Zaw Min Htung nih Kawlram mipi ralrin an kan pekmi cu a mak kho tuk ee!

Fangkhat Nan Bawmh Hna Zongah Thih Ding Dantatnak (သေဒဏ်) Pek Nan Si Lai-Zaw Min Htung!
=======
NUG, CRPH, PDF/CDF sinah fangkhat/piakhat nan bawmh (hlut) hna zongah thih ding dantatnak pek khawh nan si tiah September 19 ni ah SAC ralkap thawngchim tawntu Zaw Min Htun nih thihpheih le tlerhkhonhnak bia a chim tiah theih a si.

“Fangkhat/piakhat bawmh le hlutnak in kum 10 thongthlak asiloah thih ding dantatnak tuah an sinak cu Pohmah 54 an buar caah a si ti i fian a hau, upadi theih lo ruangah tuah sualmi a si zongah ka chim ning bantukin dantatnak cu a um tho lai” tiah SAC ralkap thawngchim tawntu Zaw Min Htun nih a chim.

“Hi dantatnak chungah hin ralhrang bawmhchanhnak caah phaisa bawmhnak, bond cawknak, lucky draw cawknak, online in tangka hlutnak tibantuk pawl vialte ai tel dih, ka tuah manh zong ka thei bak lo tiin solhphelh bia chim zongah upadi ning tho in dantat nan si lai” tiah a chim chap tiah theih a si. SAC ralkap uknak a dohtu mipi thazang a thawn chin lengmang caah atubantukin faak ngai in cawlcanghnak le phihkhamnak an tuah hi a si tiah theih a si.

Hpakan ah SAC ralkap nih an i bochan ngaimi pyituhsit hruaitu thah a tong. Kachin ramkulh, Hpakan ah SAC ralkap nih an i bochan ngaimi pyituhsit hruaitu pakhat meithal kah in thah a tong tiah theih a si. Hpakan peng, Nantya(နန့်ယား) khuami pyituhsit hruaituU Htun Htun Oo cu nihin September 20, zinglei suimilam 7:30 hrawng ah cycle aa citmi meithal hriamtlai 2 nih an kahthah tiah theih a si.

“Pyituhsit htuaitu U Htun Htun Oo cu SAC ralkap sinah zaan a riak, zinglei inn a ṭin lio an inn hmai ah kahthah a tong, a meithal zong an chuh” tiah khuami pakhat nih a chim. “Amah cu SAC ralkap a ṭanh taktak tu a si. SAC ralkap zong nih an i bochan ngaimi a si, kahthah a ton lio ah aa tlaihmi meithal chuh a tong” tiah Hpakan khuami dohtglennak ah cawlcanghnak a tuahtu mino pakhat nih a chim. U Htun Htun thah a tonnak kong ah SAC ralkap an thin a huntuk caah, nihin September 20 zinglei in Nantya(နန့်ယား) SAC ralkap umnak tlangin ralkap hna nih hriamngan cu a ruang um loin an thlah/puah tiah khuami hna nih an chim.

Myaing Peng Saikaung Khua Cu SAC Ralkap Nih An Khangh Caah Inn 40 Leng A Ciam, PDF Ralkap Pakhat Thah A Tong. Magway ramṭhen, Myaing peng Saikaung(စိုင်ဂေါင်း) khua cu SAC ralkap nih nihnih chung pehtlaiin an khangh caah inn 40 leng a ciam, tiah tualchung mi hna sinin theih a si.

SAC ralkap nih Saikaung khua cu September 18-19 ah mei in an khangh i, inn 45 a ciamh pinah ar-inn tampi zong a kaang, tiah theih a si. “Saikaung khua cu SAC ralkap pawl nih September 18 lio ah an khangh i, inn 5 le ar-inn tampi an kaang. September 19 ah an khangh ṭhan caah inn 40 a ciam. Saikaung khua cu inn 300 tluk a um i, nichuah lei in SAC ralkap le pyusawhti nih an khangh,” tiah tualchung mi pakhat nih a chim.

