Zualko; Dr. Naing Htoo Lwin Thih Kong CNF nih Ngaihchiatnak Ca Chuah!

Dr. Naing Htoo Lwin Thih Kong CNF nih Ngaihchiatnak Ca Chuah
——–
CNA sii lei ralkap ah rian a ttuanmi Dr. Naing Htoo Lwin nih bia aa tiam bang in October 15 ah miphun le ram caah a nunnak a pekmi cung ah CNA nih upat hmaizahnak kan ngei i, taantakmi chungkhar kan ngaihchiatpi hna, tiah an langhter.

2nd Lieutenant Naing Htoo Lwin hi Kawlrawn, Magwe in a rami asi i, Kawl miphun asi. Sibawi sianginn a dih deng ah, Ralhrang nih uknak an lak hnu in CNA ah a lut. Thate in raltuk thiammnak le ralbawi cawnnak zong a lim.

Kan Miphun flag itlaih bakin biakamnak a tuah vemi asi. Bokhat asi, a voikhatnak ralram a kal ah a kan liamtak. Falam peng Rial Ti pawngkam ikahnak in a tlau i, nizan lawng ah a ruak an hmuh.

A chungkhar nih an hei zohthla lai ning le, a thawngpang an theih in an lung a kuai lai ning ruah ah, celh asilo.
Bochanmi Mino thatha nih an kan liamtak, lung a faak hringhran ko. Hi Uknak chiahru hi dihdong zokzok hram seh.

Rialti pawng ah an Hmuhmi Ruak cu CNF sin ah CDM Tuah in a Phanmi Sibawi a Si. Rialti khua pawng, lamthlang ah an hmuhmi ruak cu Yangon khua ah a ummi University of Medicine – 2 ah sii lei fimthiamnak a cawng liomi Ko Naing Htoo Lwin (kum 20) a si, tiah an hun hliah khawh cang.

“Falam-Hakha karlak raldohnak ah hliam a pumi pawl thlop ding in anih zong a kal ve. An rak kir tik ah anih aa tel ti lo. Phone kan chawnh i voi khat cu a tlaih. Mah hnu ah a tlai ti lo. SAC ralhrang nih an tlaih hnu ah an thah i a si lai,” tiah CNF chimnak nawl ngei Salai Htet nih a chim.

Naing Htoo Lwin i a ruak cu nizaan ah Falam-Hakha karlak mengtung 144KM zawn ah thacamnak tein ruakvuinak an tuahpiak cang.

Kawlram dohthlennak ah CNA/CNF leiin mifim thiamsang miraltha sibawi kan sungh cu a poi tuk hringhran. Taksa cawlcanghnak he kan sinah i tel kho ti hlahhmansehlaw Dr Naing Htoo Lwin saduhthah tuan ah tlinghram ko seh. Fully respect RIP in vactory!

Kan Ngeihchia, tuk cio e Dr pa aw. Pa Pathian nih MAH tuahser nak cu nihin thaizing ah donghter hram cang seh law tha tuk hnga mu. Pathian nih cun a tuah khawh dih ko mu. Na tan tak mi na chungkhar BAWIPA nih hnem hram ko hna seh mu. Ralhrang lei ruak le motor rawk pakhat te zawng hmuh um bal lo kannih lei ruak tu hmuh chap lengmang apawi ko e zeiti tha mu.

Chuncung-Ramthlo kar Kahdohnak ah SAC Ralhrang 5 an Thi, Ramthlo ah Ralhrang nih Vok an Kah, Inn an Khangh. Nizaan (October 23) zaan sml. 11:00 hrawng ah Chuncung le Ramthlo karlak ah SAC ralhrang pawl cu CNA/CDF nih an kah hna i ralhrang 5 an thi, tiah thawng kan theih.

