Zeitindah Taliban Nih Afghan Cozah An Thlak?

Zeitindah Taliban Nih Afghan Cozah An Thlak?
=========
Tulio vawlei a hnin bikmi thawngpang cu zetindah Taliban tapung nih US le NATO bawmhmi Afghan cozah an thlak khawh? Taliban cu mi zeidah an si? zeiruangah an thawn? mi zeidah a bawmtu an si? Taliban nih cozah an tlaih ahcun zeidah a cang kho timi hi aho paoh nih theih duh le hngalh duh ciomi a si. Mah thawngpang nih social media cahmai le kan zatlang biaruahnak ah hmunhma an laak dih caah a chunglei an sining a thei rih lomi caah theih phu, hngalh phu a si. A thei ciami ca zongah icinken phu a si.

Taliban Tapung An Thawknak; Taliban timi cu siangakchia tinak a si an si. Muslim siangakchia hna nih an rak thawkmi phu si dawh bik a si. Taliban hna nih Afghan ram hi atu hi a voihnihnak an laak a si. 1989 ah U.S., Pakistan, Afghanistan le Soviet Union (Russia) nih Geneva khua ah Afghanistan rampi zalonnak pek ding in minsen an rak thut I, Soviet Union ralkap 100000 cu Afghanistan in an rak chuak. Mah an chuah le cangka in Afghanistan ram ah miphun hoih le biaknak hoih in ral an rak tho.

Mah lio caan ah Taliban pawl nih Islam phung kan hman lai, Quran bible ning in phung le lam kan zul lai, a zul lomi hna poah dantat an si lai. Ziknawh le eihmuarnak vialte kan hloh lai” ti in an mipi cu an soilem hna caah Taliban pawl cu Afghanistan ram ah a thawng bikmi tapung phu ah an I chuah. 1996 ah Taliban nih Afghan ram hmunhma tam deuh cu an laak khawh caah cozah an ser. Afghan ram chaklei tu cu mujahedeen timi phu nih an laak I an uk ve hna.

Taliban ralkap hi atu lio ah minung 30000 in 40000 kar an sl lai tiah zumh a si. Taliban pawl nih Nu a simi paoh sianginn kainak nawl, rian tuannak nawl an phih hna. Nu simi paoh hmai khuh loin leng chuah an onh hna lo. Nu le pa a thium rih lomi hmun khat I an hmuh hna ahcun faakpi in dan an tat hna. Music vialte an phih, fir ruangah kut tan an si. Nu nih padang a duh ahcun lung in cheh a si. Muslim a si lomi paoh a phunphun in dantatnak le harnak an pek hna. Khrihfa tampi zong an tlaih hna an hrem hna I an thah hna. Buddhist temple zong tampi bom in an puah I an rak hrawh.

Taliban pawl hi phaisa in tam bik a bawmtu cozah hna cu Iran, Pakistan le Ruassia an si an ti. Saudi Arabia, United Arab Emirates le Qatar ram I mirum cheukhat zong nih phaisa fang in an bawmh hna ti a si. Taliban nih an uk khawhmi khua in ngunkhuai an laakmi zong telh chih in kum khat ah phaisa bawmhnak an hmuhmi cu US $ 500 million tluk a si lai tiah an zumh. Cun pin ah bing le rit-hai sii an zuar mi in an hmuhmi phaisa cu kum khat ah US $1.5 billion in 3 billion tluk an hmuh lai ti a si.

Sep 11 le Afghanistan Raltuknak; Taliban hna nih Afghanistan cozah an tuan chungah Muslim ralhrang, Osama Binladin hruaimi, Al Qaeda ralhrang pawl cu zalong taktak in umnak an rak pek hna. Vawleicung rampi in muslim ralhrang an ra I, Al Qaeda ralhrang ah an rak lut hna. Training tha tein an tuah hnu ah American a simi poah tuk le tha an I zuam. September 11, 2001 ah Al Qaeda ralhrang hna nih New York khua I, World Trade Center innpi pahnih cu vanlawng pahnih in an suk I, an hrawh. Minung 3000 dengmang an thi. US ralkap Head Quarter a simi Pengaton zungpi zong vanlawng in an suk caah tampi a rawk.

President Goerge W Bush nih Taliban cozah cu Al Qaeda pawl le an hruaitu Osama Binladin US sin ah up le kuat dingah a hal hna. Taliban nih an pe duh hna lo. Mah ruangah President Bush nih US ralkap le NATO ralkap hmang in Afghanistan cu a tuk. Afghanistan I a ummi Mujahedeen tapung nih US le NATO cu an bawmh ve hna I, Taliban pawl cu an tei hna caah, an hruaitu hna le Al Qaeda hruaitu cheukhat a thi lomi paoh cu Pakistan ram ah an zaam dih. US nih Afghnistan ah hin ralkap 100000 tiang a rak chiah balmi a si. Asinain Obama le Trump nih tlawmpal tete in an laak than lengmang hna caah Joe Biden President a si ahcun US ralkap 2500 lawng an tang cang.

