Zeiruang ah dah Ralkap nih aana a ting, Tuluk Nih Aana A Tingter Timi

Zeiruang ah dah Ralkap nih aana a ting, teinak lam tah?
==========================
1. Vote fraud ruang ah a si lo, 2. Tuluk nih aana a tingter timi zong a si lo, 3. ICJ, ICC tih ruang zong ah a si lo, 4. Ralkap ngeimi sipuazi rawh tih ruang zong ah a si lo, 5. Rule of law um lo ruang ah tiah an puhmi zong a si lo, 6. Corruption a tam tuk ruang zong ah a si lo, 7. Democracy ram ah Free le Fair Election a um lo democracy principle a tlau tiah ralkap nih a ti ruang zong ah a si lo.

NLD cozah chan chung lio ah Kawlram cu ramkhat cozah pahnih tiah an rak ti tawn, โ€œOne country, two governmentsโ€. Uknak a muru taktak cu Ralkap thiamthiam an rak si. Home affairs, Border affairs, Defence, GAD timi General Administration Department timi uknak, pennak, riantuannak le palek, thonginn uknak, fire dept. tibantuk thawk in uknak a muru le mipi humhimnak a muru kha Ralkap nih rak uk dih a si ko. (GAD hi 2019 ah office of the Union cozah kut ah Minister Min Thu kut ah an rak chiah nain hlawh a tling lo). Chim duhmi cu Uk nak a pipa cu Ralkap kut ah a rak um i NLD cozah cu hmai ah chuahtu ramleng mileng nifa tontu le meeting thu i budget le tender le infrastructure ser le, khualtlawng le Covid kong buai ti pawl ah le nifa kan pi cu Covid kong ah zoom in kumkhat hrawng mipi chawnhnak a ngei ti pawl deuh hi biapi in an rak tuah. Mawhchiat si lo in thil le uknak sining. Ralkap nih uknak a muru 70% hrawng a lak i NLD cozah nih 30% hrawng a ngeihmi kha ruah lem loin, NLD zong nih ralkap zei a rel lo a uah cun ralkap zong nih power ngei taktak lomi NLD cozah kha zei a rel ve lo i i chawnh biaknak le chunglei i theihthiam le i komhnak an ngei lo. Ralkap nih UEC kong Emergency Hluttaw auh ding pawl zong zei a rel piak lo ralkap a thinhungter nain mah hi aana tingnak a ruang cu a si thiamthiam lo.

Pahnihnak ah 2008 phunghram hi Ralkap nih zeitik paoh ah aana ting than khawh ding caah rak sermi phunghram a si. Pohma 417 khi tha tein zoh ahcun Ralkap bawmhmi cozah a kai lo paoh ahcun Election dih ah 417 nih hramhram in aana lak aa timmi dirhmun a phak tik ah National Defence and Security Council (NDSC) meeting auh i State of Emergency kum khat thanh ding. Cu ti caan a chuah tik ahcun 418 ning in uknak aana cu ralbawizik Ka-choh sin ah ap ding ti hi a si caah 2008 rak ser thawk in ralkap nih uknak muru tlaih zungzal ding le tlaih khawh lo le ralkap zei relomi cozah cu thlak lengmang khawh ding in an rak ser mi a si.

NLD chan lawng si lo in Thein Sein chan zong ah uknak a muru taktak hi cu ralkap an rak si peng i democracy ram taktak zong kan rak si lo. Cucaah nihin tiang hi ralkap nih atu tiang an kan ukpeng tinak a si i NLD chan ahcun a hnulei in an kan uk thiamthiam. Zungzal Uknak a muru taktak tlaih in uk peng aa tinhmi a si. Anmah duhning in a kal lomi cozah le Ralkap zei rel lomi cozah cu thlak i anmah duhmi le an mah nih hnulei in behind the screen in uk khomi party maw cozah ser lawng hi an rak i tim pengmi a si. Ralkap nih 70% uknak in cozah nih an bia an ngeih lo caah 100 ah aa thial. Cucaah Election hlan zong ah kawlram cu democracy ram taktak kan si rih lo hi tiah rak au peng a si.