SAC ralhrang thazaang 30 hrawng cu an si i, CNA/CDF nih an kah hna. Hakha lei in ralkap thazaang 25 hrawng an rak ra chap i ralhriam ngan pawl in an kah hna caah CNA/CDF ralkap pawl hnu ah an kir tthan. Nizaan ah SAC ralhrang pawl Ramthlo khua ah an riak i vok an kah pin ah inn pakhat zong an khangh nain a kaang thai manh lo.

Khuami pakhat nih, “Nihin zinglei khua in an chuah lai ah inn pakhat an khangh ta. Asinain, kan hmih khawh manh i a kaang thai lo. Vok pakhat an kah i an chiah tami zong a um,” tiah The Chin Journal a chim.

Rialti Khua Pawng ah an Hmuhmi Mithi Ruak cu Thlacamnak tein Zaanlei ah an Vui Cang! Rialti khua pawng, motor lamthlang pe 10 hrawng ah nihin zinglei ah pa pakhat ruak an hmuhmi cu Falam-Hakha karlak mengtung 144KM zawn ah Lungpi Baptist Church pastor David thlacamnak in nihin zaanlei ah an vui.

A ruak a rawh cang caah atu tiang aho si timi theih a si lo. Aho a si timi an theih tik ah chungkhar nih hmailei ah fawi tein a ruhro an hlam khawh nakhnga mengtung 144KM zawn ah a ruak an vui hi a si.

Mindat le Matupi kar ah CDF-Mindat le CDF-Matupi nih ralhraang panga an thah hna. Chin ramkulh Mindat in Matupi lei ah a kal mi raltuknak motor (Armoured Vehicle) le motor 70 leng a rak dongtu Matupi ralhraang hna cu October 21 ah Mindat- Matupi kar meng 78 zawn ah CDF-Mindat le CDF-Matupi i bawm in an kah hna caah ralhraang panga an thi i bomb in hliamh mi tampi an um tiah kan theih.

Cu kahdohnk a chuah lio cu; Mindat in a ra mi ralhraang motor pawl cu meng 56 zawn ah lam a cim i an taan lio a si caah hmaikal ke ralkap 150 hrawng nih meng 70 ka tiang an ra i an rak bawmh hna tiah kan theih. A luancia October 14 thawk in Mindat lei in a ra mi ralhraang hna nih meng 23 zawn i a um mi inn pawl an hrawh an bauh, Sia paruk an thah i an ei pinah riahcaw ah an i ken rih tiah kan theih.

Rangoon Sanchaung Palek zung an kah. Rangoon khuachung, Sanchaung ah a ummi palek sakhaan i humhimnak tuanvo latu ralkap cu nihin (October 23) ah motor aa cit mi nih meithal in an kah hna tiah kan theih.

“Nihin chunlai sml 2: 00 tluk ah a si. Motor pakhat in an ra i an kah hna. A thok ahcun bomb a puak mi ah kan ruah. Meithal thong voi 5 renglo kan thei. Tlawmpal ah lam cung in palek pawl an tlik len kan hmuh. A khen mi hna an um. Pakhat a thi tiah an chim. Ralkap motor tlawmpal ah an phan. Cun mizaw phorhnak a rak phan i an kalpi hna,” tiah kahnak a chuah lio ah a hmutu pakhat nih BBC ah a chim.

Tuzingka dei hlan zong ah Butahtaung ah Yangon – PDF nih ralkap an kah hna i ralkap minung pali an thi tiah thawng an thanh.

Rangoon khualai ah ralkap umnak hmun an kah; ralkap 4 thi. Tuzing (23 October 2021) zinglei khuadei deuh hlan ah PDF – Yangon nih Botataung um Maha Bandula lam cung ah runvennak a tuah mi SAC ralhrang ralkap an kah hna i minung 4 kan thah khawh hna tiah PDF – Yangon nih thawng an thanh.

“Minung pa 4 an thi. Kanmah lei in a thi mi le aa hliam mi kan um lo. Tlamtling te in hnu kan kir kho,” tiah S21 tiah a min aa sak mi PDF – Yangon chungtel nih Media sin ah a chim.

