PDF Sakhan Pakhat SAC Raltuknak Vanlawng Bomb Thlaknak In PDF 3 An Nunnak Liam; 4 Hlaim An Tuar
=========
Mon ramkulh Yee peng, Than-pyu-zayat khua pawng um Kyir-phyo (ကြားဖြူ) PDF sakhan pakhat cu SAC ralhrang vanlawng nih Bomb a thlak caah PDF minung 3 an nunnak a liam i 4 hliam an tuar tiah kan theih.
May 7 zan suimilam 11 tluk ah 500 lb a rit Bomb 2 le May 8 chun suimilam 12 ah a voi hnih nak Mi-35 in a thlak hna caah PDF nu ralkap Khin Tandar Swe telh in minung 3 an nunnak a liam i 4 hliam an tuar hi a si. Kyir-phyo PDF cu KNLA Brigade 6 tangah um in a cawlcang mi an si i April 25 Than-pyu-zayat peng SAC ralhrang he kahdohnak ah ralhrang 8 an thi i 7 hliam an rak tuar tiah kan theih.
Kalaymyo Peng Ah SAC Ralhrang Nih Raltuknak Helicopter In Bomb A Thlak; Sagaing ramṭhen, Kalaymoy peng, Layeinsu (လေးအိမ်စု) khua pawng ah SAC ralhrang nih May 9, zanlei suimilam 3:30 hrawng ah raltuknak helicopter in bomb 3 a thlak, tiah theih a si.
Tualchungmi pakhat nih “Raltuknak helicopter pakhat niamte in a rak zuang i, Shartaw (ရှားတော) khua lei voi 2 tiang aa hel. Cu hnu ah a voi 2 naak a rak zuang ṭhan i, Layeinsu khua nichuah lei Lo ah bomb lung 3 a thlak, hliam a tuarmi le thilri rawkmi kong ah zeihmanh kan thei rih lo” tiah a chim.
Mipi Ralhrial Hna He I Ton Ding In A Kalmi Ramdang Palai Hna (ASEAN Ambassador) Motor Kahdoh A Tong; Shan ramkulh ah mipi ralhrial hna he i ton ding ah a kalmi ramdang nih an thlahmi palai hna (ASEAN Ambassador) motor cu Hsihseng (ဆီဆိုင်) peng chung ah kahdoh a tong, tiah theih a si.
Shan ramkulh, Taunggyi khuapi in Hsihseng peng, Ye-phyu (ရေဖြူ) khua um ralhrial hna va ton ding ah a kalmi Indonesia le Singapore palai (ASEAN Ambassador) hna cu May 7 ah Hsihseng peng, Nan-Oh (နန့်အော) khua in meters 200 hrawng a hlatnak hmun ah kahdohnak an ton hi a si, tiah BBC nih a langhter. Cu kahdohnak cu caan tlawmpal chung a rau i, hliamhma an tuar hrawlo nain an motor tu cu tlawmpal aa rawk, tiah theih a si.
Hi kong he pehtlai in SAC ralhrang le amah lei ṭangmi hna thangthanhnak nih cun tlangcung hriamtlai le mipi hriamtlai phu hna nih an kahdohmi a si, tiah an langhter ve.
Atu bantuk in kahdohnak an tonmi kong ah Indonesia ram nih faakpi in a dohnak kong thawngthanhnak a tuah pin ah Myanmar ram he pehtlai in cabuai cung tonpumhnak hmun ah ceihhmai ding in ASEAN Alternate lutlai, Indonesia President nih a chim.
Kahdohnak an tonnak hmun cu Nan-Oh (နန့်အော) khua in meters 200 hrawng a hlatnak hmun ah a si i, SAC ralhrang kuttang PNO, Pyitusit le SAC ralhrang hna humhaknak hmun zong a si. Mipi hriamtlai phu hna an umnak Karenni (Kaya) ramri in meng 58 tluk a hlatnak hmun a si. Tualchung thawnglatu hna nih “Ramdang palai (ASEAN Ambassador) hna le khua chuahtak in ralhrial mipi hna i tonnak ding cu SAC ralhrang nih duhlonak kong” an langhter. Credite; Lungmili Post