Ralkap nih Kum sau tuk an rak kan uk peng tik ah GAD thawk in cozah ministry le department paoh ah ralkap chuak le ralkap hmapu hi hmunhma a rak pek dih hna, GAD i DD, AD, Director le DDG, DG pawl hi ralkap lawng te an si (85-90%) pin ah DICA zong cu thiam Ministry of Commerce zong cu thiam Customs zong, khoika zung paoh paoh. Keimah ka riantuannak ah Dept 14 chung ah kum 4 chung ah AD, DD le Director hi kumkhat voi khat rotation tuah a si i minung 120 leng hi ralkap chuah le ralkap chungkhat lawngte deuh an si tik ah cozah riantuannak a chung umtu ning hi ralkap strategy le minung lawngte a rak si. Atu CDM cawlcaanghnak zong ah hin a cdm taktak mi hi tanglei staff lawng ngawt an si, DD, AD, Director le DDG, DG rank hi cu 3 -5% tling dawh in ka hmuh lo. Lungzornak ah tialmi si lo in thil sining a si. Cucaah CDM lawng zong in kal khawh peng a si lo. Sizung ah cdm an tuah tik ah ralkap sizung i a tuanmi ralkap sibawi 5000 kan ngei substitute kan tuah lai an ti colh. Staff thar ka auh lai a ti colh. Heh rian a phuah hna. Cozah hi anmah ralkap nih kum saupi rak sermi a si tik ah bawi deuh i ralkap minung le ralkap chung le usdp chung pawl deuh an tam i an hram a fek.

NLD cozah a kai ka hmanh ah kan pi nih Ministry of State Counsellor office ah aa thawh rianmang i Rakhine issue i a rak au lenmi Kyaw Tinh swe kha Minister of State Counsellor ah rian a pek. Hi pa hi Ralkap cozah chan ah MOFA ah a tuan i cun UN Representative a rak si. Daw Suu Depayin thahtinhnak le Myanmar National Human Rights Commission ah Vice chaiman a rak si ralkap hardliner phun a rak si, NLD doh tu le ralkap minung a rak si. Hi pa hi amah zung bak ah minister a pek hnu in hipa minung pawl hlan lio ralkap minung pawl Min Thu, Taung Htun, Soe Win, Aung Htoo te pawl tampi wungyi rank le riansang a pek dih hna i kan pi Suu he niahniam taktak in rian an tuan, tu le tu meeting an tuah, pi Suu hmanh hi anmah NLD hlan minung nih ton khawh lo ding in a pawng in an kham. Union minister pawl le State Region CM pawl zong nih zei decision hman lak ngam lo in zei poah kan pi sin ah tin dih a si tik ah State Counsellor zung ah a phan dih i hi pa kut ah zei paoh a phan tiknak a si. A duhmi lawng kan pi sin a kaiter. Kan pi nih le Union Peace Conference, 21st century Panlong agreement ah hmai a tlak tuk bantuk in a um nain voice a ngei lo pin ah timhtuahnak a tlawm, sipuazi le hmai a tlak lo, federal ralkap hna ser lo in rianpipa khinh lo in. chim duhmi cu mawh chiat si lo in Uknak a muru cu ralkap an rak si peng tinak a si.

CDM lawng in tei khawhnak a fawi lo, Mipi lawzawh a thawng tuk ko nain an kah tik ah a si kho fawn lo, federal ralkap ser i kah ding zong ah budget le hriam a herh. Cu caah a bik in a herhmi cu tamadah UWM nih VP MWKT kha power aap zok seh, tamadah thar nih CRPH kha ramkip le UN legitimacy lak zoh in US i dollar nuai 1000 kha hal seh (budget lo in hriam tlaih khawh a si lo), tlangcung mi le mipi ralkap ser seh, budget le hriam a pek khawh hna ahcun hlawh a tling ko lai, Cu kar ah a biapi mi cu 2008 phunghrm hrawh zok seh, federal phunghram a hrang fehter seh asiloah caretaker maw interim Inn-hngak cozah ser ding ah lung tlingnak hal seh, federal phunghram pi tial le remh in general election tuah seh law teinak hmuh khawh a si lai. An riantuan a nuar tuk ahcun caan tha hi hlan bantuk in a paam tuk sual lai, nunnak tampi thap hlan le thi tamtuk a luan hlan ah teinak lam phung kip in cawlcaangh a hau cang. Credit: Dr. Sui Hingz