun ve seh tiin a hlennak asi lai tiin an zumh.

Russia caah hi raldohnak hi a hlawknak le minthatnak a hmunnak ding nakin sungh zatlaknak le ralpi pathumnak a luhternak lam lawngte asi caah hi ral hi cu saupi cu a awk taktak lai ka zum ti lo. Mitampi nih Russia nih a zeihmanh a poi lo an ti nain an celh ruam ve ti lo, Putin hi mi uah le misual kan ti cu hnulei vun i hnuh dawh zokzok cu ai nautat rih caah asi bik in ka ruah.

Kan theih dingmi cu Russia nih Ukraine hi a lak dih i a tei thai timi hi a um kho lomi asi lai caah cucu Putin caah cun a caan donghnak asi khawh caah a rauh hlan lo biaruahnak in a hnukdok te ko lai ka zumh. Asinain kapkhat lei ahcun hi thil hi US nih a tuahmi ah ka ruah ve, Russia hi tlu thai cikcek seh tiah an thluak an chuah mi a lo ngaingai caah cucu asi tak asi ahcun Ralpi pathumnak rim kan nam luklak ti nak cu asi lai nain taktak cu kan phan hraw lai lo. Credit: Chelsea Bawi