Wuhan pastor nih cun Bible Jeremiah 29:11 nak bia hmangin thlacam bawmhnak a hal

China Source nih alanghter ningah cun Wuhan khuapi Khrihfa zumtu hna le pastors hna cu Pathian sinah bawmhnak hal in thla an cam ati. Pastor nih thlacam sawmnak cu hitihin atuah, Nihin ah China ramchung ah zawtnak tihnung nih mipi athah cuahmah hna. Hi lio caan ah hin Pathian dawtnak a thei rih lomi Chinese minung hna nih Khrih dawtnak an theih khawhnak hnga thlacam bawmh kan herh. Cun, mah zawtnak hi kan caah vanchiatnak si loin thluachuahnak asi khawhnak hnga le hi thil hi kanmah a kan hrawktu si loin kan caah hneksaknak a si i kan ram a kan tunmer tu ah acan khawhnak hnga vawleicung zumtu vialte nih thlacam kan bawm u tiah an ti.

Wuhan pastor nih cun Bible Jeremiah 29:11 nak bia hmangin thlacam bawmhnak a hal hi a si. Jeremiah 29:11 ah cun, Nan ca i ka tinhmi cu keimah lawnglawng nih ka hngalh, tiah BAWIPA nih a ti. Cucu vanchiatnak si loin thluachuahnak asi lai i nan hnu i aa rung um ding tefa tampi kong a si lai”. Wuhan pastor nih cun, Kan dirhmun hi tihnung tuk a si. Tihnung dirhmun ah kan um lio asi. China ram minung vialte nih Jesuh dawtnak an theihnak ah acan khawhnak lai tiah thlacam a cah mi asi.

Pastor nih hin China ram zumtu hna sin zongah thazaang peknak bia a chim chih. Atimi cu, Khrihfa zumtu hna cu hi khualipi chung ummi hna caah hin thla cam u, cu cu hi khualipi minung caah kan ti khawhmi a si. Thinphang thlalau in a um mi hna nih daihnak an hmuh khawhnak lai thla cam u. An kutin fahnak tuar ko hna hmanh usihlaw an caah thlacam piak hi kan rian a si. Pathian nih kan sinah daihnak a kan pek cangmi hi zeitikhmanh ah a la than ti lai lo. Cu caah nan thinphang hlah u law zeibantuk tihnung zawtnak le thihnak nih an kan kulh ko zongah hna ngam tein um u.

Zeicatiah hi thil hna hi cu Khrih nih cun hi vialte hi a kan tei piak dih cang tiah a ti. Cu caah hin Pathian zaangfahnak cu hi khualipi Wuhan ah hin a tlun khawhnak hnga dongcatlo tein thla cam hna u sihlaw. Hi thil hi Pathian auhnak a si hrim hrim lai ti hi kei nih cun ka zumh cang. Pathian lei imer dih ding hin Amah nih akan duh piakmi asi. Cu caah cun Wuhan minung nih Jesuh dawtnak an theih khawhnak hnga le hi khualipi ah Daihnak a um khawhnak hnga Pathian mithmai kawl hna usih tiah a ti.

Leave a Reply

Your email address will not be published. Required fields are marked *