Zualko; Ka Kawi..khuami hna cungah zawnruahnak, dawtnak le duhfahnak a ngei mi!!

Tluang Cung Thang mual a liam!!
======================
Chin ramkulh, Falam khua, siizung pi ah siizung uk a ṭuan liomi Dr. Tluang Cung Thang cu September 28 zinglei ah a ruak in an hmuh tiah Falam peng thawngzamh a simi The Rihli Voice nih a langhter.

Dr. Tluang Cung Thang te chungkhar he aa naihniam mi pakhat nih “A hlan ahcun amah lawng Falam ah a um, an nu le a fale Hakha ah a chiah ta hna nain atu cu an umpi cang ko. Amah nih a ruang cu a chim lo nain ka lungrawk tuk tiah a chim lengmang” tiah The Chinland Post ah a chim.

Dr. Tluang Cung Thang cu amah le amah hriawhnak in a nunnak aa la tiah Zalen thawngzamh nih cun a langhter. Dr. Tluang Cung Thang nih Covid-19 zawtnak a rak karh tuk lioah Falam peng mizaw hna ṭha tuk in a rak zohkhenh hna caah 2020 ca Falam khua i Idol person award zong Chinland Herald nih a rak pek mi a si.

Ka dawtmi ka Hoikom aww..Pathian sinah lungdai tein rak i din cang ko law. A tu caan, a tu lio caan ah tuanvo ngeitu, TMO pawl, DMO pawl, Siizung uktu pawl i an harnak vialte, an tuarnak vialte, stress vialte, a phunphun in sualphawtnak vialte, tuan kho loin harnak tampi a um cu ka theih ko e ka kawi aww.

Magway Sii University 1st batch, nilinh laak ah RCT motor he lam hlatpi ah kan tlintlak lo bu tein nilinh laak ah harnak a phunphun tuarin Dr dirhmun phak ding tiang kan i zuam kha. Sianghngakchia nu le pa ti loin kan hoi lete he inn kan tin lio, TaungKyi ah hmunkhat tein tlang kan kai ti hna i tlang chuak tiang Ti nan kan put piak kha.

Hmunkhat te ah buaih zong kan laa ti i Dip.Hospital admin 9th batch zong ah buaih kan laa ti kha. A hartukmi hmunhma i a sunglawi tuk mi Dr pakhat chungah pakhat bantukin ui na um tuk e. Kaa zumh kho hrimhrim lo e ka kawi. Ka dawtmi ka hoikom aw Pathian sinah lungdai tein rak i din cang kun law.

Saya aw..na thinlung chungin na tuar mi cheukhat ngaihnak nawl vun ka pee law, Kei zong nih Saya cu ka theihthiamnak kong, na chim mi pawl ka theih lai e. Zeiruang ah dah a si hnga. Mah tihin kan i then lai ti ka ruah bal lo e. Harnak a phunphun na tuar dih hnu ah ka thinlung chungin thla kan caam piak ko e.

Ka dawtmi ka hoikom aw kan chim hnga ding bia a dih cang e. Vanram tuah va kal ko kun law. Sayakyi khuami hna cungah zawnruah duhfahnak a ngei mi ui na um tuk e. Syakyi aw na thawngpang vun theih cu ka zum kho hrimhrim lo e. Zeitin a si e kaa zum kho hrimhrim lo e.

Na ka chimh mi bia pawl ka theih dih ko e. Na ka peek mi fimnak zong a tlawm lo. A tu ah cun i zumh lo tiangin ka um cang. Pathian sinah lungdai tein rak i din cang ko kun law. A ruahnak a tha tuk mi Sayakyi aw…kan ui tuk e. Tuan ah ka theih mi thawngpang cu ka zum kho hrimhrim lo e, Sayakyi nangmah bantuk in a fimthiam i a tling mi minung fawi teiin zeiruangahdah a sungh na peek e.

Ka zum kho hrimhrim lo e. Vawlei nih zeiruangah dah mah ti phunglam in cun a sungh an peek e. R.I.P. Ka kawi na kan liamtak cu kan dawtmi fanu le fanpa sungtluk in kan tuar e. Falam mipi kan caah cun a faktuk mi sungzatlak nak a si mu. R.I.P. Note-Hihi a hoikom rual le a dawtu hna nih an thlahnak a si. Dr.Tluang Cung Thang, thlahnak caah tiin commnets ah na lungsiaherh mi caa pakhat khat rak tial ve.

Relchap; Chin ramkulh chung ah, SAC nih onmi sianginn ah a kaimi siangakchia hna i nichiar an kaizat cazin cu SAC nih an lak!! Chin ramkulh chungah, SAC nih onmi sianginn ah a kaimi siangakchia hna i an min cazin le nichiar an kaizat cazin cu khuachung um SAC ralkap nih an lak tiah theih a si.

