Zalawnnak Caah Kan Sunghmi Thilri Hi Sungh Asi Loh.

Zalawnnak Caah Kan Sunghmi Thilri Hi Sungh Asi Loh.
===========
MNF nih independence an thanh leh cangka in India ralkap nih Mizoram khualipi Aizawl ah bomd an rak thlak colh ve, Aizawl mipi tampi nih an khualipi an zam tak.

Mizoram ahun buai taktak tikah, an fimcawnnak adir, hmai akal kho ti loh, An sipuayi a dir rih, Miphun tlomte asimi hna nih kan ram kan zamtak pinah kan fimcawnnak tiang adirmi hi cu zalawnnak kan sualmi hi kan tuarmi kan sungh mi le kan hmuh hnga ding hi ai kaih teh lai maw? tiah mipi tampi anrak buai.

Cutlukin arak buaimi le sungh zatlaknak nih akhuhcilhmi hna le an pawngkam State hna nih hnu bik ah an chiahmi hna kha, Pu Laldenga le India Cozah remhnak an tuah hnu ah an vun ihrim than i, atu ahcun northeast State ah fimthiamnak lei ah athangchobik an hun si.

A umtuning cu ram buai lio ah arak buai ve lomi hna kha an lonh hna tinak khi asi, Culawng asi loh. Ram buai ruangah Aizawl khuapi kha micheukhat nih rak zamtak hna hman sehlaw atu ah cun northeat state hna lakah Taih Inn dawh bik le sangbik asakmi an hun si.

Avoi 2nak ralpi lio ah hiroshima le nagasiki cu American nih bomd athlak caah an inn vialte vutcam ah ai cang dih, Sihmansehlaw an ihrim than i atu ahcun vawleicung ah athangchobik mi ah an hun ichuah.

Ka chim duhmi cu zalawnnak kan khel lio ah kan nunnak aliam lawng si loin kan thilri kan inn lo tamtuk kan sungh teh lai. Hi vialte kan sunghmi hi zalawnnak kan hmuh tikah cun zalawnnak asual lomi kanmah nak in athangcho tuk mi hna kha alet in kan lonh tthan teh hna lai.

Cucaah atu ah kan Inn lo kan sungh kan timi hi sungh asi loh, zalawnnak ca tu ah kan thapmi asi, Zalawnnak kan hmuhtikah cun atunak in alet in kan thangcho teh lai , Ziah tiah ahcun thanchonak humhimnak hna hi zalawnnak tang lawngah aum caah asi.

Lungler Sakhan Pi Aciam Cu Minung Sa Ei Limpi Thah Tluk Ah Ka Ruah’. Bangladesh ram kan unau Bawm pawl umnak ahhin bawkka lake timi tidil nganpi aum, Atuanbia ankachimhningah, ‘hi tidil hi hlan ahcun “khua’ arak si, mah khua pawng ahhin lungkua arak um i, cu lungkua ahcun rul lim nganpi arak um i, cu ‘lim’ nihcun hngakchia arak ei lengmang ton hna, Voikhat cu hngakchia ke ah lahri an khih i, cu hngakchia cu lim nihcun arak ei i, lahri akalnak lei cu khuami nih an zulh thluahmah i Lim umnak lungkua cu an vahmuh i, limpi cu an thah, Limpi anthah hnuah mah khua hi tidal ah aacang e tiah anrak ka chim bal. Limpi anthah hnucun nu le pa nih hngakchia lo ah an kaltak hna zongah an hna arak ngam cang e an ka ti.

Lungler Sakhan hi CNA le Thantlangpeng caah cun hngakchia arak ei tonmi limpi umnak kua bantuk arak si. Cu limpi cu CNA le Thantlangpeng CDF nih an vathah pinah akua zong anvahrawh dih cang, zeithluk hnangamdah asi, Limpi anthah hnuah nu le pa nih hna ngamtein an fa le lo ah ankaltak mi hna bantuk khi asi.

Keimah pumpak hrimhrim hi Lungler Sakhan nihhin hnahnawhnak tampi anrak kapek bal ve, Voikhat cu kan nau le training adihkami minung 20 hrawng hi central command Lt Sunny Nun Awi sinah vachiah hna dingin kaa thawh, Meithal hi zun 4 teh lawng an ka pek. Bungtlang kaphak ah Vuangtu ralkap nih ka hnulei in anka dawi, Ka hmailei in Lungler ralkap nih an ka bawh, cucaah Tio ral Mizoram lei in karak hrial hna, Chun ahhin ramlak ah kaithup i, zan ah ka kalpi hna, Mizoram Thingsai khua taw in Tio ka tan tthan i Dawn khua ah ka lut, Dawn khua ahhin Lt Sunny he kan itong. Sunny nih akatimi cu ka nau nahnu nahmai in an inkulh tikah ka sin aphakkhawh teh hnga maw? tiah lungretheih in ka um lio ah dam tein kan ihmuh cu kaalawmtuk arak ka ti.

Karak kir lei hi Lungler khua taw in Bungkhua ah karak lut, Bungkhua ah aka daw ngaimi thleicia Pu Hmun Cin ka vachawnh pah i, Innchung ka um lio ah ka nau le nih Lungler ralkap an ra tiah thawng ankan thanh, kap hna hla uh khuachung asi caah mipi nih antuartuk sual lai ka ti hna, Tlompal ah ka zoh hna i, minung 3 teh lawng khi an si, Pu Hmun Cin le khua upa cheukhat sinah kap loin atlaihin ka tlaih hna lai karak ti i, zei kan ti hnga natlaih hna ahcun kan khua hi mei in ankhangh dih lai tiah anrak ka thloh caah an bia el siang loin ralkap cu ka lanter hna.