US Cozah Nih Afghanistan Caah An Hmanmi; US le NATO ralkap Afghanistan ram ah kum 20 an um chungah US $2 trillion an hman ti a si. US ralkap 2400 renglo nih an nunnak an pek. Donald Trump President a si hnu ah Taliban pawl he voi 9 ceihmainak an ngeih hnu ah 2020, February thla ah Qatar ram, Doha khua ah remdaihnak an ser. US ralkap vialte 2021 kum cheu hrawngah chuah dih ding, Afhganistan ram ah zeibantuk ralhrang hmanh umter lo ding. Afghan ram I ummi US mi vailte himnak hnursuan lo ding.

US a ralmi phu a simi paoh hriamnam le phaisa ibawmh lo ding. US le NATO ralkap vialte an chuah dih hnu ah Taliban nih US an tlaihmi minung 1000 chuah than ding le US nih Taliban pawl an tlaihmi minung 5000 chuah dih ding, Afghanistan cozah, Taliban tapung le Afaghnistan ramkhel riantuan mi vialte tonnak ngei I, Afghanistan I hruainak road map ser ding” timi kaphnih lungtlinnak an rak ngei.

Kap hnih lungtlinnak an tuah hnu ah President Trump nih a chimmi cu, Taliban nih mah vialte daihnak caah ceihmainak caan kan hmanmi vialte hi pakpalawng si loin tuahsernak in an kan hmuhsak hrimhrim a herh tiah ka zumh, asinain thil tha lo an chuahpi than ahcun kan ralkap an kir than lai I, ahohmanh nih nan hmuh bal lomi tuahsernak an cungah ka tlunter lai” tiah a hro pah in a chim. Mah lungtlinnak an tuahmi cu US President thar, Biden zong nih a lungtlin pi ve hna.

Afghanistan Cozah Taliban Nih An Thlaknak; President Biden nih April 14, 2021 ah US ralkap vialte cu Afghanistan ram in September 11, 2021 ah a ka laak dih hna lai tiah a thanh. Cu a thanh le cangka Taliban tapung pawl nih September 11 hmanh hngak duh ti loin caantha an laak I, Afghan chaklei kam in ral thawh hram an I thawk I, Afghan cozah cu an tuk colh hna.

US le NATO ralkap hna nih Afghan ralkap pawl cu kum 20 chung tha tein training an pek hna. An herhmi hriamnam vialte zong an pek hna. Asinain Afghan cozah le ralbawi chungah eihmuar le ziknawhnak in an khat. Ralbawi hna nih ralkap cazin a hleihluat in an tuah I, reng niam ralkap pawl pek dingmi vialte an I hleip, eihmuar ziknawhnak tampi an tuah caah raltu taktak mi, ralkap sawsawh pawl cu meithal, kuanfang le riahcaw hmanh an i ngei ti lo. Mah lio caan ah US ralkap nih Afghanistan ram in chuah an i timh caah ralkap sawhlawh pawl cu an lung a dong I ralktu an zuamh ti lo. Mah ruangah Taliban pawl nih an tuk hna zongah Afghan ralkap nih an let duh hna lo I, Taliban pawl nih meithal puah huaha loin khua khat hnu khua khat, peng khat hnu peng khat in an laak.

August ni 15 ah an khualipi Kabul an hung phan. Biden cozah nih Kabul khua laak khawhnak dingah ni 90 a rau lai tiah an tuakmi cu ni 10 ah fawi tuk in Kabul khuapi cu Taliban hna nih an laak dih. Kabul vanlawngbual pakhat lawng hi US ralkap nih an humhak mi a si caah a laak khawh lomi a si. Afghan President Ashraf Ghani le Vice President Amrullah Saleh cu September 15 ah a thilri hmanh la huaha manh loin Uzbekistan ram ah a zaam, zankhat an riah hnu ah UAE (United Arab Emirates) ram ah an zaam chin. President Ghani nih a chimmi cu thisen tam tuk chuah lai ka duh lo caah mah lam hi ka thimmi a si tiah a chim.

