Victor Biak Lian: Ka diary; 26 November, 2020; In Loving memory of Dr. Tam Aung Ling.

Ka diary: 26 November, 2020; In Loving memory of Dr. Tam Aung Ling. Ruahlopi in kan u, kan pa a simi Dr Tam Aung Ling nih November 23 (Monday) ni ah mual a kan liamtak. Ottawa khuasa Chinmi lawng si lo in, khuaza ramkip hawikawm dawt le chungkhar vialte zong kan lau ngai ngai i, kan ngaih zong a chia fawn. Kan zang a raam i, kan khuaruah zong a har. A ruang cu, hi ti lai lo ding kha kan rak ruah hrim hrim lo ca ah a si. Ottawa ah Chinmi khua kan sak nak le Krihfa bu kan dirhnak hi kum 23 a si cang i, a tutan kan upa nih a kan thihtak hi a voikhatnak (kan Krihfa bu chung in) kan ton mi thihnak a si fawn tik ah, kan i zumhkho hrim hrim lo. A theilo mi nan um sual ah, a mah hi October 15 ni khan kum 70 a tling cang i, a riantuannak zong in October thla khan pension a la.
Pension a lak kate ah a rak ka chonh i, ka chimh mi cu: chantlung tiang Pathian nih riantuan khawhnak thazang fimnak le nunnak an pek mi hi kan lawmhpituk ee ka ti. Public service (mipi ca ah) a phun phun, si lei in siseh, cun cozah riantuannak lei in siseh, INGOs ah siseh, cun Canada na phak hnu zong ah public service kum 45 tluk na tuan mi cu “life achievement” a si ee ka ti. Amah belte kum sautuk rian a tuanmi hna tuanlo in na vun umtik ah na harh ngai ko lai ti zong kati. A ka chimh mi cu, Pathian nih tu le 4 nikum le tukum ah a ka pek i ka tu le te te ka um hna lai a hei ti.
Kan hnulei thla khat hrawnghrang ah khan telephone a rak ka chawnh i a ka chimh mi cu: Aa Vic, nan nih cun nan hngakchiat te in Sunday school nan rak kai lengmang i, Bible story hna tampi an rak in cawnpiak mi hna nan theih. Kei cu ka upat hnu ah Krihfa ka si tik ah keimah te in bible study hi ka tuah tawn ee a ti. Ka theihrua ka ti mi hi ka rak thei lo. Asinain, tutan Covid ruang ah riantuan kholo in kan um tik ah, kan bible ca hi voi 5 hlengte ka chuah cang. English in uk hnih (Kings James version le NIV) in voi 2, Hakha ca in voi 1 (Laiholh a thlummi zong kaa chap a ka ti rih), cun kawl bible le Mindat bible a si ko rua ka ti(?). Cu cu ka U, new record na si bak lai thla 8 chung ah bible voi 5 na chuahmi cu ka ti. Ni 22 chung ah chuaklak in a rakrel mi ka hawipa cu a um bal. Bible Version 5 thla 8 (March-Oct) chung ah na lim mi cu tiah ka lawmhnak bia ka chimh tik ah, a ka ti mi cu, Pathian bia a thuh ning hi a mak tuk. Biakin ah testimony chim hna ka duh na in, ka chim lem lai lo. Keimah nih ka theih kha a zako a ka ti. Mah cu nizan nai ah U Khun (An nu Pi Dawt Khun) nih bible ca a relnak kong cu a kachimh than tik ah, kan U pa hi Pathian dawtnak a rak fiang ngai ti hi ka theih.
Hlan lio kan pa le (bureaucrat officer) pawl hi zumhawktlak, fel le dinnak aa tlaih mi an si zia hi a mah a thei mi le bia aa ruah tawn mi nih cun tampi nan theih lai. Lihchim a duh lo. Biaporh (exaggeration) le a fahkhun le a din deuh (fictionalized) in biachim a hmang lo. Dengteu in bia a chim mi a si. Phung le lam, dan le dun thate in ngeih a herh zia le fektein cu phung le lam nih a kan hruai a biapit zia a kan chimh lengmang. Cozah phung kan buar mi hna thiamco phun bia kan chim mi le laimi kan lih le kan hrokhrol a lung a rawh zia hi a ka chimh tawn. Adonghnak ah, a fale ca ah pa tha, nupi ca ah va tha le miphun ca ah dinfelnak aa tlaih i, fimnak le thiamnak he rian a tuan mi kan pasaltha a si.
Chimawk tampi ka ngei rih ko. Hi vial hin za rih seh law, thaizing (27 November) Canada EST chun 12 in a ruak vui a si lai. Service hi 12:00 noon in thawk a si lai i, zanlei 2 tiang, cu cu LIVE in thlah a si te lai i, ramchung ramleng, nan rak kan tel pi khawhnak lai kan in sawm hna. Cozah lei in tulio kan boruak he minung atambik 50 lawng an kan sianh ca ah, a poi ngai. Cu ca ah cun online tu in kan telpi cio ding in kan in sawm hna. Facebook ah kan rak share cio te ko lai. Funeral Home nih zingka in an thlahnak ding link kha an kan pek lai I, cu ah cun kan vu share cio te lai. Amang pa aw, va i kal ko kun law, vanram nuam in kan dong te mu! Credit: Victor Biak Lian