Myingyan Peng Kahdohnak PDF Ralkap 5 An Nunnak Liam!
================
Mandalay ramṭhen, Myingyan peng, Yunghtu khua thlanhmun pawng ah SAC ralkap le PDF kar kahdohnak a chuak i PDF ralkap 5 an thi, 1 hliamhma a pu, tiah 27 Revolution Force nih an thanh. June 20 zan suimilam 7:30 hrawng ah Myingyan pengkomh Battalion 1(27 Revolution Force) le Myingyan pengkomh Battalion 8 in PDF ralkap 20 cu cycle in an kal lio ah SAC ralkap nih an kah hna, tiah theih a si.
“SAC ralkap lei nih thawngpang an theih chung caah a si men lai, Yunghtu khua thlanhmun pawng in an kan bawh. Kan ralkap 10 cu cycle in an kal lio ah SAC ralkap nih an kah hna i, cycle 2 le ralkap 4 an luat,” tiah 27 Revolution Force in ṭuanvo ngeitu nih a chim.
Cu kahdohnak hmun ah cun kan ralkap 4 cu an thi colh. Sii-inn ah 2 an phan i ralkap pakhat hi a thi tam tuk a chuah caah a nunnak a liam ṭhan, tiah a chim chap. SAC ralkap nih PDF cycle 3, M 79 zun 2, meithal zun 2 telh in meithal zun 7, drone 1, 40mm lung 2, drone bomb lung 4, meithal kuan le kuanbawm hna zong an chuh hna, tiah theih a si.
PDF ruak hna cu SAC ralkap nih tualchung mi an fial hna i an khanghter hna, tiah theih a si. A luancia April 12 lio zong ah Yunghtu khua kam ah SAC ralkap le PDF kar kahdohnak a rak chuak i SAC ralkap 10 leng an rak thi, PDF lei in 2 an nunnak a rak liam ve, tiah theih a si.
SAC kuttang Myanmar Foreign Trade Bank(MFTB), Myanmar Invesment And Commercial Bank(MICB) le SAC runvennak zung hna cu chawleh chawhrawlnak lei in phihkhamnak kan tuah cang, tiah US nih thanhnak an tuah. US treasury zung nih cun SAC kuttang Myanmar Foreign Trade Bank(MFTB), Myanmar Invesment And Commercial Bank(MICB) le SAC runvennak zung hna cu chawlehthalnak lei in phihkhamnak an tuahmi kong ah fianhnak an tuah.
SAC nih nawlngeihnak an laak hnu in Russia sinah US dollars 1 billion man hriamnam thilri an cawk i Russia ca ah tangka luhnak ṭha ngai a si. Cu an cawkmi ral hriamnam hna zong cu SAC ralkap nih rammi thahnawnnak an hman, tiah US nih cun an langhter.
US nih a phihkham mi MFTB le MICB cu SAC cozah nih a ngeih mi financial institution a si i, ramdang phaisa thlennak ah hman mi a si. Myanmar Oil And Gas Enterprise(MOGE) tangka luhnak le ramdang hrambunh in tangka luhchuahnak vialte zong MFTB le MICB in a lutmi an si i, cu tangka lutmi cu SAC nih hriamnam cawknak ah a hman, tiah US nih cun an langhter.