Kyindwe Khua Pawng Ni 3 Chung Kahdohnak Ah SAC Ralhrang 20 Tluk An Thi
=========
Magway ramthen Saw peng in Chin ramkulh Kanpetlet peng Kyindwe khua lei ah a ra mi SAC ralhrang motor cu Chin ralkap tangti phu nih nithum chung an kah hna caah ralhrang 20 tluk an thih pin ah hliam tuar mi zong an tam tiah CDF-Kanpetlet tuanvo ngeitu pakhat nih a chim.
Saw in July 16 ni ah a rak chuak mi SAC ralhrang motor le rallam sial mi hna cu Saw peng Sew-lon-gin khua pawng kahdohnak ah ralhrang 6 an thi i hliam tuar zong an um. July 18 zinglei ah Kanpetlet peng Ma-sa-tui khua pawng ah kahdohnak fakngai a chuak than i ralhrang lei an hruaitu pakhat telh in 5 nak tlawm lo an thih pin ah hliam tuar mi an tam.
Mah ni lila suimilam 1 dan ah kahdohnak a chuak than i ralhrang 3 an thi than, hliamtuar zong an um. Chin ralkap tangti phu in minung pakhat hliam faklo a tuar. SAC ralhrang lei a thi mi le hliamtuar an tam caah raltuknak vanlawng 3 nih Bomb a thlak, caah Ma-sa-tui khua BCM biakinn le mipi inn 5 an rawk.
July 18 nikhat chung lawngah Ma-sa-tui khua le a pawngkam ah raltuknak vanlawng nih voi 11 nak tlawm lo Bomb a thlak tiah Kanpetlet peng mipi ukhruainak phu nih thanhca an chuah. July 19 zinglei zongah Ma-sa-tui khua thlanglei ah kahdohnak a chuak than i ralhrang 5 nak tlawm lo an thi.
“SAC ralhrang motor le rallam sial mi thazaang 300 tluk cu raltuknak Tank 2, JCV motor pakhat le ralhrang phur tu motor 20 leng cu Kanpetlet peng Kyindwe khua lei ah thazaang chap dingin an ra hna” tiah CDF tuanvo ngeitu pakhat nih a chim.
Paletwa Peng Ah Bomb Lamhsualnak In SAC Ralhrang Chungtel 4 Hliam An Tuar. Chin ramkulh, Paletwa peng, Shinletwa khua pawng ah a luancia July 3 ah Chin ralkap CNA le SAC ralhrang kar kahdohnak a chuah hnu in SAC ralhrang nih Shinletwa khua um palik sakhan le mipi hna an i chawhnak hmunhma hna ah lamhmi bomb an tarh hna i khua luhchuahnak hna zong an phihkhar hna, tiah theih a si.
July 12 ah SAC ralhrang nih anmah tarhmi bomb pawl cu an laak ṭhan hna lio ah puahkehnak voi 2 a chuak sual i SAC ralhrang 4 nih hliam an tuar. Cu chung ah 2 hi an hliamhma a faak ngaingai, tiah tualchungmi hna nih an chim.
SAC ralhrang nih kan tarhmi bomb pawl hi nan zuatmi saṭil hna nih an lamhsual i puahkehnak a chuah ahcun saṭil ngeitu nih bomb man nan liam lai, tiah nawl an chuah. Paletwa peng, Shinletwa khua cu SAC ralhrang nih atu bantukin khua luhchuahnak an phihkhar ruang ah a pawngkam khuate 10 leng hna cu facang le a dang din-ei ding hna an ngeih ti lo caah harsatnak an tuar, tiah an langhter chih.
India-Myanmar Ramri Rihkhawdar Khuapi Ah Thahnawnnak A Chuak! India-Myanmar ramri Chin ramkulh, Rihkhawdar khuapi ah July 18 nizan chun ahkhan pa pakhat cu tukvelhnak in a thi, tiah tualchungmi hna nih an chim.
“Falam peng, Rihkhawdar No.2 sang ah khuasa mi Pu Pau Khaw Zaam(Kum 55) cu Boihi timi nu pakhat nih thir in a lu ah a tuk caah hliamhma faak ngai a tuar i India ram lei sii-khan i an thlop lio ah a thi” tiah tualchungmi pakhat nih a chim.
A thimi Pu Pau Khaw Zaam le a thattu nu Boihi hna cu tangka kong ah bia alnak an ngeih caah i thahnawnnak tiang a chuah hi a si, tiah an chim. Pu Pau Khaw Zaam a thattu nu Boihi cu tualchung hriamtlai phu hna nih an tlaih i sualnak a tuahmi kong ah pehzulh in hlathlainak an tuah lio a si, tiah kan theih.
CNDF Ralkap 1 Ruahlopi Tluknak In A Nunnak Liam! Nawlngeihnak a latu SAC ralhrang chung in CDM a tuahtu Chin National Defence Force(CNDF) ralkap ah a lutmi Salai Thang Za Sel(Kum 25) cu nihin July 19 zing ah ruahlopi in a tlu i, a nunnak liam tiah ṭuanvo ngeitu hna sinin theih a si.
Salai Thang Za Sel cu 2022 kum ah Kachin ramkulh, Bhamo khuapi in CDM a tuahmi a si, tiah kan theih. Dothlennak caan chung ah CNO/CNDF ralkap in 34 nih ram le miphun caah an nunnak an pek cang, tiah theih chih a si. Credit: Lungmili Media