Joe Biden Cozah Nih Taliban Cungah An Dirhmun; Taliban nih an khualipi Kabul an laak ti thawng an theih le cangka, Taliban a dotu hna, US le NATO ralkap a bawmtu hna, UN riantuantu hna, NGO le INGO ah rian a tuanmi hna, Taliban duh lo le tih ruangah Afghan ram in zaam an duhmi vialte hna cu Kabul khualipi I, Hamid Karzai Airport cu an rak ipawng dih hna. Zaam a duhmi minung an tam tuk caah khuaci an mui. US ralkap vanlawng nih chun he zan he an thiar hna i, an himnak hmun ah an va pongh lengmang hna. Rianrang tein zaam a duhmi minung an tam tuk caah vanlawng thla tiang in an I awk I, minung 3 tiang vanlawng in an thla i khuaci an mui.

President Biden nih TV in bia a chim mi cu Afghanistan cozah an tlakmi cu anmah Afghanistan cozah nih anral tuk an duh ti lo ruangah an zaam. An President tiang in a zaam. Afghan ralkap hrimhrim nih anmah caah raltuk an duh ti lo. Afghan ralkap 300000 tiang traning tha tein kan pek hna, thla hlawh zong kan pek hna. hriamnam tha tein kan zalh piak hna. Van ralkap zong tha tein kan cawmpiak hna. Anmah hmanh nih an tuk duh lomi cu US ralkap nih tuk piak dingah rian kan ngei ti lo” tiah White House in a chim.

Taliban tapung nih August ni 31 hlan ah Afghan in a chuak dingmi vialte nan chuak dih lai tiah US cozah cu ralrinak an pek hna. President Biden zong nih rikhiah mi ni al duh loin, August 31 hlan ah US citizen le US le NATO a bawmtu hna le Afghnistan in chuah a duhmi vialte chuahpi ding in a zuam ve. ISIS pawl nih August 27 ah Kabul Airport pawngah nunthap in bom an puah pahnih an puah I, US ralkap 13 an thi midang 160 tluk hma an pu. Mah ruangah Afghan ram in chuah a duhmi hna caah August 31 tiangah an dihlak in an chuahpi khawh hna lai zumh a um lo.

Kabul vanlawng bual zongah himnak a um hlei ti lo caah Kabul vanlawng bual in chuah dingah ruahnak an I pekmi zong a um. Septeber 27 zan ah khan President Biden nih US rakap cu Kabul vanlawng bual bom puah ruangah tuanvo ngeitu, ISIS an umnak hmun cu drone in kah dingah nawl a pek bantuk in an kah hna i ralrang 120 tluk kan thah hna an ti. Asinain mah ruangah US citizen pawl an him lo chinchin lai tiah Joe Biden cu an soisel. President Biden nih zeitin hmailei ah a tuah te lai timi hi mipi nih an cuanh cuahmah lio a si.

President Joe Biden Soisel A Tong; President hlun Donald Trump le Republican hruaitu hna nih cun President Biden cu US ralbawizik, commander in chief riantuan dingah a tlak lo, ningcang tein kan ralkap a chuahpi kho hna lo, a rian a tei lo caah a rian in a phuah ding a si tiah an ti. Senator cheukhat le House representative hna zong nih Impeachment tuah dingah an au hnawh lio a si.

Hmailei Ah Zeidah Cang Kho; Taliban nih Afghnisatan ram cu a dihlak ti awk in an laak cang caah cozah an tlaih lai a fiang cang. Taliban cu US a do zungzal tu ralhrang a si caah Afghanistan ram ah ralhrang tampi nih hmunhma an khuar than lai. Vawleicung ram kip in ISIS le Al Qaeda le Muslim ralhrang pawl an ra lai I, US tuknak caah traning tuahnak le cawlcanghnak caah hmunhma tampi an khuar lai, ralhrang a bawmtu bik a simi, Iran le Pakistan ram karlak I a ummi ram a si caah ralhrang caah vanram bantuk a si lai tiah zumh a si. Taliban tapung pawl a duh lomi hna le cozah dohtu hna tampi cu ramdang ah an zaam lai I, refugees tampi an karh lai. US zong nih thong tampi an laak te hna lai tiah zumh a si.

Biafunnak; 2001 September 11 i, New York khualipi I, World Stade Center pahnih vanlawng in an suk I, minung 3000 tluk an rak thih bantuk puicimhnak ton lai hi US ummi nih phan bikmi a si. Covid-19 ruangah US sipuazi tampi a tla, minung tampi nunnak a liam. Asinain Covid -19 khamhnak si an serchuah khawh I, kan I chun I zawtnak a reh lei a panh, US sipuaizi a tungmer than lai tiah ruahchannak kan ngeih lio ah atu bantuk in Afghanistan ram ah ralhrang hna nih cozah an thlak I cozah thar an tlaih than ding ruah tik ah US caah himnak a zor, ruahchannak nakin lungretheihnak a chapter tu a si deuh tiah ka ruah. August 27, 2021, Muko Mekazin September 2021. Credit: Salai Lairamthang