Zualko; Tangka Ting (10) ruangah sual ngeilo mipi pakhat a nunnak a liam e!!

Tamu Thawngpangchia
============
Tamu ah SAC ralhrang nih mipi sual ngeilo pakhat an tlaih tiah thawng kan theih.Cu an tlaih mi cu tlawmpal a rauh deuh hnu ah, SAC ralhrang nih tangkaa ting 10 in rak hram uh law, nan rak hlam khawh lo ah cun kan thah lai tiah an ti hna i, An hlam khawh lo caah taksapur in an thah tiah thawng kan theih.

Relchap, CNF Pehtlaihnak Office Onnak An Tuah, Chin National Front (CNF) Pehtlaihnak Office cu nihin August 13 ah, Chin National Army hmunpi ah onnak an tuah, CNF Upa rianngeitu hna le Department kip in rianngei dihlak nih an tel pi hna pin ah CNF/CNA he hawikom simi hna upa cheukhat zong nih an telpi hna i rawl dum ținak zong an ngei hna.

Office onnak program cu zaanlei slm 4:00 in an thawk i CNF Assistant General Secretary-3 Pu HC Ral Hnin ( Pehtlaihnak Office Lutlai) nih biatawi chimnak a ngeih hnu ah United Chin Christian Fellowship (UCCF) Pastor Tluang Hre nih Pathian sin pekchanhnak le thlacamnak a ngeih. Euro Burma Office (EBO) Director Pi Chin Chin Pek Thang nih Ribbon tannak a ngeih.

UN High Commissioner for Human Rights, Michelle Bachelet Cu Rohingya Ralzam Sin A Tlawng Lai!, UN High Commissioner for Human Rights, Michelle Bachelet cu a ra lai mi zarh, zarhpi ni in cawn nihnih ni tiang Bangladesh Rohingya ralzam umnak ah a tlawng lai tiah theih a si.

Bangladesh khuapi Dhaka a um lio ah Prime Minister Sheikh Hasina he zong tonnak an ngei lai i, Michelle Bachelet cu a bik in Rohingya ralzam nuaikhat(1 million) reng lo an umnak camp zong a phan lai, tiah theih a si.

UN High Commissioner for Human Rights Michelle Bachelet cu Cox Bazaar zong ah a kal lai i Rohingya ralzam hna le cozah lei hruaitu siloin Ralzam hruaitu hna he tonnak an ngei lai, tiah a khualtlawnnak kong cathanhmi ah an langhter chih.

Rakhine ram ah Rohingya miphun hna nih namnehnak an ton ruang ah ralzam dirhmun in Bangladesh ram ah an zamnak caan cu tuthla hi kum 5 a tlin camtuak a si caah UN High Commissioner for Human Rights Michelle Bachelet nih atu bantuk in tlawn a timh hna cu aa tong thiam ngai.

Political Party Nih Ramdang Bu Pakhat khat He Ton Nan Duh Ahcun Nawl Halnak Nan Tuah Lai – UEC, Political Party hna nih ramdang bu pakhat khat asiloah ramdang mi pakhat khat he ton nan duh ahcun SAC kuttang Union Election Commission(UEC) sin ah a hlankan in tonnak nawl nan hal hmasa lai, tiah August 11 ah theihternak an tuah.

SNLD party chungṭuan Sai Leik nih, “Atu bantuk in UEC nih ri a kan chiah piakmi hi ralkap cozah nih amah duh ning tein thil a tuah bantuk a si. Upadi ri lonh in thil an tuah,” tiah lehrulhnak a tuah.

Ram khat le ramkhat Ambassador ton ding kong siseh, ramkip pehtlaihnak ah siseh, Democracy kong ah siseh, khat le khat minung zawnruahnak lei kong tonnak zong ah siseh, political party nih cun tonnak nawl a ngeihmi a si, tiah a chim chap.

Political party kong upadi section 407(c) le 408 ning in ramdang cozah, biaknak, bu le pumpak sin in hmuhmi phaisa hman khawh lonak ding upadi cu kan kilven ding a si. Cucu political party nih an zulh lo ahcun hnon an si lai, tiah an langhter. 2020 ram pumpi thimnak a phi chuak ah Myanmar hrambunh embassy, ramkip bu(INGO) le ramchung um bu kip(CSO) hna an i thlak tuk caah atu bantuk in ram a buai hi a si, tiah UEC nih cun an langhter.

