CDF-Senthang Nih Vanlawng In Bomb Thlakmi Duhlonak le Ralkap Pa Hnih Nunnak Pe Mi Hna Upat Peknak Cathanh Chuah
=======================
May 8, zaanlei sml 6:00 hrawng ah Senthang peng Kuapi khua ah le Sinai Camp SAC ralhrang nih Mi 35 in bomb thlak ruang ah CDF-Senthang AGS Salai Siang Cung Hnin nunnak a liam i minung pa li hliam hma an pu.
Cu he pehtlai in CDF-Senthang nih duhlo nak le CDF-Senthang ralkap minung pa 2 nunnak a liam mi hna upat peknak le chungkhar ngaihchiat pi nak cathanh cu May 8 ah an chuah.
CDF Senthang 2 Miphun Le Ram Caah Nunnak Pek; Central Lairam, Hakha Senthang peng ah CDF Senthang ah Assistance General Secretary a țuan liomi Salai Sang Cung Hnin cu hramhram uknak doh ruangah ralhrang vanlawng bomb nih a tlak caah miphun le ram caah a nunnak a pek. Cun CDF Senthang ah Company Commandar a țuan lio mi Salai Duh Lian Hmung cu hramhram uknak doh ruang ah ralhraang vanlawng bomb nih a tlakhnawh caah miphun le ram caah a nunnak a pek.
Pau dohthlennak ah a nunnak a pe mi paraltha cungah CDF Senthang nih upanak sangbik kan in pek hna, Kaltakmi chungkhar le cingla rualchan vialte nan ngaihchiatnak kan in hrawmpi hna kan Biak Pathian nih in hnem hram ko hna seh tiah CDF Senthang nih upat peknak le ngaihchiat hrawmpinak an thanh.
CDF-Senthang Nih SAC Ralhrang Bomb Thlakmi Kong Ah Thawngthanhnak An Tuah; 2023, May 8, zanlei suimilam 6:00 hrawng ah SAC ralhrang nih CDF-Senthang humhaknak hmunram chung, sualnak ngeilo mipi hna an umnak Khuapi khua cu tinhchih tein Mi-35 in bomb a thlak.
Cu hnu ah CDF-Senthang rianṭuannak ah a biapi bikmi (Central Executive Office) zung (Sinai Camp) zong bomb a thlak ṭhan caah CDF-Senthang in (Assistant Secretary General) nih ram le miphun caah a nunnak a pek pin ah minung 4 nih hliamhma an tuar. Ram le miphun caah nunnak a pe tu pasalṭha cu CDF-Senthang nih upatnak sangbik kan in pek i, tantakmi chungkhar hna zong kan in ngaihchiatpituk hna, tiah Chinland Defense Force-Senthang nih ngaihchiatpinak cathanh an chuah.
Hramhram in uknak a la tu SAC ralhrang nih mipi hna cung ah minung lungput zong ngeilo in a tuahmi cu mit in hmuh a si i, mah bantuk a tuahmi le mah zawn lawng ruat, chiaṭha thleidang lo in a tuahsernak cung ah CDF-Senthang nih faakpi in kan doh. Atu bantuk in CDF-Senthang nih uknak a la tu SAC ralhrang tuahsernak kan dohnak hi kum 2 tluk deng a si cang.
Cucaah SAC ralhrang nih aa tinhmi le aa ruahchannak cu mipi hna he hmunkhat ah ṭangṭi in a hrambongh ding le (Justice Federal) kan hmuh hlan tiang, mipi hriamtlai phu hna simi CDF, PDF hna he a dihdongh tiang kan doh ṭi lai, tiah Chinland Defense Force-Senthang nih cathanh an chuah.
Chin Ramkulh March Le April Thla Chung Ah SAC Raltuknak Vanlawng Nih Bomb 121 Leng A Thlak; Mipi 24 An Thi; 2023 March le April thla, thla hnih chung ah Chin ramkulh ah SAC ralhrang raltuknak vanlawng nih Bomb 121 leng a thlak tiah Chinland Information Center nih May 8 ah thanh ca an chuah.
Hi thla hnih chung ah vanlawng Bomb thlak hnawhnak in CNA ralkap minung 2 telh in mipi 24 an nunnak a liam i minung 33 hliam an tuar. Mah pin ah Khrihfa biakinn 4 telh in mipi inn 50 leng a rawk. Mah thla hnih chung, Chin ramkulh khua 4 ah Bomb 22 leng a thlak i a dang Bomb 99 cu khua kiangkap ah a thlak tiah cathanh chuah mi ah an langh ter chih.
Mocha Cyclon Thlichia Ral Tih Ah Khuate Mi Cheukhat Neihniamnak Khuapi Chungah An Zam; Bandgladesh rili in aa thok ding Mocha Cyclon thlichia hran lai ruah ah Ayerawaddy ramthen, Laput-ta peng khuate hna cu neihniamnak khuapi chungah an zam hna tiah kan theih.
May 6 ni in thlichia ral tih ah Ayerawaddy ramthen cheukhat cu khuapi chung ah zam an thok cang tiah mibawmchan tu phu nih an chim. Mah pin ah Laput-ta khua sianginn, phungki sianginn, pawngkam khua pi le Myiang-mya khuapi hna ah thlichia tih in a rak i dor mi a thong renglo an phan cang. Myanmar ram chung tamdeuh ah thlichia hran tik, mi bawmhchanh nak thilri le a dangdang kong timhtuahnak an ngei cio hna tiah kan theih.Credite; Lungmili Post