๐Š๐š๐ง ๐ซ๐š๐ฅ ๐ค๐š๐ง ๐ญ๐ž๐ข๐ง๐š๐ค ๐๐ข๐ง๐  ๐š๐ก๐œ๐ฎ๐ง ๐•๐ข๐ž๐ญ๐ง๐š๐ฆ ๐ฆ๐ข๐ฉ๐ก๐ฎ๐ง ๐›๐š๐ง๐ญ๐ฎ๐ค ๐ค๐š๐ง ๐ฌ๐ข ๐š ๐ก๐ž๐ซ๐ก ๐œ๐š๐ง๐ 

๐Š๐š๐ง ๐ซ๐š๐ฅ ๐ค๐š๐ง ๐ญ๐ž๐ข๐ง๐š๐ค ๐๐ข๐ง๐  ๐š๐ก๐œ๐ฎ๐ง ๐•๐ข๐ž๐ญ๐ง๐š๐ฆ ๐ฆ๐ข๐ฉ๐ก๐ฎ๐ง ๐›๐š๐ง๐ญ๐ฎ๐ค ๐ค๐š๐ง ๐ฌ๐ข ๐š ๐ก๐ž๐ซ๐ก ๐œ๐š๐ง๐ 
***************************
September 2001 World Trade Centre an puah hnu ah US Cozah nih CIA pawl cu Osama bin Ladin le Taliban pawl an i dawrnak sakhaan pi hmunhma va ngiatthlai dingah Afghanistan ram ah um mi Tora Bora camp ah an thlah hna. CIA nih an hmuh mi hna cu:

Mah hna miphun cu an fawi lai lo. Mah tluk hawhra in a khat mi lak ah khup bil in an hruaitu nih nawl a pek hna hlan chung cu an cil zong an dolh lo. Hi tluk chimh a ngai mi le nawl a zul miphun doh cu an fawi hrim lai lo tiah CIA nih an report ah an tial.

Vietnam ral liandonak – 1955 -1975) Vietnam ram cu vawilei pi theih in kum 20 chung an ram ah ral a thawh caah million tampi an thi. US ralkap hmanh 58,000 hrawng an thih ve. Tuanbia cu rel cawk loin an tial. Mifim thiam hna nih kherhlainak le biahalnak an tuah hnu ah abuaktlak in – hi tluk US ral lian pi hi ral hmete Vietnam nih an tei khawh ning hna a si tiah – an hmuh mi cheukhat hna cu:

US nih chaklei Vietnam Communist pawl ka kah cang hna lai tiah thawng a thanh bak in chaklei communist phu pawl cu an ram mi sin ah an lem khawh nak hna ding lam paoh kawl in khuapi he Khua te ah biaruahnak an tuah hna.

A sungh cuahmah le an thih cuahmah bu zongah an lung dong kho lo.

US le thlanglei ralkap hna sin ah information a zuar mi paoh (dalan) paoh kha ram leirawitu tiah an ti hna i minung tampi an hrem pin hna ah an thah ve hna.

US ral pi an doh cuahmah bu ah zaan paoh ah khua mi he funtomnak (แ€…แ€Šแ€บแ€ธแ€›แ€ฏแ€ถแ€›แ€ฑแ€ธ) bia an ruah peng hna ti a si. Bia an ruah khawh peng hna caah thih an rawnh khawh hna tiah an ti. Cucaah, mah mipi he biaruahnak cu an hriamnam tha bik a rak si phah an ti.

Chaklei Communist nih pennak khua paoh paoh ahcun American ralkap an kal paoh paoh ah chonh biak cu chim lo – ti hmanh an rak pe hna lo ti a si.

An miphun ralkap lawng nih do loin an mipi hrim nih an doh ve hna caah teinak an hmuh. An ralkap lawng nih rak do peng hna seh law US pi nih lak khawh a fawi te mi zong a si ti hi mifim thiamsang hna nih an hmuh mi pakhat a si ve.

US ralkap le thlanglei Vietnam ralkap nih an tleih hna an hrem ko hna zongah an hmurkaa ai cip peng mi hrim nih US ralkap tamtuk an lung a dongh ter hna ti a si.

Cucaah, kan nih Chin miphun zong kan caah kan ral a lian tuk mi kawl ralkap pawl kan tei khawh nak ahcun Vietnam miphun bantuk in kan ralkap CNF/A lawng rinh loin a lam kip in kan do tti a hau. 1. Kan ram le hmunhma dawtnak he kan hmurkaa cip a hau. Kawl ralkap le kawl bawi pawl zong peihtleih bak lo ding. 2. Kawl ralkap le palik kha chonh cu chim lo, ti le rawl zong pek bak ve lo ding. 3. A thlithup in siseh, langhang in siseh, miphun funtom a herhnak le Khua te he Khua pi he hmunkhat te ah ral kan doh tti a herhnak kong kha hmai ah nawr peng a hau.

4. Kan lung a a sau a herh. Ral doh cu cikhat ah dih phung a si lo. A lungsau mi paoh nih tei a si tiah mirang hlan phung la bang ahcun rak chim ceih peng a si ti a si. 5. US ral lian zong nih ai lungrual tuk mi Taliban le Muslim ralkap pawl le Vietnam communists pawl a tei hna lo bantuk in kan Chin ram ah fak piin kan i lungrual ahcun kan ral Kawl ralkap cu kan ram ah kan tei hrim hrim ko hna lai.

Note: Internet le Facebook lawng bochan loin mino he upa he khua kip kal in zei tin dah hmun khat ah kan ral kan do tti ning a si lai tbk in zokzok in kan tuah a herh. Vietnam ral ah mipi bia an rak ruah khawh peng mi hna le thi an rawnh khahw peng mi kha an hriamnam lian bik a si bantuk in kan nih miphun zong ah kan tuah awk a si i tuah hrimhrim zong kan i zuam awk a si.