Victor Khen Sang Tialmi News

Biden vs Trump le Khrifa nun: Laimi tampi nih Trump kan țanhnak aruang cu Khrifa adirpi, same sex adoh, nau chuak rih lo thah apom lo, ISIS ahloh hna, Jerusalem ah US Embassy ațhial ti pawl etc.. an si. Mah hi ațha ko.Joe Biden kan rem lonak cu same sex apom, nau chuak rih lo thah apom, Israel adirpi lai lo, ISIS an tho țhan lai, minak an lor lai ti pawl in Trump dirpi mi pawl kha lingtalet in atuah te lai tiah atuah rih lomi puh in rem lo khi asi. Hihi cu party policy kalning kha asi te ko lai.

Ruah awk: Khrifa nun ah hin same sex apom mi president khi biachia vialte in thangchiat i Satan bantuk tiah au hnawh peng khi maw Khrifa nun asi deuh, same sex apom mi zong Pathian nih adawt ve ko, a caah thlacam piak tu hi kan rian asi ti khi dah Khrifa nun asi deuh hnga.Joe Biden nih president an thim cang ka in vuanci rian akhinh hmasa bik mi cu Israel (Jew) miphun asimi Anthony Blinken (Secretary of State) asi. Anmah Democrat party chung i Muslim pawl hmanh nih Biden nih Zudah miphun ramdang lei vuanci tlaitu rian akhinh caah an soisel colh cang.Mipeem arem lai lo kan ti lio ah Cuba ram in US ah mipem asimi Alejandro Mayorkas cu Homeland Secretary vuanci rian apek colh. Mayorkas hi US Immigration le Refugee vialte kong ah lutlaitu vuanci asi lai. Cabinet tling tein athim dih hna in website ah an kong tlamtling he ka vun țial țhan te lai.

Joe Biden achuah ahcun kan fa le vialte nulenu/ palepa an i um dih cang lai ti phun i thaizing kip tuh ah Malaysia operasi lut in innkip ah an hung lut lai tiphun in ruah ding asi lo. Duhthimnak asi lai. US cu vulei cung ațhawng bikmi Democracy ram asi timi theih ahau.

Joe Biden cu Liberalism apom mi Preisdent asi i Donald Trump cu Conservatism adirpi mi president asi.  An i dang hrimhrim lai nain US ram rawk seh tiah uktu cu an si ve ve hrim lai lo ti afiang ko. Liberalism le Conservatism afiang mi caah cun nitin țial len awk hmanh aum lo. Hmailei zong ah Liberal president le Republican president an i thlen paoh ahcun hi lengmang hi asi ko lai.

Same sax hna cu um rih seh, hmailei ahcun minung le saram umți (Beastiality) apom mi hruaitu hmanh an chuah te khawh mi asi caah Khrifa mi kan rian cu mah vialte minung cung ah Satan rianțuannak sualnak phunzakip (Social Prejudices) in nifatin kan luatnak ding ah pumpak zumhnak fek tein le thih pi tiang ngamh in dirpi ding kha asi ko. Ka lawm. Victor Khen Sang, Nov 24, 2020