Thawngpang Chia Fonh, Sagaing Peng In Ni 5 Chungah PDF 31 Le Tualchung Mi 5; An Dihlak Minung 36 Thah An Tong!
==================
Sagaing ramṭhen, Sagaing peng ah rallam a sialtu SAC ralkap nih June 25 – 29 tiang ah PDF telh in tualchung mi 36 an thah hna, tiah tualchung mi hna nih an chim. SAC ralkap nih hin PDF chungtel 31 le tualchung mi 5 an thah hna, tiah theih a si.
June 29, zinglei ah Sagaing peng, Samon khua cu SAC ralkap 50 leng nih hriamngan le hriamhme kah buin an luhhnawh i hriamngan hliamhnak in tualchung mi 2 an nunnak a liam pinah khuami 2 hliamhma an tuar, tiah khuami pakhat nih a chim.
June 28, zinglei ah Sagaing peng, Sintgaing khua pawng ah SAC ralkap le tualchung hriamtlai phu kar kahdohnak a chuak. Cu kahdohnak ah cun PDF 14 mei khangh in an thah hna pinah meithal zun 12 an laak, tiah tualchung hriamtlai phu chungtel pakhat nih a chim.
June 25, zinglei zong ah SAC ralkap thazaang 50 hrawng nih Kintaw khua pawng ah PDF nih caan karlak umhmun an khuarnak sakhan cu an luhhnawh hna i PDF 17 an thah hna, tiah Sagaing peng PDF lutlai pakhat nih a chim.
Cu hnu ah Kintaw khua mi Ko Myint Kyaw Tu(kum 37), U Maung San(kum 50) le Myinsi khua mi U Pauk Sa(kum 69) cu SAC ralkap nih an thah hna, tiah tualchung mi nih an chim.
Sagaing ramṭhen, Sagaing peng, Sinkaing Talaing khua lei ah rallam a sialmi SAC ralkap hna kap ding in a kalmi PDF cu SAC lei tu nih an kah hna i, PDF chungtel 14 nunnak a liam, tiah Sagaing pengkomh Battalion 3 in ṭuanvo ngeitu pakhat nih a chim.
June 28 ah Minkwin lei kap in rallam a sialmi SAC ralkap pawl cu Okpho khua ah an kal i, Sinkaing Talaing khua lei ah rallam sial ding in an kal caah Sagaing pengkomh PDF Battalion 3 le 1 hna i bawm in an kalhnawh hna lio ah SAC ralkap nih an kah hna i PDF ralkap 14 nunnak a liam pinah an meithal le kuan zong an chuh hna, tiah theih a si.
Nunnak a liammi hna cu Sagaing pengkomh PDF Battalion 3 in Deputy Battalion Commander A Ze, Company Commander Lin Yawng, Commander in chief Toe Kyi le ralkap 6, Sagaing pengkomh Battalion 1 in ralkap 5 an si, tiah theih a si.
SAC ralkap pawl cu Sagaing peng, Htangyi khua an phan i Kyawngphyu khua le Talaing khua kar zong ah phu khat an um, tiah Khit Thit Media nih a ṭial.
Mon ramkulh, Yangon-Myawaddy lam cung Thatone le Bilin peng karlak um, Shweyawngpyia khua pawng Kyun-aih hlei cu nihin June 29 zinglei 4:30 ah bomb in an puahhnawh i a cat, motor pathum zong a rawh pinah hliamhma pumi zong an um, tiah Khit Thit Media nih a ṭial.
Tualchung mi pakhat nih cun, “Tuzing suinilam 4:30 ah hlei hi bomb in an puah. Motor pahnih zong hlei nih a cahpi chih hna i, motor pakhat belte cu a tla lo nain a rawk ve. Bomb a puah hnu tlawmpal ah mi mizaw phorhnak motor in ralkap an ra. Hlei cu a rawh dih caah kal khawh a si ti lo. Khatlei kam lawng in kal khawh a si,” tiah Khit Thit Media ah a chim.
SAC ralkap le palik nih hlei a cahnak hmun ah humhimnak an lak i motor cheukhat cu an lanhter hna. Bomb nih a puahmi hlei hi Yangon-Mawlanyaing-Myawaddy lam kalnak ah a biapi ngaingai mi a si. Thil phor motor ngan hna cu kal khawh a si lo, tiah motor khaltu pakhat nih a chim.
SAC ralkap nih Yangon-Mawlanyaing-Myawaddy lamthluan cu rallam an sialnak le ralvennak ah an hman ngaimi a si leng ah riahcaw, hriamnam le thazaang chapnak ah biapi in an hmanmi lam a si. Hi hlei bomb puahnak kong he pehtlai in zei bantuk phu nih an tuah mi a si ti cu kan thawnglaknak nih an ṭial lo.