Zualko; Chin Miphun Mah le Mah I Thahnak A Chuak A Poi Taktak!

Paletwa ah U Aung Thang nih afar-va naam in a sawhthah, afar le tule zong naam in hliamh
============
Paletwa Peng Sami khua pawng Saunglan khuami U Aung Thang (kum 40) nih lo an riahnak ah afar-va (afarnu pasal) naam in a sawh i a thi, afar, atunu le tupa minung 3 zong naam in a sawh hna i an i hliam, tiah theih a si.

September 23 lio ah khan U Peter (kum 27) le anupi Daw Ko Lone (kum 33), an fapa Moses, Nyi Htet Aung, le fanu Samari hna cu facang-ah ah lo an riak.

Cu zaan 11:00 PM hrawng ah Daw Ko Lone tapa U Aung Thang nih an chungkhar 5 in naam in a sawh hna. An pa U Peter cu a hngawng ah a ah i a thi. Daw Ko Lone cu alu hmun 8 in an thitpiak. Atai, aliang, akut le ake hrawng ah naam hma lawngte a si. An fale zong an lu, liang le ke tibantuk an i hliam.

Aung Thang le afarnu pasal techung hi bia-alnak in an rak i vel (vua) bal i afarnu zong akuttum in a rak thongh ruang ah khua upa nih vokthau le tangka Ks.30,000 an rak liamter bal cang. U Aung Thang cu atu hi Paletwa Palek sakhaan ah an hren, tiah Zalen nih a tial.

Mandalay Ramthen ah Zero Phu nih Council ralhraang 12 nak tlawm lo an thah hna. Mandalay ramthen Nua Htoo Kyi peng Suphyukung khua sianginn ah umhmun a khuar mi Council ralkap cu Oct. 14 zaan suimilam 10:40 hrawngah luhhnawh in kan kah hna tiah Zero(ပြောက်ကျား)phu nih an thanh.

Meithal ngan meithl hme he luhhnawh in an kah hna. Council ralkap a tlawm bik 12 an thi i hliamtuar zong an um tiah kan theih. Khuami pakhat nih “khua chung sianginn in Bomb puah thawng kan theih, cun meithal thawng zong kan theih. Hliam tuar an um le um lo kan hngal lo. Cuka ah cun Council ralkap 20 hrawng lawng an um. Zinglei suimilam pahnih hrawng in khualu bo ah Council ralkap nih meithal an puah thawng kan theih” tiah a chim.

Ralkap an umnak ah meithal ngan kan puah i Ralkap lei in lehrulnak a um lo, minutes 15 hrawng pehtlai in kan kah hna hnu ah kanmah lei hliamtuar um lo tein kan kir than tiah Zero phu nih an chim. Tuni zinglei ah Nua Htoo Kyi lei in Motor panga Suphyukung khua lei ah an ra ti thawmpang ruang ah khuami cheukhat an zaam tiah kan theih.

Amarahpurah peng Sataw khua zong ah Oct.14 zaanlei sml 5:00 hrawng ah Council ralkap thawng petu pa pakhat meithal in an kah. Kum 40 hrawng a si mi Ko Myo cu a innhmai a thut lio ah cycle pakhat in minung pahnih nih meithal in voili an kah i hliam hma he siizung ah an kalpi tiah kan theih. Credit: DVB, The Hakha Post, The Hakha Times