Kanpetlet Peng, Kyatwee Ah Kahdohnak A Chuak i, SAC ralkap 1 a Thi: Chin ramkulh, Kanpalet peng, Kyatwee (ကျင်ဒွေး) khua ah umhmun a khuarmi SAC ralkap le SAC kuttang um, Phyosawhti hna cu, nizaan August 12 zinglei sml 6 hrawng ah CDF Kanpalet nih an kahdoh hna, tiah theih a si.

Cu kahdohnak ah cun, SAC ralkap 1 a thi i, hliamtuarmi zong an um, tiah CDF Kanpalet in tuanvo ngeitu pakhat nih a chim. CDF Kanpalet nih kan kahdoh hna lio ah kan kuan a dih caah hnu kan tolh kho, tiah a chim chap.

Kalay Peng Thlanglei Kahdohnak Ah SAC Ralkap 3 An thi, Tam Ngai Hliamhma An Pu, SAC ralkap pawl cu Kywinchaung le Anohsanthar(ကျွန်းချောင်းနှင့်အနောက်စံသာ) khua in thlanglei ah rallam an sial i, ni nganak ah Chaungkhuah khua pawng an phan. August 12 zing sml 11 hrawng in Kalay PDF le ṭangrual phu hna nih kan kah hna, tiah Kalay PDF nih cathanh an chuah. Cu kahdohnak ah cun Kalay PDF Battalion 1, 2, 5, 6, 7, Pa Kah Pha le CNDF hna i bawm in August 11 zanlei sml 5:00 tiang an kah hna, tiah theih a si.

Kahdohnak ah SAC ralkap 3 an thi i, Kalay PDF bomb ralkap nih bomb an puahhnawh hna caah ralkap tam ngai hliamhma an pu kho, tiah Kalay PDF nih an langhter. Cu zanlei ah SAC ralkap pawl cu, Chaungkhuah khua ah an lut i, inn an khangh caah inn 12 a ciam. August 12 zinglei ah Chuangkhuah in Kalay peng thlanglei ah an lan, tiah theih a si.

Kalay peng thlanglei Tharyarkung khua ah a ummi le Kalay GTI ah umhmun khuarmi SAC ralkap 150 hrawng cu, August 8 ah Kywinchaung le Anohsanthar khua kar ah Kalay PDF Battalion 3, 6, 8, 12 le CNF- KKG nih kan kah hna caah SAC ralkap 4 an thi kho, kanmah lei in a thimi le aa hliammi kan um lo, tiah Kalay PDF nih cathanh an chuah.

Kachin Ramkulh le Mandalay Ramṭhen In Palik Nih Ks 6.63 Billion Man Rithaisi An Tlaih! Kachin ramkulh, Mohngyin(မိုးညှင်း) peng le Mandalay ramṭhen, Thazi(သာစည်) peng ah, a luancia August 9 le 10 lio ahkhan rithaisi tam ngai kan tlaih, tiah palik nih an thanh.

August 9 zaanlei sml 5:30 hrawng ah Mohngyin peng, Namseeawng(နန့်စီးအောင်) check gate ah Mandalay in Mohngyin(မိုးညှင်း) lei ah a kal mi, Aung Shwe Oo (အောင်ရွှေဦး) motor, FOTON 6 cu palik nih an check i, Kyats. 3 billion(nuai thong thum) man rithaisi cu kan tlaih, tiah palik nih an thanh.

Cu bantuk ṭhiam in a luancia August 10 lio zinglei sml 7 hrawng ah Mandalay ramṭhen, Thazi peng, Kywekya((ကျွဲကျ) khua, Kywekya hlei pawng ah rithaisi dohtu phu nih cycle 3 in khualtlawngmi 3 cu an check hna i, songkhoi chung ah rithaisi Ks. 3.63 Billion man ritthaisi kan tlaih, tiah an thanh. Ritsi ngeitu kan tlaihmi hna cu a herh ning in dantatnak kan pek hna lai, tiah nawlngeitu palik nih an chim.

