Vote Rel Than Dingin Trump nih Nawl a Chuah hnu ah Wisconsin County ah Biden nih Buan a Co Thiamthiam

Vote Rel Than Dingin Trump nih Nawl a Chuah hnu ah Wisconsin County ah Biden nih Buan a Co Thiamthiam
======================================

Trump’s election campaign an duhnak zuul in Wisconsin i a nganbikmi county ah vote relthannak tuah i, President-elect Biden nih buan a co, tiah Friday ah thawngpang theih a si. Milwaukee county i vote an thlakmi dihlak hi 460,000 a si i, cu chungin Biden nih net gain ah vote 130 teinak a hmuh. Buaktlak in cun Biden nih vote 257 a hmuh i, Trump nih cun vote 125 lawng a hmuh, tiah theih a si.

Wisconsin i Vote 20,000 hrawnghrang in Biden sin a sungh hnu in Democratic hmunhma a si mi minung an tamnakbik county 2 ah vote relthannak tuah dingin Trump campaign an duhnak an langhter. County 2 i vote relthannak an tuahmi ruangah Trump campaign nih $3 millions hrawng an dih. Dane county i vote relthannak an tuahmi zong cu Sunday in cun lim dawh an si ve cang.

Buaktlakin Biden nih electoral college vote 306 a hmuh i, Trump nih 232 a hmuh. Popular vote ah 6 millions tluk tam in Biden nih Trump hi a lonh. “Milwaukee county i election hi a fair, a tluangtlam, a dik, cun a himmi a si, tin kan theihcia mi kha tutan vote relthannak hi a vun fehter,” tiin vote an rel than hnu ah Milwaukee county clerk George Christenson nih a chim.

Wisconsin pumpi ah tazacuainak tuah dingin Trump campaign an i timlaam ko nain, caan nih a daih ti hna lo. Tuesday ah khin state pumpi i vote namhnehnak tuah an i tim cang. Philadelphia ah election results namhnehnak tuah rih lo dingin federal biaceihzung ah Trump legal team nih nawlnak an tuahmi cu Friday in khan biaceihzung nih a hnonpiak than cang hna. Nan biasu hi ceih awkah ai tlak lo, tiin biaceihbawi nih kan ti piak ko hmanh sehlaw, supreme court ah kan lanhpi thiamthiam ko rih lai, tiah Trump i a sihni pawl nih an chim.

“Za a longmi, a fair mi election hi kan democracy i a nunnak thihri a si. Thil ai nincan lo ruang i tazacuainak hi biapihla ngaingai thil an si. Asinain, ‘kan election hi a fiar lo’ ti menmen khi cu biatlaktein ruah awk a si lem lo. Tazacuainak paoh ah hin an cuai duhchannak a ruang set te a um ah hau. Cu hnu cun tehte langhter a hau. Cu bantuk cu tutan ah hin kan hmu lo,” tiin three-judge panel an catialtu Judge Stephanos Bibas nih a chim.

Trump nih cun tehte um hlenglo pi khin election ah hlennak a um, ti lawng cu a rian peng ko rih. “Thlutu lakin vote 1,126,940 an ser chom. Pennsylvania ah ceilak in buan ka co. Aho nih an theih phaak leng tiang hmanh khin ka tei” tiin Saturday zingka ah khan twitter in a tial.

Georgia ah vote firnak a um, tiin hrihhram ngei theng lo in Trump nih a chimmi biaka nih amah party lila an lungre a theihtuk cang hna. Biden nih buan a conak Georgia i election an tawlrel ning kong he pehtlain in Trump nih lih in comments a tu le tu a pek. Cu nih cun buainak a chuahter ngaingai cang i, Senate uk kho dingin a party nih tan a laak lenmi hi a chiatchuah sual te lai ti lawng an phang cang hna.

January, 2021 deetka hrawngah khin state Senate hmunhma 2 a lawngkang ding a si cang. Democrats lei nih 2 ningin an i haikonh khawh a si ah cun, upper house le House of Representatives ningin a vun control khawh cang lai. Thanksgiving Day press conference a tuah lio ah, Georgia i vote firnak a um, tiin a chimmi kongah Trump cu bia an hal. “An kongah ka lungre a thei ngai. Dehhlennak system nan i ngeih,” tiin a chim. Cun, state election a vengtu Republican secretary of state Brad Raffensperger zong cu “mipi hna ralpa” tiin a ti.

Georgia ah a ummi Republican votes pawl nih hin January ah khin Republican senate campaign vun dirpi hna seh, ti hi Republicans nih an i ruahchan ngaimi a si i, a tu bantuk i Trump nih dohdalnak a tuah mi nih hin an lungre a theih ngaingai cang hna. Zeidang nak hmanh in a biapibik mi cu, hi campaign tuahnak dingah hin mipi hna an angki zaal chung phaisa an kholh mi a si.

Election fir a tong, cucaah a ra lio mi vote pawl hi cohlang hlah u, tin Trump nih bia a thlah, cun amah a tanhtu pawl a forh hna. Cu bangin cun Georgia Republicans nih an tuah lai lo. “Georgia nih ai hmanhmi election system a ningpi in a diklo mi ah a kan chiahpiakmi nih hin Senate humzual khawh dingin a party nih thazaang kan chuah len mi hi a chiahchuahtuk cang,” tiin Politico nih a chuahmi capar nih ralrin a pek. Credit: Chelsea Bawi, With Reuters and Associated Press