Nizaan September 27 thokin, Chin ramkulh, Matupi khua chung ah, cu sianginn kaimi min cazin cu an lak i, class chungah siangakchia zeizat dah um? tuni minung zeizat dah a kai kho? minung zeizatdah an bau? zeiruang ah dah an bau? ti mi pawl tiangin a kan hal dih. Nichiar zongin cu cazin cu an kan lak te khawh men tiah siangcachim saya pakhat nih a chim.

Cu bantuk thiam in, Chin ramkulh Falam khua chung zongah, siangakchia hna nichiar an kaizat cazin cu, Tat-Yin-Hmu sinah an pek tawn tiah theih a si.

Falam khuachung lawng si lo, SAC nih sianginn an on nak hmun poah ah cu cazin cu an lak i, a baumi an um a si ah cun zeiruangah dah an bau tiin cachimtu saya/mah te cu an kan hal.
Nichiar ti awkin, cu cazin cu an lak caah, cheukhat nu le pa cu zeiruangah dah si hnga tiah thinphang in an um ko tiah siangcachim sayamah pakhat nih a chim.

Chin ramkulh chungah, tualchung hriamtlaiphu(CDF) le CDM saya/mah hna i bawmin an onmi sianginn ah a kaimi siangakchia an tam caah, SAC nih an onmi sianginn ah a kaimi siangakchia hi mi tlawmte lawng an si tiah theih a si.

Myinchan Peng Ah Umhmun Khuarmi SAC Ralkap Cu PDF Nih Drone In Bomb An Thlak Hna Caah Ralkap le Pyusawhti 4 An Thi, Mandalay ramṭhen, Myinchan peng khuate 3 ah umhmun khuarmi SAC ralkap cu, drone in bomb kan thlak hna caah SAC ralkap le pyusawhti 4 an thi, tiah 27 Revolution Force nih cathanh an chuah.

September 25 ah Nyaungtu(ညောင်တို) khua sii khan le khuabawi zungah umhmun khuarmi SAC ralkap, palik le pyusawhti pawl cu drone in bomb kan thlak hna caah ralkap le pyusawhti 4 an thi, 2 hliamhma an pu, tiah 27 Revolution Force nih an langhter.

Cu ni zaanlei sml 4:00 hrawng ah Sinchaung khua ah umhmun khuarmi SAC ralkap cu PDF drone in bomb an thlak caah SAC ralkap 1 a thi. Hriamngan le hriamhme an kah ko hna nain PDF ralkap a thimi le aa hliammi an um lo, tiah theih a si. Myinchan peng Kyi khua um SAC ralkap le pyusawhti pawl drone in bomb thlaknak ah ralkap 1 a thi i 5 hliahma an pu. Ngaungtu khua bomb thlaknak ah ralkap 2 an thi, tiah 27 Revolution Force nih an langhter.

Cu kahdohnak ah Myinchan pengkomh Battalion No.(1) 27 Revolution Force le Myaung Fighter People Defence Force hna i bawm in an doh hna. SAC ralkap, palik le pyusawhti an umnak he aa hlatnak ah um ding in mizapi cu 27 Revolution Force nih ralrin an pek hna, tiah theih a si.

Kawlram Ramri Kong He Pehtlaiin Bangladesh Nih Tuluk He I Bawmin Kan Kalpi Lai, Kawlram ramri kongkau he pehtlaiin Bangladesh ram nih Tuluk ram he i bawmin kan kalpi lai tiah Bangladesh lei nih thawng an thanh tiah theih a si. Kawlram cungah Tuluk hipkhawhnak a um ko caah ramri hrawnghrang i a cangmi thil he pehtlaiin Tuluk bawmhnak laak in kalpi an timh hi a si tiah theih a si.

Ramri kongkau ah hin Bangladesh hi a lungre a theih pah caah Bangladesh Ambassador nih Tuluk cozah sinah a tubantukin bawmh a hal hi a si. SAC ralkap le AA hriamtlai kar lakah kahdohnak a zual chin lengmang caah ramri kongkau ah Bangladesh nih a tubantukin a kalpi hi a si tiah theih a si.

SAC Ralkap Nih Htilin Peng Tualchung Mi 30 Tluk An Tlaih Hna Pinah Inn 4 Mei In An Khangh, Magway ramṭhen, Htilin peng Pana(ပုဏ္ဏား) khua cu SAC ralkap nih, nizaan September 27 ah mei in an khangh i inn 4 a ciam, tiah tualchung mi hna sinin theih a si.

SAC ralkap nih nizaan September 27 zinglei sml 5:45 ah Pungna khua cu, hriamngan le hriamhme he an kah hnuah khua chungah an lut i, zaanlei sml 1:30 hrawng ah inn an khangh caah inn 4 a ciam. Cu pinah tualchung mi 30 nak tlawm lo an tlaih hna i zaanlei sml 2:30 hrawngah Htilin khua chung ah an kir, tiah theih a si.

