Zualko: USA Um Kan Miphun Hawi Nih Ruah Lo Pi In A Kan Liam Tak

𝐍𝐠𝐚𝐢𝐡𝐜𝐡𝐢𝐚𝐭𝐧𝐚𝐤 𝐓𝐡𝐚𝐰𝐧𝐠
================
Kan hngalh cio cang bang in ICBC chungtel Van Kam (Run Za Awi) nih ruah lo tuk in May 18, 2023 chun ah mual a kan liam tak. Vante hi Pu Biak Peng le Pi Sung Zi hna i an fale 12 lak ah 7 nak a si i September 8, 1983 ah Hniarlawn khua ah a chuak. 2014 ah Malaysia in USA ah a rak phan.

May 18, 2023, chun 11am hrawng ah a U le Inn ah a leng i sau a thut manh hlan ah a hnuhdawh (seizure). Chungkhar nih Siizung ah an tlikpi colh ko nain Siibawi hna nih a nunnak chanh ding ah an i zuam len ko nain an chanh khawh ti lo caah chun hnu 4pm hrawng ah hi vawlei cung in a kan liamtaak hi a si.

Liamtaakmi chungkhar cingla rualchan vialte Bawipa tu nih hnem ko hna seh tiah thlacamnak he bawm cio hna u sih. Chungkhar thutpinak, le Van Kam a hnubik thlahnak le upat peknak cu a tanglei bantuk in a si lai. By Indiana Chin Baptist Church.

Hakha khua Kehtheibo sang ah damiah nih an ramh hna; minung pakhat naam in an tuk i hma a pu; 2023 May 21 zinglei suimilaam 1:00 tluk ah Chin Ramkulh Hakha, Keitheibo sang khuasa Pu Duh Awi te inn cu mi zei ti hngalh lo mi damiah pahnih nih an ramh hna i thilri an chuh hna pin ah an innpa minung pakhat zong naam hma a pu tiah kan theih.

Damiah nih tangka Kyats sing 12, mobile phone 3 le sui thi, sui kutdong hrolh an chuh hna lawng si lo in an innpa a si mi Pu Kep Kam zong a hngawng ah naam in an tuk caah hma a pu i sii-inn ah an thlop tiah sang mi pakhat sin in kan theih.

“Zinglei suimilaam 1:00 tluk ah a si. Ramh hmang minung pahnih nih an inn ah an luh hnawh hna i tangka kyats sing 12, sui thi le sui kutdong hrolh ah laakpiak hna. Ramh hmang nih an luhhnawh hna in an inn pawng pa Pu Kap Khawm cu bawmh an hal i ramh hmang hna nih Pu Kep Kam cu a hngawng ah nam in an tuk. Atu hi a thi chuah a tam ca ah sii-inn ah thlopbul cuahmah a si,” tiah sang chung minung pakhat nih THP ah a chim.

Damiah pahnih nih cun meithal an i tlaih lo nain kut cheh bomb an i ken. Kawl holh in an holh tiah theih a si. Kehtheibo sang, Khaikam Zaangleknak Inn ah cawnni li ni in SAC ralhrang le Pyosawhtee motor pathum khat nih hmunkhuar in an um lio a si tiah kan theih.

“Kan sang lei Khaikam pawngkam ahhin SAC ralhraang hmun a khuar mi an um. Suimilaam 6:00PM hnu hin cun khuami cu leeng ah chuah a ngah ti lo. Khua a vun muih khin minung pahnih tete in aa chawklet mi an um. Cun kan sang chung hi satil arva a tlau hi a tam ngai cang. Ho an si ti cu kan hngal lo nain khuami hi cu kan si lai lo ti cu kan chim ngam,” tiah sang chung mi pakhat nih THP ah a chim ve.

Hakha khuapi chung ah hi bantuk thil a can caah khuami zong it ngam lo le leeng chuakvak ngam lo in an um i Kehtheibo sang mi cheukhat zong sang dang ah an i thial tiah theih a si. Credite; The Hakha Post.