Zualko: Ram Le Miphun Caah Mipi Ralkap 3 Nunnak An Liam!

SAC Ralhrang Vanlawng Kahnak ruang ah PDF Ralkap 3 Nunnak Liam
————
Nihin December 25 ah a cangmi Kayin ramkulh, Lay Kay Kaw kahdohnak ah SAC ralhrang nih Fighter vanlawng in an kah hna caah PDF ralkap 3 an nunnak a liam. A nunnak a liammi hna cu Ko Maing, Ko Ye Htet le Ko Cung Du an si.

Natchaung khua ah ralhraang nih khuami minung pahra nak tlawm lo an thah hna. Sagaing ramthen, Kalay peng, Natchaung khua cu Council ralhraang nih december 23 ah raltuknak vanlawng in an kah hnu in khua chung ah ralhraang pawl an lut i inn an khangh, thilri an hrawh dih pin ah khuami minung pahra nak tlawm lo an thah hna tiah tualchung mi chimnak in kan theih.

Ralhraang pawl nih an kahthah mi hna khuami ruak cu Kalay PDF nih an laak hna. Ralhraang pawl he kaphnih kahdohnak a chuah ca ah a thi mi hna le a thi mi zat kan hngal kho rih lo tiah LDF-Kalay nih an thanh. Natchaung khua cu inn 2000 leng an si. Atu cu an khua ning in an zaam dih i ralhraang pawl khua pawngkam ah an i chawklet tiah tualchung mi pakhat nih a chim.

Hpruso khua ah ralhraang nih tlaih mi khuami minung 30 nak tlawm lo mei in an khangh hna. Kayah ramkulh, Hpruso peng chung, Moso khua pawng kahdohnak a chuah hnu ah khuami minung 30 hrawng ralhraang nih an tlaih hna i mei in an khangh hna tiah KNDF nawlngeitu pakhat nih a chim.

“Khuami minung 30 hrawng cu motor cung ah an khangh hna. Mei khangh mi hna hi kan thleidang kho ti hna lo. Tlaih a tong mi chungkhar nih an theih khawh lawng ah si kho hnga. Kannih i kan fahter khawh mi cu motor cung ah an khangh hna ti lawng hi a si” tiah KNDF nawlngeitu pakhat nih Kantarawaddy Times ah a chim.

Khangh a tong mi hna hi motor pathum le Hpruso khuami kum tling rih lo hngakchia telh in minung 30 nak tlawm lo an si. Tlaih mi khuami hna thlah ding in a va chimchawntu ramri hngak BGF ralkap 4 zong an hnulei kuttem buin an thah hna. Credit: The Hakha Post

Kachin Defense Army (KDA) hruaitu Mahtu Naw cu tuni zinglei suimilam 11:30 ah a nunnak a liam. Lephiat zawtnak hrai in kum sau ngai a zaw cangmi si. Shan ramkulh chaklei um Lasho khuapi ah a ummi an inn ah a um hnu ah Kawnghka khuapi thar a inn ah an thial i, a cawng khoh in nihin ni ah a biami a pa inn ah a din cang, tiah an tarlangh.

Kachin Defense Army (KDA) hruaitu Mahtu Naw nih a hruaimi hriamtlai phu hi Shan ramkulh chaklei Kawnghka peng chungah Headquarters an i chiahmi an si hna. Mahtu Naw hi nihin ni a thi tiangah kum 78 a si cang, tiah thawngpang theih a si.

Shan ramkulh chaklei um Kachin Independency Army Tatmaha 4 ah rian a tuan lio ah KIA ralkap pawl cheukhat in an chuakpi hna i, Kachin Defense Army cu 1991 ah an rak dirpi hna, tiah theihmi a si. Cu hnu ah ralhrang phu he zungzal daihnak min an thut hna hnu a Kawnghka an um cangmi an si, tiah thawng kan theih.

Kachin Defense Army cu 2020 Kum hnu ahcun ralkap kut tangah mipi ralkap in an rak dir ti than, tiah thawngpang kan theih a si. Kachin hriamtlai phu zong hi an rak buai ve i, pakhat le khat theihthiam lo ruangah le hruaitu si duh ruangah an rak i thencheu hi a si, tiah theih a si.

Gangaw peng ah ralhraang nih inn 30 ciam dih in an duah, khuami ca eidin le hrukaih bawmh an herh. Magwe ramthen, Gangaw peng, Sanmyo khua cu December 21 ah ralhraang 100 hrawng le Pyo Saw Htee 50 hrawng nih an luhhnawh hna i khuami inn 30 ciam dih lak in an duah. Eidin le hrukaih thilri bawmhchanhnak kan herh tiah tualchung mi nih Yangon Khit Thit Media ah an chim.

“Ralhraang nih khuami inn 30 ciam dihlak in an duah. Zeihmanh kan la manh lo. A dihlak in a ciam dih. Eidin tirawl le hrukaih thilri kan herh. Ralhraang pawl khuachung ah an lut ti kan theih in kan i hrukaih mi thil he lawng kan zaam i inn i kan zaam taak mi cu a ciam dih. A rannak in bawmh kan herh ko,” tiah khuami pakhat nih a chim.

YDF-Kyaw nih ralhraang motor bomb an puah hna i 30 leng an thi; December 22 zaanlei suimilaam 2:34 ah Kyaw le Gangaw kar Pungngia chuktum zawn ah ralhraang motor tlar 24 hna cu YDF-Kyaw Battalion No, 12 nih bomb voi riat le kutser launcher in voi li an kah hna i ralhraang 30 leng an thi lai tiah zumh a si. YDF-Kyaw Battalion No. 12 chung in hliamtuar kan um lo tiah YDF-Kyaw nih an thanh.

