Zualko; Mizoram ah a Zaammi kan Pitar COVID-19 Zawtnak in a Nunnak a Liam!

Mizoram ah a Zaammi kan Pitar COVID-19 Zawtnak in a Nunnak a Liam
———
Thantlang peng, Tlangpi khua in Mizoram, Farkawn ah a zaammi Pi Tial Hnem (kum 81) cu October 4, zaanlei sml. 6:10 ah COVID-19 zawtnak in Farkawn COVID-19 mizaw zohkhenhnak hmun (4C) ah a nunnak a liam.

Pi Tial Hnem hi September 27 ah khan COVID-19 zawtnak a ngei tiah an hmuh i mizaw zohkhenhnak hmun ah an thlopbulmi a si, tiah Mizoram acozah thawngthanhnak DIRP nih a langhter.

CDF-Senthang sin ah SAC Ralkap 5 Meithal Pahnih he an i Fonh. Nihin (Oct. 4) ah SAC ralhrang bu no. 222 in ralkap panga cu CDF-Senthang sin ah an meithal pahnih he an rak i fonh, tiah CDF-Senthang nih cathanh an chuah.

“Ralhraim he a rak i fonhmi pawl cu himnak hmun ah kuat an si cang. Atu bantuk in an rak i fonhmi cung ah CDF-Senthang, CDF-Zophei le CDF-Thantlang nih lunglawmhnak nganpi kan ngei,” tiah cathanh ah an langhter.

Hakha: Zarh Khat Fai ah Minung 90 Dengmang Tlaih an Tong, 45 an Luat Than. September 26 in October 3 tiang, ni 8 chungte ah Hakha khua ah minung 87 tlaihkhih an tong i, cu chung ah cun minung 45 lawng an luat rih, tiah ttuanvo ngeitu upate sin in thawngpang kan theih.

Tlaih a tongmi pawl an luat tthan nakhnga a tawlreltu pastor pakhat nih, “Cheukhat cu pastorte tawlrelnak in a luatmi an um bang in tawlrelpi hau loin a luatmi zong an um ve. Tangka in tlanhter i a luatmi hi zatuak in 10%-15 % karlak hrawng an um ve,” tiah a chim.

Hakha SAC ralhrang lei nih, “Zaanlei sml. 1:00 hnu in aa chawkmi mino hi cu kan zum hna lo. September 28 ah anmah nih bomb in a kan cheh hmasa ruang ah checknak le tlaihkhihnak kan tuah hi a si,” tiah pastorte sin ah an chim.
“Tlaih a tongmi hna kong ah kanmah nih zeihmanh kan tuah khawhmi a um lo. Anmahte in Referee an ttuan.

An mah nih a si an timi cu kanmah nih zeihmanh kan el kho ti hna lo. Kannih cu mipi him deuhnak ca ah le ralhriam ngan luan tuk in an hman lo nakhnga mizapi aiawh in kan chawnhbiak hna hi a si ko,” tiah a cunglei pastor nih The Chin Journal ah a chim.

Vuangtu SAC Ralhrang Sakhaan CNA le CDF-Zophei nih an Hrawh Lio. September 30 ah SAC ralhrang pawl nih an zaamtakmi Vuangtu khua i an sakhaan cu CNA le CDF-Zophei nih an hrawh cang. “Hi sakhaan ah hin SAC ralhrang 12 an rak um. Kah ding in timhtuahnak kan ngeih lio ah an tliktak hi a si.

Sakhan ah an hmanh takmi Bomb 8 kan lak khawh i a kiangkap ah Bomb hmanhmi a um rih khawh caah kan kawl cuahmah lio a si,” tiah CDF-Zophei nih an langhter. Sakhaan ah a rak ummi SAC ralhrang pawl cu September 30 ah helicopter in an lak dih hna.

Bungtla Electric Sehzung Bomb in an Puah. Matupi peng SAC ralhrang nih an hman bikmi Bungtla Electric sehzung cu nihin chun ah CDF nih bomb in an puah, tiah thawng kan theih. Bungtla Electric sehzung hi January 2006 ah an rak sermi a si i, Matupi hrambunh SAC ralhrang bu no. 140 nih abikin an hmanmi a si.

Khuami pakhat nih, “Nihin chun ah khan bomb in an puah hnawh. Matupi ralkap pawl zong bomb puahnak hmun lei ah an kal. Cun, District zung tang ah hmun a khuarmi ralkap nih a langtlang in bomb zong an kah len,” tiah a chim.

Rakhine ramkulh le Chin ramkulh runvennak ttuanvo a latu SAC ralhrang bu Western Command Center hi Rakhine ramkulh, Ann khua ah a um i, Bungtla Electric sehzung le Ann peng ah a ummi Electric sehzung pakhat hi anmah kuttang ralkap bu pawl nih an hman bikmi an si. Credit: The Chin Journal