Zualko; Laimi Biaknak Lei Kan Pa Rev. Dr. Bernard Luai Hre a Nunnak a Liam

Laimi Biaknak Lei Kan Pa Rev. Dr. Bernard Luai Hre a Nunnak a Liam
———-
Kalaymyo ah a ummi Laimi biaknak lei kan pa pakhat a simi Rev. Dr. Bernard Luai Hre (kum 73) cu nihin zinglei sml. 12:45 ah Pathian ttangnem ah a din cang. Rev. Dr. Bernard Luai Hre hi Khualsim ca le Falam ca in NRSV Baibal a lettu zong a si.

Kalaymyo, Taungphilar ah a ummi Bethel Theological Seminary baibal sianginn ah sayagyi a rak ttuanmi le Lairawn Baptist Association ah General Secretary a rak ttuanmi biaknak lei kan pa pakhat a si. Rev. Dr. Bernard Luai Hre i a fapa Rev. Van Ceu Aung zong September 22 ah khan a nunnak a rak liam cang.

Kanpalet ah mipi minung 3 ralhrang nih an kahthah hna. Chin ramkulh, Kanpale peng he meng 3 hlatnak vanlawng ground tuahnak ding ah vawlei an cawhnak hmun ah mipi 3 cu ralhrang hna nih an kahthah hna tiah Irrawaddy nih a tial. Mah Khuami hna cu kahdohnak ruangah September 25 ni ah Chin ramkulh, Magwe ramri Saw hrawng A-Ngia-Ka-Tin khua ah ralzaam in a um mi hna an si.

Mah ralzaam umhmun ahcun mipi 9 cu Kanpalet um Ze-Luang-Pan khua lei ah thil va lak ding ah an kal lio ah mah kaa hmun ahhin ralhrang nih an hmuh hna i minung 3 cu an kahthah hna, kum 13 ngakchia tel in a dang poh cu an tlaih hna i an kal pi hna.

Kanpalet CDF chimnak nawlngeitu nih cun “an thah mi hna hi Pa 3 an si. Pakhat cu Kyouk Tuang khua in an si,a dang pakhat cu Pan Luang khua a si, anmah chungah 2 cu mino an si. A dang 1 hi cu kum 60 hrawng a si. A kum a upa ngai cang. An i cit mi saikel cu tiva rek chungah an tlak hna i mei in an kangh hna” tiah a chim.

September 23 ah Chin ramkulh lei cu Internet an phih hnu in Kanpalet ah kahdohnak voi 2 a um i ralhrang 10 reng lo an thi. “Vanlawng Ground ah hmunhma khuar mi ralhrang hna cu a thli tein kan kah hna. September 25 ah voikhat, 26 ah voikhat tiah kan kah hna.

Ralhrang lei in 10 reng lo an thi. Kanmah lei in hriamngan kuan nih a tlak hna i minung 2 an i hliam “tiah CDF phu chungtel pakhat nih a chim. Tu ahcun Chin ramkulh, Kanpalet ah ralzaam minung 200 reng lo um asi cang tiah Irrawaddy nih cun a tial.

Kani Peng Chung Ah Ralhrang Minung 16 An Zaam. Kani peng chungah September 13 ni ah ralhrang hna Tuang Tun Chuang Meng 40-45 ah ke tein in kal in hmunhma kan thianh tiah alut mi ralhrang minung 16 cu an zaam tiah hmunhma um mi mipi lei ralkap phu hna sin in theih asi.

“Kanmah he a luancia September 13 ni ah CDM a tuah mi ralhrang 2 an um. Hmunhma himnak caah le anmah an him sual lai lo tiah thawngthanhnak tuah lo in kan um.Atu cu anmah cu tlangcung mi hriamtlai hna sin in kan kuat cang hna .An mah tel in a zaam mi hi minung 16 an si cang tiah an chim. Anzapi in minung 3 tete i then in an zaam tiah an chim ” tiah Kani mipi vengtu ralkap hna hruaitu pakhat nih a chim.

Kani peng in a zaam i CDM atuah mi ralhrang 2 cu Phyo Wai Soe le Win Zaw Thu hna an si. A dang ralhrang hna cu Win Ko Ko, Nay Lin Tun, Hein Min, Thet Nawng Tun, Lat Tin Tawng, Saw Thu Wa, Yan Niang Thun, Thet Lin Aung (Karen), Kyaw Lin Oo, Aung Htey Kyaw(Sniper), Aung Kuang Myat hna 11 hi an si i a dang cu an min kan thei rih hna lo tiah an chim. Tu a zaam mi ralhrang hna cu Maw Leih Myo ummi ralhrang Khah- Mah – Yiah (365) in an si tiah Kani peng mipi vengtu ralkap hruiatu sin in theih a si.

Ralhrang le MNDAA kar ah kahdohnak ah ralhrang 3 an thi,6 an i hliam. Shan ramkulh chaklei Lasoe – Thein Ni lampi meng 11 le meng 12 kar ah September 26 zing Suimilam 9:30 in 10:15 tiang ralhrang le MNDAA kar ah kahdohnak a um i ralhrang 3 an thi, 6 an i hliam tiah theih asi.

Nizaan zing suimilam 3:40 zong ah mah hmunhma hrawng ahcun caan tawi te kahdohnak a um i Kokanh MNDAA lei in a hliam mi an um lo tiah Kokanh thawngthanhnak in kan theih. September 25 le 26 ni ah a biapi mi hmun 1, Mu kuu pengkomh um ralhrang hna le MNDAA phu hna he an i kap tiah The Kokang thawngthanhnak cahmai ah an tial.

Riahcaw a phormi motor cu ralhrang phu nih minung thazaang tampi in an runven. Kachin ramkulh, Phakanh peng Lawa khua pawng um mi KhunSaiYan khua ah riahcaw phor mi motor cu runven dingah ralhrang phu minung tampi nih umhmun an khuar tiah theih a si.

Umhmun khuarmi ralhrang phu hna nih Tanaing ah riahcaw an cah caah riahcaw phor tu motor cu an runven nak hi a si tiah KhunSaiYan khua ummi pakhat nih a chim. “Zinglei ah ralhrang motor 40 leng riahcaw phormi cu kan hmuh, Tanaing battalion lei ah riahcaw an ngeih ti lo caah KhunSaiYan lei ah security an lak hi a si, cu hlan nak in minung tampi nih security lak in riahcaw cu motor in an phorh hi a si, an pawngkam ah ralhrang tampi nih hmunhma an lak cang” tiah a chim.

“Khuami hna nih an kan hrial, zeiruang ah a si cu kan hngal lo tiah an chim. Ralhrang phu hna nih nizaan ah lo riantuan nak in a tlung mi khuami pafa hna cu an tlaih hna hnu ah nihin zinglei ah an inn ah thlah than an si cang.

Phakanh peng, KhunSaiYan khua ah September 25 ni ah ralhrang phu ruangah, khuami tam deuh cu Lawa khua ah an zaam,atang mi hna zong a rannak in umnak thial ding ah KIA nih thawng an thanh hna tiah theih a si. Tanaing khua in ralhrang phu hna hriam le riahcaw phor mi motor cu KIA nih an motor meikhangh piak le dohnak cu a tu le tu an tuah.