Vom Hliam Cu Kan Dawi Ngam Lawngah Kan Kah Khawh Lai

Vom Hliam Cu Kan Dawi Ngam Lawngah Kan Kah Khawh Lai
===========
Atu lio ralkap nih aa-naa anting mi mipi sinah pektthandingin colcanghnak an tuahmi ahhin, Civil Disobedience movement hi hmai hruai tubik ahung si. Hi colcanghnak hi afawinak cun Nawl neihtu hna bia ngai duhlo tikhi asi, Kawl holh cun’ aa naa phisanhmuh’ an ti. Hibantuk Cozah bia ngai lo colhcangnak hi, Mahatma Gandhi nih Mirang arak doh lio hna khan arak hmang i, hmual anei tuk. Mahatma Gandhi nih hin Mirang Cozah bia ngai duhlo lawng kha tuah lo in, Mirang sermi thil hna zong kha hman arak duh lo, Cucaah angki le kedang tiang aarak ihruk duhlonak kha asi. Hi colhcanghnak nih aitinhbik mi cu Cozah rianttuantu hna vialte nih an rian chuahtak hna sehlaw Cozah uknak kha thi seh tikhi asi bik.

Hibantuk colhcanghnak hi thisen chuah loin teinak hmuhnak lam tthabk cu asi. Sihmansehlaw minung lungput le khuasakning hi ai ruallo caah atlamtling hi ahar ngai ve. Mirum pa nih a eiduh lomi i akal takmi rawl kha mi sifak pa nih vantthat tiin a ei can atampi ttheu, Cubantuk in Cozah riansang atlaimi le minung khawh deuh nihcun an rian an chuahtak hmanh ah an mah pawcawmnak ah an phang lem lailo. Sihman sehlaw Mi sifak nih an rian chuahtak hna sehlaw rawl ttam tihal ngaiin an um khawh men, Cucaah mi sifak nihhin Cozah uknak an duh lo ngai nain, an pawcawmnak ruah ah an rian chuahtak ding hi ahar ngainak cu asi. Cucaah Cozah rian iphuah dih in uktu ttha lo kan doh lai timi hi atthatuk mi asi nain, tlamtling ahar ngaimi asi. Hi lampi hin ralkap kan doh hna ahcun thisen chuahlo in teinak kan hmuh ko lai tiah NLD hruaitu hna le Min Ko Naing teh pawl nih an timi hi, tlamtlin cu ahar ngai men teh lai.

Vomhliam cu miralchia nih an dawi ngam bal loh, Mi ralttha lawng nih an dawi ngam, Vomhiam adawi tu hna nih vom nih aka seh ahcun ka kah ve lai ti an ngam caah an dawi ngam vemi asi. Ralkap pawl kan doh vevek hna asi ahcun lamcungah chuakin sandah piah ngamding asi ko, Sandah piah tikah Ralkap nih meithal anhmang khawh men, Cutikah thisen achuak lai. Thisen achuahtik ah hnu lei thawntak loin kan pah ngam hna asi ahcun teinak kha mpi kut cungah aum i, hnulei kan thawntak hna asi ahcun teinak kha an kut cungah aum ve. Vawleicung uknak tthalo thlennak tuanbia kan zohtikah meithal aneihmi thazaang kha meithal aneihlomi thazaang nih atei ton ko hna. Cucu ral ttha tein itlaih ngamding asi. Aa Naa Sin ram hna an ithlennak khi atubantuk dirhmun lio ah nusal pasal hna nih nunnak an thap ngam caah asi ko.

Atulio dirhmun kan zoh tikah ramchung lawng silo in ramleng zong thazaang ifun lio caan te asi. Vawleicung ram tampi nih thazaang an hun kan chuahpi lio caan zong asi. UN security Council nih lakruak meeting an tuah i,hnatlaknak statement an hun chuah khawh,US zong nih presure le sanction tuah atimh cuahmah lio asi. Malaysia foreign Minister zong Indonesia Vuancichuk sinah Atulio Kawlram kong ah Asian emergency meeting auh dingin hna tlaknak atuahpi cang. Atulio caan hi vawleicung ram tampi kan sin an ttang lio caan asi. Atu bantuk hawikawm tampi kan neih lio ahhin ralttha tein hmai fon ngamding hi abaipi tuk, Kanmah tu hmai kal ngam loin kan hawi le tu hmai kan kalter hna ahcun thlennak taktak kan chuahpi khawh lai loh.

1962 ah Ne Win nih aa naa ating lio ahkhan cun Inkaa aihrenh khumh khawh. 1988 lio zongah Inkaa aihrenh khum khawh, Asinain atu ahcun angah tiloh, Cucaah Inkaa hrehkhumh in duh paoh in thil atuah ngam ti lailoh, Cucu kan ral tthatnak ah kan hmanthiam ve ahau. Vomhliam cu adawi ngammi pa lawng nih akah khawh bantuk in, Atulio dirhmun ahhin angamh taktak mi mi pi tampi an um lawngah thlennak taktak cu kan hmuh khawh ve lai. Van Neih Thang