Yangon i umkheng tum in Min Aung Hlaing cozah an huatnak an langhtermi cu khuapi aa hnin dih

Yangon i umkheng tum in Min Aung Hlaing cozah an huatnak an langhtermi cu khuapi aa hnin dih ti awk in a um, lung a hmui taktak. Mah hi psychological warfare a si i lam zawh nak hmanh in hmual a ngei deuh tiah ka ruah. Ralkap phu cu a hninh ngai ko hna lai, an i theihter lai lo nain.

Hakha Keihsih sang le hmun cheukhat zong ah umkheng an tum ve. Thaizing lei zong pehzulh thluahmah ko u sih. Ramdang zong ah ralkap dohnak nan langhter ciomi hmuh tikah lung a hmui tuk, khawika hmun poah in kan doh a herh. Mah le ti khawhnak lam in ralkap uknak chiahru doh hi kan tefa hna caah dothlennak kan tuah phun khat a si ve.
Umkheng an tum ruang ah ‘hna an chet’ tiin a zai lenmi cheukhat kan hmuh hna i ngaihchia ngai cu a si, pumpak i tel khawh ve lo hmanh ah thazaang dernak a tuahtu cu si hram hlah u sih.

Suu Kyi cu a inn ah radio an hmuh caah uknak firtu Min Aung Hlaing phu nih taza an cuai. President Win Myint zong a inn hmai a rami NLD tanpitu pawl a kut a zaoh(wave) hna an ti caah taza an cuai ve. Ralkap uknak cu sehtan pennak bantuk a si caah tlaih an duhmi poah cu a herh lomi aruang an kawl i an tlaih ko hna, an hrem ko hna. Mah hi kanmah cio cung ah a tlung ve te lai. Ralkap uknak a nun thai ko ahcun voih voih sual ruang zong ah thongthlak kan i huah te kho.

Uknak firtu Min Aung Hlaing nih Chinram chung a tapeh lutlai tuantu ding minung pakhat a rak thim i cucu cheukhat nih an lawmhpi len ko. Ralkap tapeh tuan hmanh hi sang tuk ah a ruat rihmi sal lungput fih a nun zia mu. Mah pumpak hlawknak caah cun mifir tapeh tuan zong aa lunghmuih ngaimi sal lungput.

Myanmar ram chung khuapi tampi ah cozah riantuantu hna cu thaizing thawk in ralkap uknak cohlan khawh lonak langhternak caah zung kai an i tim ti lo. Siizung riantuantu siibawi le nurse tam bik an i tel. Mah hi tulio hmual a ngei bikmi hriamnam cu a si ko. Chinram chung cozah riantuantu zong nih raltha ngai in le hmailei fale caah ruah piak bu tein ralkap uk chiahru hi rak doh cio ve ulaw lung a hmui tuk hnga.

US Biden cozah nih Myanmar sipuazi phihnak sanction a tuah than tik ah cun US campany pawl an kir dih than lai, kan ram ah sipuazi tuah a ngah ti lai lo. Ford le Chevrolet motor, Visa card, Western Union, Coca-Cola, KFC le Burger King tbk khi kan ram ah kan hmu ti hna lai lo. An sin riantuantu tampi rian ngei loin an kaltak te hna lai. UN zong nih sipuazi phihnak an rak tuah chap ve ahcun ramdang company tam deuh cu kan ram chung ah hmuh khawh an si ti lai lo, North Korea kan hluan te ko lai.

Sipuazi phihnak hi ramdang cozah le UN nih cun hmual a ngei bikmi ralkap dantatnak tuah ah an ruah, a dik ngai ko. Nain, rampi sipuazi a tla dih lai caah harnak a ing taktak te ding cu rammi kan si lai. US President Biden nih Myanmar cu Than Shwe chan lio bantuk sipuazi phihnak sanction tuah than a timh cang. US nih Myanmar sanctions a tuah ahcun kan ram sipuazi a tla lai i a tuar ding taktak cu mipi kan si hoi lai. Lung a rawk ko.

UN le ramdang cozah nih cun ralkap dohnak ah zei pipa an tuah khawh ding a um bak lo. Sipuazi phihnak le visa phihnak lawng an tuah khawh, cu nih cun ralkap harnak a pek lem lai lo, rammi lila harnak a kan pek lai. Sumilam 72 chung dai tein um rih ding timi bia zong khi ralkap hriamnam a si. Ni 3 chung ah ralkap nih a herhmi ralkap cozah tling tein ser dih i mizapi an thinhunnak daihter an duh bia a si lai. Nithum hnu ah cun lam an zawh duh ti lai lo, an zawh zong ah ralkap cozah tling tein ser cia a si lai caah hmual ngei deuh in an control khawh cang hnga.

Cheukhat nih lam zawh ahcun ‘ralkap nih aa-naa an ting dih sual lai, atu cu aa-naa an control lawng a si rih, an ting thlu rih lo’ timi biachawk an vahpi hoi. Atu khi an ting viar cang khi, ting ding a tang ti lo. Tuni lam zawh a um lo caah thaizing kip lei zong lam zawh a um hlei lai tiah ka zum lo. UN le ramdang cozah statement chuah luala hna cu ralkap nih zei hmanh ah an rel lai lo. Kan ram kong ruah ah lungthin a fak hringhran ko.