Sagaing Ramṭhen, Taze Peng Nihnih Chung Kahdohnak Ah SAC Ralkap 10 Leng An Thi, Sagaing Ramṭhen, Taze peng nihnih chung kahdohnak ah SAC ralkap 10 hrawng an thi, tiah nihin August ni 13 ah Myanmar Defense Force (MDF) nih cathanh an chuah. August ni 8 thawk in SAC ralkap nih Helicopter 3 in ralkap 100 hrawng cu Zuange(ရွာငယ်) khua ah an rak chiah hna hnu in Tawcin (တောဂျင်) khua le Zuamonetaung (ရွာမုံတောင်) khua ah rallam an rak sial, tiah theih a si.

Zuamonetaung khua ah inn 8 an khangh i, khua an rak chuah lio ah Taze battalion 6 nih an kahdoh hna caah SAC ralkap tamlakte an thi, tiah an langhter. Cu bantuk ṭhiam in August ni 10 zinglei Wine (ဝိုင်း) khua in rallam a rak sialtu SAC ralkap pawl cu MDF battalion 26 le Taze battalion 6 i bawm in an kah hna, tiah theih a si. Cu kahdohnak cu minutes 40 tluk hrawng a rau i, SAC ralkap 10 leng an thi, hliamtuar zong an tam, tiah Myanmar Defense Force nih cathanh an chuah. Nihnih chung kahdohnak ah MDF le Taze PDF lei hliamtuar um loin hnu an tolh, tiah theih a si.

Hproso Peng Kahdohnak Ah SAC Ralkap 2 An Thi, PDF 1 A Nunnak A Liam ve: Karenni ramkulh, Hproso peng Sularku khua ah SAC ralkap 200 hrawng cu rallam hmun thum ah an sial i, PDF, KA, KNDF Central Special Operations, Battalion 1101, Demoso PDF, Battalion 1107, Mobye PDF, KRU le KGZ ṭangṭi phu hna he August 9 in 12 tiang kahdohnak a chuak, tiah Loikaw PDF nih cathanh an chuah.

Nili chung kahdohnak ah SAC ralkap 2 an thi i, Loikaw PDF in kum 19 ralkap pa pakhat a nunnak a liam ve. Central Special Operations sniper phu nih Sularku kahdohnak ah SAC ralkap 11 an rak thah hna, tiah theih a si. Cu kahdohnak ah cun PDF ralkap 2 hliamhma an pu i, a dang a thimi le aa hliammi an um le um lo kan fehter kho rih lo, tiah an langhter.

SAC Le AA KAdohnak Ah SAC Ralkap 4 An Thi I, Khuami 2 An Nunnak A Liam! Rakhine ramkulh, Yathetaung (ရသေ့တောင်) peng, Chingkhali le Donepaih(ချိန်ခါလီနှင့် ဒုံးပိတ်) khua karah nihin August 13 zing sml 8:00 hrawng ah SAC ralkap le Arakan Army(AA) kahdohnak a chuak. Cu kahdohnak ah cun AA nih SAC ralkap 4 nak tlawm lo an thah hna i, hriamnam tam ngai an chuh hna, tiah theih a si.

“Kahdohnak cu sml 2 chung hrawng a rau. SAC ralkap cu 30 leng an si lai. Cu chung ah SAC ralkap 4 an thi i, hliamhma pumi an tam. An hriamnam tam ngai kan chuh hna,” tiah AA nih an langhter. Cu kahdohnak ah cun tualchung mi, caw cawngtu pa pahnih cu hliam an pu i, an nunnak a liam, tiah Aung Saih khuami nu pakhat nih a chim. “Caw cawngtu pa pahnih cu SAC ralkap nih an kah thah hna. Cun, Kahdohnak a chuahnak hmun lei ah vanlawng pakhat a zuang,” tiah a chim chap.

Rakhine ram ah nifatin ti awk in SAC ralkap le AA karah kahdohnak a chuak, tiah August 11 i thawng fianternak tuah lio ah AA chimphuannak nawlngeitu Khine Tuh Kha nih a chim. A luancia July 19 ahkhan Maungtaw peng kahdohnak ah SAC ralkap 16 an rak thi i, ramri hngak palik 14 tlaih an rak tong.

Video zohnak-