SAC ralkap nih an tlaihmi hna cu an thlah ṭhan ko hna nain Maung Kyaing, Me Pu, Zaw Than, Tauk Kyi, kum tling lo tang kua siangngakchia Min Thet Paing, Thura Paing le Kyaw Naing cu an thlah hna lo, tiah theih a si. Cu pinah September 26 zinglei sang ah Myaing leng le Pauk peng ramri Kyetsuaih(ကြက်ဆူအိုင့်) khua cu, SAC ralkap nih an khangh caah inn 4 a ciam, tiah We love myaing sinin theih a si.

SAC Ralkap Nih Hriamngan An Kah Ruangah Ngakchia Pakhat le Tualchung Mi Pahnih Hliamhma An Pu, HpaAn peng Nyaungtone(ညောင်တုန်း) khua chungah umhmun a khuarmi SAC ralkap kuttang BGF nih, hriamngan an kah caah tualchung mi 3 hliamhma an pu, tiah KNU nih cathanh an chuah.

Nyaungtone khua chungah umhmun a khuarmi SAC kuttang BGF check gate in BGF ralkap pawl nih, September 24 zaanlei sml 5:30 hrawngah hriamngan in an kah caah kum 8 tluk ngakchia pakhat le nu pahnih cu hriamngan kuan in hliamhma an pu, tiah an langhter. Tualchung mi 3 hliamhma an put pinah caw 1 le meheh 1 zong hriamngan kuan nih a khen hna, tiah KNU nih cathanh an chuah.

Ngaungtone BGF check gate cu BGF -1014 Battalin, Companny 2 kuttang an si i Company commander cu bawino Tin Win a si. Hriamngan kuan in hliamhma a pumi hna cu BGF nih i thlopbulhnak ah kyats sing 2 cio an pek hna, tiah theih a si.

Walet Peng Le Tanintharyi Ramṭhen Ah PDF Nih SAC Ralkap 3 Nak Tlawm Lo An Thah Hna, Sagaing ramṭhen, Walet peng Ywathakyi(ရွာသာကြီး) khua pawng lamtonnak ah khualtlawng le mi chokvai ngunkhuai khawltu SAC ralkap pawl cu, September 26 ah Minaga Guerrilla phu nih drone in bomb an thlak hna caah SAC ralkap 3 an thi, tiah theih a si.

SAC ralkap nih Ywathakyi khua cu hriamngan in an kah pinah Shwe Bo-Sagaing lam le Ayartaw-Walet motor lamtonnak ah khualtlawng mi hna cu ngunkhuai an khawlh hna i an hrocer hna, tiah cathanh an chuah.

Cu bantukin Tannitharyi ramṭhen Dawei khua in Myeik lei ah a kalmi SAC ralbawi an i citmi motor cu Palaw peng Kade(ကဒဲ) khua le Tinkantaw(သင်္ကန်းတော) khua karah PPDF le PRDF hna i bawm in bomb an puahhnawh caah SAC ralkap a thimi le aa hliammi an um, tiah theih a si.

SAC ralbawi nih an i citmi motor cu Palaw peng Khah Lah Yah 285 Battalion sakhan ah an lut kal i, zaanlei sml 2:00 hrawng an kir lei ah bomb an puahhnawh hi a si. Cu bomb puahhnawhnak ah a thimi SAC ralkap cu mizaw phorhnak motor 4 nih a lak hna.

Cu ṭhiamṭhiam in Dawei- Tayetchaung lam cung um SAC ralkap check gate zong PDF nih drone in bomb an thlak, tiah theih a si. Tayetchaung peng Tayet Hnakhuah(သရက်နှစ်ခွ) le Panpin khua karah SAC ralkap pawl cu PDF nih drone in bomb an thlak hnawh hna caah SAC ralkap nih hriamngan le hriamhme he an kah hna. Cu kahdohnak ah a thimi le aa hliammi fiang in theih a si lo.

Taze Ah SAC Ralkap Nih Khuami 11 An Thah Hna Pinah Inn 700 Leng An Khangh, Sagaing ramṭhen, Taze pengah SAC ralkap nih tualchung mi 11 an thah hna pinah inn 700 leng an khangh caah an ciam dih, tiah theih a si. September thla chungah Auhphul Ai(အုတ်ဖိုလ်အိုင်) khuami PDF ralkap 4 le khuami 5, Aungchanthar khuami 1 le Kwekone(ဂွေးကုန်း) khuami mino 1 cu SAC ralkap nih zohchia tuk in an thah hna, tiah tualchung mi hna sinin theih a si.