Kawlrawn lei PDF pawl hi anmah kumthar (tading-kyut) chung cawlcangh an i dinh hna hi an kumthar a dih in fakpi in SAC ralhrang dohnak thok than ding in timtuahnak an ngei cuahmah cang.

CDM tuah tu bothum pa Captain Aung Myo Htet. LID – 66 timi tah-mah 66 tang ah a umi mi LIB – 80 (kha-la-yah 80) in Captain Aung Myo Htet cu SAC ralhrang kaltak in CMD a tuah tiah kan theih.

LID – 66 hi ralkap nih uknak a lak hnu in ral doh ah hman bik mi le kaa kip in kuat mi ah an i tel. Chin ramkulh zong ah hmun tampi ah an rak kuat i September 29 i Thantlang ah kan pa le pahnih a kah that tu hna zong LID 66 tang a ummi in an si.

Pyin Oo Lwin Palek Sianginn in Duh Ye-oh Ye Yint Naung CDM A Tuah (Burmese Below). Pyin Oo Lwin – Zee Pin Gyi ah a ummi Palek bawi training peknak sianginn ah Duh Ye-oh a tuan lio mi Ye Yint Naung – Pa Biak cu palek rian chuah tak in CDM a tuah i a himnak hmun a phan cang tiah kan theih.

Pa Biak hi palek fimthiamnak lei ah cawnnak sang tampi a ngei mi a si caah palek sianginn lei le palek bawi pawl training peknak ah an hman ngai mi le an bochan ngai mi a si. Ahram thok te in CDM tuah a duh nain a umnak hmun in pehtlainak tuah le vun chuahnak lam a har caah atu ceo lawng ah a himnak hmun a phanh khawh hi a si tiah amah he aa naihniam mi chungkhar sin in kan theih.

Hmun Kip CDF Hruaitu Upa Pawl Nih Organization Bantuk Pakhat An Dirh. Chin miphun cihmih a kan timtu Kawl ralhrang nih an kan thah, an kan tlaih, an kan nawnnak le an kan neknak vialte hi kan duh lo ruang ah a tu bantuk in CDF/CNDF tiah min i bunh in ralhrang kan doh hna.

Hi lio ah mipi khuaruat kholo deuh pawl cu kan lung a dong pah deng lengmang. Kan hmurka zong in a chuak pah tawn. Lungdonghnak nih a chuahpi mi cu sungh zatlaknak lawnglawng a si. Lungsau nih nun a sersiam i ram a sersiam lai. Lungdong deng nawn in kan um lio ah thawngpang tha taktak pakhat hun theih hi cu a nuam kho taktak ve si.

Zei dah si tiah cun, Chin ram ah Myo 9 hna i CDF hruaitu upa vialte cu zarhkhat ah voikhat tluk deng, ni 10 ah voikhat tiin tonnak, bia ruahnak an ngei. A fawinak in kan chim ah cun ralhrang teinak ding ah lungrual tein khua an khangti tinak a si. A si mi zong a si.

Hi tonnak ah min an bunh mi cu ”Join Military Comment” tiah min an pek. Hihi Organization phunkhat bantuk in an dirhmi a si tiah kan theih. Min an bunh mi hi official in thawngthanh mi a um rih lo ruang ah ka palh sual siah cun ka ruatthiam hram uh. An dirhnak hmun le hma zong mipi nih theih a herh tik ah kan theih te lai.

CDF hruaitu hna nih a tu bantuk in ton bia ruahnak ngei in lungrual tein ralhrang kan doh lai tiah an khuakhan mi hi Chin mi kan ral teinak phunkhat a si. Mipi nih CDF/ CNA ah raltha taktak in i hngat ko hna usih.
Hihi mipi nih kan theih khawh cio ah a tha. Credit; Chum Nawl