Voikhat cu Hakha khuachungah ral vakahding asi i, keimah hi ttuanvo anka pek — meithal zun 3 le ralkap 3 an kapek, Centralcommand commander Lt Sunny sinah na vakal lai i amah nih ralkap le meithal cu aherhningin anchap teh lai an kati, Cuticun kanau le ralkap 3 he cun kan pok. Colonel Hretling le anaupa hi rian herh an neih ve caah keimah he kan kaltti hna i Bungtlang in kan itthen hna, Bungtlang khuataw ah lam kan tlau i, Rua khua lei kan kal rua ka timi kha Thau leitu ka rak kal, Lampi ah Thau pa kan ton i, Rua khua thawngpang attha maw? tiah ka hal cu Thau khua ka si aka ti, Aize lam pei ka tlau ko hi ka ti i, kan kalnak leicun kanrak kir tthan, kan tlau caan hi suimilam pakhat le cheu hrawng asi lai dah.

Fungkah kanphak in kan ttuantti hoi Nawl Cung te Inn ah rawl kan chumh, Rawl ahmin hlanah Lungler ralkap an rakphanh tiah thawng an kathanh, Khuachung asi caah ka nau le kha kap hna hla uh, Thlalang ong khan zuang uhlaw ramlak ah tli uh ka ti hna, Ramlak ah sau nawn kan ithup hnuah Bungkhua lei kan lan, kan kalpah in pup tiah ka lungah achuakmi cu; Aw lampi kan tlaumi hi Pathian khuakhan pei arak si hi, lampi tlaulo in um usihlaw Fungkah in Bungkhua lei cho kai ah ralkap hehin kan itong lai i kanmah minung 3 tehlawng Lungler ralkap 20 nihhin chuk kah in akan kah lai i kan dihlak kan nunnak hmanh aliam khomi asi tiin khua zaza khi ka ruat, Suimilam caan ka tuakning ahLampi kha rak tlauh loin um usihlaw Fungkah ah rawl kan ei dih hnuah ka lan colh lai i, Lungler ralkap he Fungkah in Bungkhua lei cho kai bak ah ai tonding khi kan si.

Bungkhua kanphak in khuachungah lut loin khua sir in kakal, Tikhur ah ti athanmi rual kan hmuh hna i thawngpang attha maw? tiah ka hal hna, An kachawnh zokzok lo, An mithmai ka zohtikah ttihnakin ankhat, Nidang Bungkhua kanphak lio anmithmai kha cu alo ruam loh, zeidah asi hnga tiah ka hal hna i, i Nizan tihni ahkhan Pu Hmun Cin afapa hniang le CNA CHRO attuanmi Zothang kha kan khua ahhin lungler ralkap nih anthah hna tiah an ka chimh. Ka ngai maw achia deuh ka thin dah ahun deuh tikhin karak um, Bungkhua hi lut loin Lungler khuataw in kahrial i Dawn ah ka riak, Dawn khuabawi pu Roland nih kan hnulei nanau le narak thlah hna na kir tlompal ahkhan Lungler ralbawi Khin mg ye arak phanh i, nan khua ah Van Neih Thang aphanh ko lo maw? akati i, pheh awk atthat lo caah aphanh ko ka ti, aka timi cu; kha tan ahkhan kan bawh i, akah in kah cu chimlo atlaihin katlaih lai ka ti nain avan attha anti aka ti, hriamnam aneih komi katlaih tuah sehca amahtu kathah lo ah ka ti i pu Roland cu ani len.

Lt Sunny sin kaphak hnu zeimawzat ka um hnuah Hakha lei ralkahding cun kaathawh, Vanzang khua kaphak hlanah Tlangpi khuami tlangval nih cycle in anrak kadawi i, Sunny nih arannakin rakkir seh anti an kati, Aruang ka hal hna antheih lo, Cuticun Camp lei cu karak kir, Camp kaphak ah Sunny nih Hakha kahdingin report ca acunglei sinah kanttial mi kha Lungler ralkap nih an tlaih, Cucaah atu hi ralkap nih nakalnak ding vialte an nin bawh dih cang lai, cucaah kan auh tthannak asi aka ti.

Zeitindah antlaihning asi ka ti tikah, MANIPUR kan unau hna training akaiding kha Saya Pum nih avathlah hna i, Bungkhua khuataw ah Lungler ralkap nih an kah hna i anthilri an zamtakmi ah na ca aitel caah asi aka ti, Cuticun Hakha operation cu tuah khawh tilo in ka rak kir tthan, Kachimduh mi cu Lungler Sakhan nihhin minung tamtuk harnak anrak kan pek cang pinah kan nunnak zong tam ngai arak kan lak cang, Keimah pumpak hrimhrim zong harnak le hnahnawhnak an rak kapek ve balmi ka si.

Hitlukin harnak arak kanpek mi Lungler Sakhan CNA le CDF thantlang nih anlak anhrawhkhawh hi cu, Minung arak ei tonmi limpi thah le akua hrawhpiak tlukah ka ruah, Limpi an thah hnuah nu le pa nih hna ngam tein an fa le lo ah ankaltak hna bantukin Lungler Sakhana kan lak khawh hi cu CNA – CDF Thantlangpeng Tio pawng um mi hna mipi caah cun hna ngam taktak khi asi cang, CNA le CDF Thantlang hna ka umnak hmunin upatnak sangbik SALUTE kanpek hna. Credit: Van Neih Thang