September thla chungah Hnetpuitaw(ငှက်ပျောတော) khua inn 121, InnNa khua inn 98, Nabetkyi(နဘက်ကြီး) khua inn 124, Teysa(သဲစား‌) khua hmailei le hnulei inn 80 le a dang khuate hna telh in a dihlak inn 723 cu SAC ralkap nih an khangh caah a ciam dih, tiah theih a si.

“SAC ralkap nih inn an khangh dih in khua chungah kan lut i, inn 21 a rak kaang. Khuami pakhat zong an thah i mei in an khangh. Aho a si cu hngalh a si rih lo, mino pakhat zong a tlau,” tiah Kwekone khuami pakhat nih a chim.

“Kannih khua hi inn 120 hrawng a ummi a si. Cu chungah inn 88 a kaang. Ka naupa(ဝမ်းကွဲ) zong hri in an ṭem i mei in an khangh. Cu tan ah PDF ralkap 4 le khuami 2 an thah hna. Ramlak ah kan zam i thilri zeihmanh kan i put lo. Caw le cawleng lawng kan i put khawhmi a si.

Kum upa hna cu an zawt caah sii-ai an herh. Cun minung kan tam caah eidin ti le rawl kan herh tuk,” tiah khuami pakhat nih a chim. Taze peng mino pakhat nih, “SAC ralkap nih inn an khangh pinah mi an thah lengmang hna caah mizapi nih kan huat tuk cang hna. Uico ralkap tiin kan auh hna. Ni ni khat ah an tuahsernak vialte an in te lai,” tiah a chim.

SAC cozah tangum remdaihnak phu le UWSP, NDAA, SSPP hriamtlaiphu tonnak an ngei, SAC cozah tangum ramdaihnak phu le WA hriamtlai UWSP, NDAA le Shan hriamtlai SSPP hna cu Naypyidaw zung pakhat ah September 27 ni ah tonnak an ngei tiah theih a si. Tonnak hmun ahcun SAC cozah tangum ramdaihnak phu hruaitu Bochoh Ya Pyae le UWSP in vice Chairman an i tel I biachimnak an ngei hna tiah theih a si.

SAC cozah phu leinih an duhmi le an duh ningin thil kalpi ding kong an chim hnu ah UWSP, NDAA le SSPP hriamtlai aiawh a kaimi hna nih an duh mi chimnak an ngei, cun ceihhmainak tlawmpal an ngei i a nikhatnak meeting an dih ter tiah theih a si. A nihnihnak tonnak cu September 28 ni (nihin) ah an tuah than lai tiah theih a si.

Thimnak Tuahmi Telhin SAC Rianṭuannak Vialte Kan Cohlang Lo Tiah NLD Nih Cathanh An Chuah, Rampi huap thimnak telhin SAC ralkap cozah an rianṭuannak vialte kan cohlang lo tiah National League For Democracy (NLD) nih cathanh an chuah tiah theih a si.

Mipi duhnak he thim le dirh tharmi cozah thar a dir hlan lo 2020 rampi thimnak a phichuak hi phunglut a si. Mah duh paoh in a cawlcangmi le phungbuarmi SAC ralkap cozah nih a tuah dingmi thimnak, thimnak tuahnak ding caah a tuahmi thil vialte kan cohlang hrimhrim lo tiah cathanh ahcun an langhter.

Phungphai vialte zul loin ram hruaitu Aung San Suu Kyi tlaihkhihnak le hruaitu dang tlaihkhihnak, a ruang um loin tlaihkhihnak tuahmi vialte cungah le hngakchia he upa he thahnawnnak a tuahtu SAC ralkap cozah cungah vawlei cung phukip nih biatak tein dirpi le cawlcanghnak tuah dingah kan in sawm hna ti zong an cathanh ah an langhter tiah theih a si.

Model Nan Mwe San Cu SAC Nih Kum 6 Thongthlak Ding In Bia An Khiah Piak, Model Nan Mwe San cu electronic pehtlaihnak upadi section 33(a) in SAC ralkap biaceih zung nih, thong kum 6 thlak ding in bia an khiahpiak tiah nizaan September 27 ah NOM nih cathanh an chuah.

Electronic act upadi section 33 in Model Nan Mwe San cu taza an cuai i, Insein thonginn nih nizaan September 27 ah thong kum 6 thlak dingin bia an khiahpiak hi a si. Model Thin Zar Win Kyaw zong Mayangon(မရမ်းကုန်း) peng ralkap biaceih zung nih taza an cuai i a sualnak an kawl cuahmah lio a si, tiah NOM nih cun an langhter. Model Nan Mwe San le Thin Zar Win Kyaw cu a luancia August thla ah khan kum 7 tiang thong thlak khawhnak electronic upadi section 33(a) in SAC ralkap nih taza an rak cuai hna, tiah theih a si.Crd-The Chin Post