Thawngpang Chia Fonh!
====================
Sagaing ramṭhen, Kawlin khuapi Kyaw Zaya sang cu SAC ralhrang nih hriamngan in an kah caah kum 8 ngakchia pakhat telh in mipi 4 an nunnak a liam. SAC ralhrang nih an ruak cu an chungkhar hna sin ah an pe duh hna lo, tiah Kawlin info in ṭuanvo ngeitu pakhat nih a chim.
June 30, chun suimilam 12:00 tluk ah penguk zung chung um SAC ralhrang nih Kawlin atu bantuk in hriamngan an kah caah mipi inn 2 a rawk pinah mipi 4 an nunnak a liam, tiah theih a si. “Nunnak liammi 4 hna cu kum 60 upa pa 1, a nupi, an tupa kum 8 ngakchia 1 le kum 43 nu hna an si i, SAC ralhrang nih an ruak an laak hna. SAC ralhrang nih an inn pawl zong kulh in an phih dih” tiah a cunglei upa nih Khit Thit ah a chim.
2021, February, 1 in SAC ralhrang nih hramhram in nawlngeihnak a laak hnu ah Democracy kan hmuhnak ding caah a dohtu hna le mipi chung in minung 3736 an nunnak a liam cang, tiah ramkhel lei thongtla bawmchantu le zohkhenhtu Assistance Association for Political Prisoners (AAPP) nih June 30 ah thanhca a chuah.
Cu pinah tlaihkhih a tongmi hna dihlak fonh minung 23651 an phan cang. Cu chung ah minung 19295 hna cu an erhkhumh rih hna i, minung 6621 hna hi thongthlak dingin nawl an chuah piak hna, tiah a chim. Myanmar ram dothlennak he pehtlai in 2023, June 30 tiang ah thih dan pek in thong an thllakmi hna minung 115 an phan cang. Thih dan an pekmi hna minung 42 hna telh in minung 121 hi dantatnak an tuah hna.
Cucaah thih dan an pekmi hna dihlak fonh minung 157 an si cang i, tlaihkhih a tongmi hna chung in minung 4356 nih luatnak an hmuh ṭhan, tiah AAPP nih thanhca a chuah. Myanmar ram fimcawnnak lei in cachimtu Saya/mah hna telh chih in cozah rianṭuan tu pa 221 le nu 249 (An dihlak fonh) minung 470 hna cu SAC ralhrang nih an tlaihkhih hna.
Tlaihkhih a tongmi hna chung ah Mandalay ramṭhen in minung 108 an si i, phungning lo phung ṭengnge (Poh-mah) in thongthlak a tongmi 118 an i tel, tiah Assistance Association for Political Prisoners (AAPP) nih cathanh a chuahmi ah a langhter chih.
June 29, 2023 zing suimilam 10:00 tluk ah Kawlchaw tipi (Thise) laknak hmun ah a pam mi tleirawl Vanhmunropui ruak char a si. Thawng la tu nih an langhter ning in, Lawngtlai college sang ah khuasa mi hna Andrew Lalramluahpuia, C. Lalduatsanga le Vanhmunropuia cu Kawlchaw tipi ah (Thise) la mi an zul hna tiah theih asi.
Cu hmun a hawi le pahnih (Ti) lente celhnak in a tla mi chanh a timhnak hna ah a tu bantuk in Vanhmunropui a pamnak hi a si tiah an langhter. Vanhmunropuia ruak hi lungdong lo in caan saupi an kawl hnu ah July 1, zing suimilam 3:00 tluk ah an hmuh tiah theih asi.