Zeitindah Thantlang Khuapi Chung Suingun, Chawva, Mansung le Eidin Vialte Hi Kan Himter Ning A Si Hnga?

Zeitindah Thantlang Khuapi Chung Suingun, Chawva, Mansung le Eidin Vialte Hi Kan Himter Ning A Si Hnga?
=============
Kan Thantlang khuapi cu chuahtak a si cang! A chung um suingun chawva, mansung le inn le lo vialte zong a ciam viar sual lai ti phan a um ngaingai. Ral kan tuk tikah zeidah kan miak i zeidah kan sungh timi ruah chih peng a hau. Ral lio ah chawva kong hna cu nunnak kan him ah a za chawva cu kawl khawh a si ti lawng in ruah ding a si lo. Ram tthawng nih ral an tuk tikah a chung um an zoh chih zungzal.

Cucaah Thantlang khuachung um thil le ri khi zeizat dah kan lak tthan khawh lai? Zeizat dah kan himter khawh lai i, zeitluk tlawm in dah kan sungh lai i, ral kan tei fawn lai timi ruahchih ngaingai a herh. Atu lio SAC ralhrang cu minung lungput a keng lomi an si caah, Thantlang khuachung thil le ri vialte an sawksam viar khawhmi a si.

Cucaah laikhal thluak in hei tuak in hei ttial ve ninglaw, Dawr ngei paoh nih motor hlang hna sehlaw, CDF ralkap nih lam tte kip le pawngkam in congh hna sehlaw, an thil zingzan herh deuh paoh, facang, chiti, mehhang le datsi tbk pawl kha a rannak in motor ah ttin i a himnak, CDF uknak area lam naih bik ah thiar hna sehlaw, cuti cun kan sunghmi a tlawm kho deuh hnga. Raltuk pah zong in a thiarmi rak um ve khawh tthiam a si ko. A thiarnak kong thluak cu keimah nakin nan theih deuh lai. Ka hei chim duh bikmi cu zeitluk tlawm dah kan sungh lai? timi lam kha kawl izuam usihlaw, ti kha ka duhmi si.

Khuate nih an izalhmi thilri nihcun kan ralkap pawl cawmnak cu chim lo anmah khuate ca hmanh a deih lo. Cucaah Thantlang khuachung ta kha a rannak in lak zokzok i, CDF ca lila zong ah a tthahnem. Raltuk pah, thilri zong laknak caan a rem ahcun lak pah, thiar khawh mual paoh thiar thluahmah ve.

Mahti cun kan sunghmi a tlawm deuh lai. A bikin ichawhlehnak a simi, CDF nih an hman bikmi Datsi hrimhrim hi cu Thantlang khuachung ta, dawr ta a taangmi paoh i la kho viar sehlaw, a ttha. Khuate nih an ngeihmi datsi a dih viar cang. Kan ralkap chawhlehnak zong an ngei ti lai lo.

Raldotu zong um hna seh, mi vengtu zong um ko hna seh. Thilri mansung, zingzan herh a thiartu zong um ve tthiam hna sehlaw, kan sunghmi a tlawm deuh lai ti keimah pumpak hmuhning a si. Dawr ngeitu nih a dawr thil a lak lio CDF nih a venpiak ahcun lawmman tampi zong hlu ve ko hna seh. Cun an herh deuhmi zong hlu ve tthiam ko hna seh. Pakhat le pakhat ibawm hna sehlaw, kan sunghzatlak mi a tlawm deuh lai.

Comment zong ah atu na tialmi nakin hiti deuh in a ttha lai timi ruahnak zong van chuah cio hnik ulaw, zeitindah Thantlang khuapi inn le lo le, a chung um hlawnthil kan himter khawh bik ning a si lai timi kha ruahnak van langhter cio hnik uh. Credit: Free Voice