Timit Kahdohnak Ah Chin Ralkap Bawino Ngun Cung Lian Telhin Chin Ralkap Pathum Nunnak A Liam!
============
Nihin chun suimilam 2:00pm hrawng ah Timit kuanghrawn ah Chin ralkap le SAC ralkap kar kahdohnak a chuak i Chin ralkap lei in CNA Bawino Ngun Cung Lian telhin ralkap pathum nih ram le miphun ca ah nunnak an pek, tiah theih a si.(Midang hi an min kan hlat lio a si.)
Hmanthlak : Bawino Ngun Cung Lian
KIO Nih Thlichia Ruangah Chin Miphun Hartongmi Hna Ca Ah Bawmhnak A Pek; May 14, 2023 ah Chinram chung a lutmi Mocha thlichia ruangah har a tongmi Chin mi hna ca ah Kachin Independence Organization (KIO) nih bawmhnak Sing 2000 MMK cu Chin National Front (CNF) sinah a pek, tiah theih a si.
“2023 May 14 ah Chinram chung a lutmi Mocha thlichia ruangah har a tongmi Chin mi hna ca ah Kachin Independence Organization (KIO) nih bawmhnak Sing 2000 MMK a pekmi cu tlamtling tein kan cohlan. Unau sinak lungput he a rawkmi sersiam ṭhannak ding ca ah nan kan bawmhmi cungah kan i lawm,” tiah CNF – Heatquarters nih lunglawmhnak cathanh a chuah.
Timit Lungkhar Tlang Kahdohnak Ah CDF Zophei In Ralkap Pakhat Nunnak A Liam! Chin ramkulh, Hakha Lungkhar kahdohnak ah CDF Zophei in ralkap pakhat nih ram le miphun ca ah a nunnak a pek, tiah theih a si.
Nihin June 5 ah SAC ralkap le Chin ralkap hna cu Timit Lungkhar ah an i kap i, CDF Zophei in ralkap Salai Ngun Ṭha Kung(Stanley) nih ram le miphun ca ah a nunnak a pek. Zotung CDF pakhat zong hliamhma a pu ve, tiah ralhmai a kalmi pakhat nih The Chin Post ah a chim.
“June 5 nikhat chung lawng ah kahdohnak voi 3 a chuak. Kahdohnak zong a faak ngaingai. SAC ralkap hi 20-30 kar an si lai. Sakhan pakhat zong kan laak khawh. SAC ralkap pawl cu hnu an kir i, cu hnu ah hriamngan in an kan kah,” tiah a chim chap.
Nihin voi 3 chung kahdohnak ah SAC ralkap lei in a thimi le aa hliammi an tam ngai nain a zat tu cu theih khawh a si rih lo. CDF Zophei in a nunnak a liammi Salai Ngun Ṭha Kung hi miding felte a si caah hawikom le khuami nih an dawt i an bochan ngaimi a si, tiah theih a si.
Butalin Peng PDF Sakhan Cu SAC Ralkap Nih An Khangh, PDF Pathum Nunnak Liam; Sagaing ramṭhen, Butalin peng hrambunh Zarmani PDF sakhan cu SAC ralkap nih nizan June 4 zanlei suimilam 3:00 hrawng ah an luhhnawh i, an khangh pinah PDF pathum nunnak a liam, tiah PDF in ṭuanvo ngeitu pakhat nih a chim.
SAC ralkap nih an thahmi PDF ralkap pathum cu Naing Oo(kum 29), Kyaw Zin Myo(kum 19) le Hmaing Gyi(kum 34) hna an si i, SAC ralkap 120 leng nih sakhan an luhhnawh lio ah an tlaih hna i an thah hna, tiah Zarmani hruaitu nih cun a chim.
“Kan sakhan chung kan um lio ah ruah lo piin SAC ralkap nih hriamngan in an kan kah i kan sakhan cu an rak luhhnawh. Kah manhnak caan kan ngeih lo caah kan zaam dih. PDF pathum hi meithal kuan nih a khen hna caah an zaam kho ti lo,” tiah a chim chap.
Nunnak a liammi PDF pathum hna hi hriamnam serchuah lei ah kan bochan tuk mi hna an si. Meithal kan i kenmi dah ti lo cu sakhan chung a ummi thilri, zen-kuan le bomb zong zeihmanh kan la manh lo. An zate kyats sing 1,000 man hrawng a si lai, tiah Zarmani PDF hruaitu pa nih cun a chim.
SAC ralkap nih PDF sakhan an khangh hnu nihin June 5 zinglei tiang ah SAC ralkap pawl cu sakhan pawngkam ah an um rih lai tiin an zumh caah nunnak a liammi PDF pathum ruak zong an lo kho rih lo, tiah theih a si. Crd;The Chin Post