Myaing ah Council ralhraang pawl bomb puah an tong i 23 an thi. Magwe ramthen, Myaing peng ah Council ralhraang pawl cu Myaing PDF le Pouk peng in တိမ်လွှာ phu nih bomb in an puah hna i ralhraang 23 an thi tiah Myaing PDF nih an thanh.

December 21 ah Pouk- Myaing ramri ah kahdohnak a chuak i Kanpyu lam ah bomb kan puah hna ca ah ralhraang 5 an thi. Pouk-Zepya lam in a ra mi ralhraang motorcyle panga le motor pakhat in minung panga an thi. Motorcycle panga le kuan zeimaw zat kan lak tiah an thanh.

Yuasin lam ah ralhraang 100 hrawng cu bomb in an puah hna i pathum an thi, hliam tuar tampi an um tiah kan theih. Zaanlei sang ah, zing i bomb kan puahnak Zepya lam cung ah bomb a taang mi pawl a fimhlawm lio mi ralhraang hna cu bomb in kan puah than hna i Officer tel in pahra hrawng an thi. Officer pa nih bomb cu khuaruahhar in a zoh lio ah an puah hi a si tiah kan theih. Credit: The Hakha Post

Nay Pyi Taw ah ralhraang pawl bomb puah an tong i 12 an thi. Nay Pyi Taw Pyinmana peng chung ah ralhraang motor pahnih cu bomb an puah hna i ralhraang 12 an thi tiah Nay Pyi Taw PDF nih an thanh.

December 20, zing suimilaam 11:00 hrawng ah Nay Pyi Taw Pyinmana peng, Pyihtaungko khuate komh le Lathpattaung khua pawng ah Nay Pyi Taw PDF nih phu hnih ah i then in kan bawh hna i ralhraang motor pahnih cu bomb paruk in kan puah hna ca ah ralhraang 12 an thi tiah an chim.

Cu bomb puahnak ah cun, ralhraang 12 nih an i cit mi motor pakhat cu cheng ah a tla i aa cit mi an zapi in an thi. Motor pakhat ah minung 5 hma pu an um. Nay Pyi Taw PDF lei hliam tuar um lo tein hnu kan pil kho than tiah an thanh chih.

Monekoe kahdohnak ah ralhraang lei a thi mi le hliam tuar 100 hrawng an um i hriamnam zong tampi an lak. Shan ramkulh, Monekoe um MNDAA sakhaan hna cu ralhraang nih hriamngan le raltuknak vanlawng hmang in atu le atu a kah tiah The Kokang thawngzamh nih a tial.

Cu ti thazaang tampi hmang in kahdohnak a tuah nain a hmun taktak ahcun ralhraang lei a thi mi le hliam tuar 100 hrawng an um. Hriamnam zong tampi an lak tiah The Kokang thawngzamh nih a thanh.

KNLA le Ralhrang kar nizaan ah kahdohnak voi 2 a chuak, ralhrang lei in minung 9 an thi. KNU brigade 5 hmunhma Phapun Mutaw pengkulh chungah nizaan December 20 ah ralhrang phu hna le KNLA kar kahdohnak voi 2 a chuak, cu kahdohnak ah cun ralhrang phu lei in minung 9 an thi i minung 4 nih hliamhma an tuar tiah Mutaw thawngzamhnak nih cathanh a chuah.

Nizaan zinglei suimilam 9:40 ah Thibaaye khua ah kahdohnak voi 1 a chuak i, cu kahdohnak ah cun ralhrang minung 3 an thi minung 2 nih hliamhma an tuar. Cun zinglei suimilam 10:10 ah Tamiloe khua ah kahdohnak voi 1 a chuak than. Cu kahdohnak ah cun ralhrang phu minung 6 an thi i minung 2 nih hliamhma an tuar. Ralhrang phu le KNLA kar kahdohnak ah KNLA lei a thi le hliamtuar um lo in hnu an tolh kho tiah theih a si.

A tu lio Kayin ramkulh chungah ralhrang phu hna le KNLA, PDF phufonh kar kahdohnak a fak kho a si caah mizapi nih ralrinnak ngeihcio ding in KNU Mutraw thawngzamhnak nih a langhter.

Kalaymyo ah PDF le ralhrang kar kahdohnak a chuak, ralhrang lei minung 5 an thi. Sagaing ramthen Kalay peng nitlak chaklei ah Kalay-PDF battalion 5 le ralhrang phu kar December 20 ah kahdohnak a chuak, ralhrang phu lei in minung 5 an thi tiah khuachung thawngzamhnak nih a langhter.

Cu kahdohnak cu Kalay-PDF battalion 5 cun battalion 6 nih an bawmh hna i battalion 6 in minung pakhat a nunnak a liam. Ralhrang phu hna nih Kalay-Gangaw, Kalay-Tedim tlanghrawn ah rallam sial ding in timhtuahnak an ngei tiah theih a si. Cun nihin December 21, ni ah Sisan khua cu ralhrang phu hna nih luhhnawh in khuachung ning ti ngawt in mei khangh in an hrawh tiah khuachung mizapi hna nih an chim. Credit: The Hakha Post, The Chin Post, Khit Thit Media