Zeitindah Kan Au Lai? Lailei ko hi ka lungre nan thei pah

Zeitindah Kan Au Lai?
=============
Thaikip lei cun tleicia Dr. Sang Awr bia hun i lak ahcun ‘mi ninghngal’ pawl nih ram mi kan maivai (internet) hman ning kha Tuluk thiamsang pawl i ruaih in an kan chekhlat cang lai. Tuthla 28 tiang vawleipi he pehtlaihnak chah dawh ti zong thawng a chuak.

Lailei ko hi ka lungre nan thei pah. Nain nan ṭih lo ti ka hmuh tikah ka tha a tlung ṭhan. Ka chungkhat chung in Cozah rianṭuan pakhat nih nizaan ah CDM ah a rianṭuanṭi hawi dihlak he hman an i thlaknak le an i telnak a hun ka chimh. A bia ka hun char. “Kan miphun kan khua ram mipi nih duh lo mi uk tu sin cun kan i ttom kho ve lo tihi kan lungput a si” a ti. Kai uang. CDM ah zeitluk in kan chap khawh lai timi le CDM hi zeitluk in kan tlaihbawh khawh lai timi lawng a tang cang ko. Hi cenghngia pawl reem khawhnak cu an sin i ṭom lo kha a si ko. Ngunkhuai pek lo ding. Ralkap chawlehnak paoh cawk lo ding, lottery hmanh cawk lo ding ti khi atulio ah kan tuah khawh mi a pelpawi ah an cang.

Khah ka tlangtar ka pial ai lai. Hakha Thantlang mipi leng ah nan chuak i nan au kan in hmuh hna ahhin a langtlang nan sin ai tel kan lo. Kan i nuam tuk. A bik in Halkha khuapi nan lamzawh ko hi lung a hmui. Kan khualipi a si. Media nih zuldawi peng ko hna usih. Khat lei ah kan tlangau ning tlawmpal hun char ka duh. Kawlrawn ahcun Kawl nih an kan chilh tuk i an au mi hi a tlangpi pasarih hna hi l a tanglei bang an si.

1. Buchoh pek mi raltuk thiamnak – mipi thahnak ca ah a si loh! 2. Democracy ngahnak – kan rian! 3. Daw Suu le U Win Myint – an nunkhua sau in dam ko hna seh. 4. Tlaihkhih tong mi ramkhel upa hna thlah ding – kan rian. 5. Mipi power – mipi sin ah kan pe uh! 6. Aho Party dah mee nan pek – NLD! 7. Aanasin thlak ding – kan rian! ti hna hi an si. A tlangpi in kan lung a tling ve ko. A au zong kan au ve ko. Asinain, kan hmuitinh taktak cu a kheng lo. Cu ca ah Tkangcung mi hna nih kan au ve ding taktak ah ruah a phu. Kachin miphun hna nih an au mi hi ka lung a tling ngai te. Laitlang zong ah au ve usih ti ka duh. Hitihin an au.

1. Aanasin hrambongh ding ah – mipi kan rian! 2. Federal Democracy ran serchuah ding – mipi kan rian! 3. 2008 phunghram hrawh ding – mipi kan rian! 4. Mah te khuakhan lairel khawhnak le Federal ramkomh a sertu phunghram chuah ding – mipi kan rian! 5. Panglong biakam nunter ding – kan rian! 6. Tlaihkhih tong mi rankhel rianṭuantu hna thlah ding – mipi kan rian! 7. Ralkap cozah kan duh lo – kan duh lo. Pasarih tlinnak ca ah pasarihnak khi ka van chap.
Kawl mipi cu an thin a lin. Hruaitu Daw Suu chuah ding le 2020 thimnak teitu, mipi cozah nunter ṭhan hna a tutiang a biapi in an aupi. A puan deuh ko tiah ka ruah. Cu ca ah Tlangcung mi nih cun a cunglei au ning phun hi i thim usihlaw Media ah biatak deuh in cuang kho seh ti ka duh ngaingai. Credit: Salai Tial Hram Ling