Chin Ramkulh Hakha Khuapi Ah SAC Nih Mino 1 An Kah I A Thi. Chin ramkulh, Hakha khuapi ah SAC ralhrang nih mino pakhat an kah i a thi, tiah tualchung mi pakhat nih Lungmili Post ah a chim.
March 7, zaan suimilam 10 tluk ah Hakha khuachung Pu Thawng Kian petrol dawr pawng ah Thantlang peng, Hmawngtlang khua mino 1 cu SAC ralhrang nih an kah i a thi tiah, theih a si. A tubantuk in kah a tongmi hi zung rianṭuan lio mi a si, tiah theih a si. Lungmili Post
Thawngpang dang: Kalay peng ah PDF ṭangṭi phufonh hna nih SAC ralhrang sakhan le rallam cu ni 4 chung drone in an kahdoh hna caah ralhrang 8 an thi i minung tampi nih hliam an tuar, tiah Wings of Kalay nih an thanh.
March 1, 2024 ah SAC ralhrang pawl umhmun an khuarnak Kalay GTC cu PDF ṭangṭi phufonh hna nih bomb lung 3 puahhnawh in an kahdoh hna. Cun March 2, zong ah Kalaymyo thlanglei Htomar khua le Tharyarkone khua kar ah rallam a sialmi SAC ralhrang hna cu bomb lung 8 puahhnawh in an kahdoh ṭhan hna i March 6,7 zong ah
Kalaymyo thlanglei Hmantaw khua lei ah rallam a sialmi SAC ralhrang hna cu bomb lung 10 puahhnawh in an kahdoh hna caah SAC ralhrang 8 an thi i minung tampi nih hliam an tuar, SAC sakhan 1 zong a kang, tiah theih a si.
A cunglei kahdohnak hna hi Wings of Kalay Drone Team, Kalay Revolution Force(KRF),Chin Secret Service (CSS), Chin National Defense Force (CNDF), Chinland Defense Force (CDF), Kalay -Kabaw- GanGaw (CDF-KKG) hna i bawm in Fixed Wing Drone pawl hmang in Air Bomb 21 puah hnawh in an kahdoh hna, tiah theih a si.