Saikaung khua cu SAC ralkap nih an khangh hlan September 18 ah PDF he kahdohnak a chuak i, PDF nih 60mm, 80mm le 120mm in an kah hna caah SAC ralkap lei in a thimi le aa hliammi an um ko nain a thimi zat cu fiang tein theih a si lo. SAC ralkap hna cu PDF, Yesagyo, Myaing le Pakokku Pah Kah Phah hna i bawm in an kah hna hi a si i PDF lei in ralkap pakhat a nunnak a liam, tiah theih a si.

KhinOo peng ah rallam a sialmi SAC ralkap bomb puahhnawh an tong 12 an thi 7 hliam an tuar! Sagaing ramthen, Shwebo pengkomh, KhinOo peng chungah, nizaan September 19 zaanlei ah SAC ralkap hna cu tualchung hriamtlaiphu nih kan kah hna tiah PDF hruaitu hna nih an chim.

YeeOo taingyin siinn(တိုင်းရင်းဆေးရုံ) ah umhmun a khuarmi SAC ralkap hna cu, nizaan September 19 zinglei sml 3 hrawngah motor 3 in ralkap 60 hrawng cu KhinOo peng, Mindaung khua ah umhmun an khuar. Cu Mindaung khua ah umhmun a khuarmi SAC ralkap hna cu, MoeTinchaung(မိုးတိမ်ချောင်း) khua ah umhmun a khuarmi an hawi le sinah an kal.

Cu ni zaanlei ah cun, YeeOo in KhinOo lam lei ah bomb kan thianhhlimh lai tiin rallam a sialmi SAC ralkap hna cu PDF nih bomb kan puahhnawh hna i SAC ralkap 12 an thi tiah KSO ralkap hna sinin theih a si. KSO ralkap pakhat nih “atu bantukin rallam an sial lai kan theih caah, bomb kan hmanhnak a si i, khuami hna zong bomb kan hmanhnak ah kal rih lo dingin ralrin kan pek hna i rallam a sialmi SAC ralkap hna cu timhcia tein kan hngah hna hnuah bomb hmanhcia mi le drone in kan kahdoh hna i SAC ralkap 12 an thi 7 nih hliam an tuar.

KSO ralkap pakhat cu a tutiang kan sin a phan kho rih lo i zeiti a um kan thei lo” tiah a chim. SAC ralkap hna cu, a thimi le hliamtuarmi an tam caah, khuachung ah hriamngan an kah i Maukpat(မောက်ပတ်) khuami nu pakhat nih hliam a tuar.

Pakokku pengchung kahdohnak ah SAC ralkap 4 an thi, 2 nih hliam an tuar. Magway ramṭhen, Pakokku peng September 19 chunhnu ah SAC ralkap le tualchung hriamtlai phufonh kar kahdohnak a chuak i SAC ralkap lei in minung 4 an thi, 2 nih fakngai in hliamhma an tuar tiah Urban Underground Revolution Force Yesagyo nih an chim.

Pakokko peng le Yesagyo peng aa tonnak Bunekan(ဘုန်းကန်) khua ah umhmun khuarmi SAC ralkap minung thazaang 20 leng cu September 19, chun hnu suimilam 3:00 hrawng ah UURF telhin phu 7 fonh nih kan kahdoh hna tiah UURF Yesagyo in chim phuannak nawlngeitu Bo K Chit nih a chim.

Kanmah lei nih hriamngan le hriamhme hmang in suimilam pakhat tluk hrawng kan kah hna, pakhat cu kan kahnak hmun ah a thi colh, minung 5 nih fakngai in hliamhma an tuar. Sizung kalpi ding in motor nih a don hna ah motor cung ah 3 an thi ṭhan” tiah a chim. SAC ralkap lei nih an kan kahdoh ve na in, kanmah lei hliamhma tuarmi le a thimi um lo in hnu kan tolh kho tiah Bu K Chit nih a chim. Credit: The Chin Post