Vice President Mike Pence Nih Vawleipi Khuaruahhar In A Tuah Cang Hna

Vice President Mike Pence le a nupi Karen pence cu Pfizer nih an serchuahmi COVID-19 khamhnak sii vaccine cu tuchun ah zapi hmuh hmai ah an ichun cang. Surgeon General Jerome Adams zong a chun ve. An i chunh lio cu vawlei pumpi hmuh khawh ding in Live in TV ah an thlah. Voi hnih chunh a si caah tu hnu 21 ah an ichun than lai. Democrats pawl nih Trump a doh tuknak ah Trump chan chuahmi vaccine cu kan ichun lai lo, a him lai lo, tiah media kip ah an chim. Trump chan I Vaccine chuah zong hi an duh LO caah a phunphun in biasi an phai.

Asinain President Trump nih kum dih hlan ah kan chuah lai tiah a chim i sii chuah a donkhantu rule and regulations tampi cu executive order hmang in a chah. A chimning tein an kum dih lai ah a chuah. A chuah hnu hmanh ah FDA nih approve an tuah duh hlei lo, President Trump nih FDA chief Stephen Hahn rian phuah a timh hnu ceo ah approve an tuah. US FDA nih approve an tuah hlan ah UK nih approve an kan tuah kanh. Democrats pawl cu chunh le an duh, chunh le an i nautat fawn, i laklawh in um dawh an si.

Fox News nih Democratic National Committee chairman hlun, Donna Brazile an hlan hnu ah fox News nih thawng an thanhning le thawngpang an chuahpi ning a phundang ngaingai ti a si. Conservative ruahnak le Republican dirkamhnak news le idea a zor thluahmah ti a si. Mah ruangah Fox News a zoh tawnmi minung tampi an chuak i, Newsmax ah an i thial ti a si. Donna Braile cu Democrats party chungtel lak ah ruh ngaingai mi a si i, Obama le Hillary Clinton nih an tanbo le an hreitlung ah an rak hmanmi a si an ti.

President Trump nih congress palai pawl cu US mipi nih stimulus check a tlawm bik, $1200 in $2000 tiang hmuh khawhnak dingah a forhfial hna. President Trump nih Republican le Democrats hruaitu pawl cu telephone a chonh hna i a rannak in approve tuah dingah a nawl hna. Congress (Senate+House) $900 billion bill an chuahpi mi an pass khawh ahcun US mipi nih cozah bawmhnak cu Christmas hrawng a si lo hmanh ah kum thar ah ngah cio a si te lai.

Atu tiang Democrats le Republican hruaitu hna nih a tlangpi in an lungtlin mi cu $600 lawng a si caah President Trump nih a tlawm tuk a ti. Covid-19 zawtnak cu mipi nih tuahmi a si loin, China nih a tuahmi a si caah mipi nih cozah bawmhnak hi an co ding hrimhrim a si” tiah a chim. Senator, House representative pawl cu weekend zongah idin loin meting an tuah. Tuchun ah hin cozah budget zong an thlak a hau, an thak khawh lo ahcun tuzan zamtim 11:59: PM ah federal cozah zung vialte an khar chung lai.

President Trump Nih Martial Law Chuah Dingah Ruahnak Hal Hna. President Donald Trump nih ruahnak a petu hna cu a auh hna i martial law chuah khawh a si le si lo, martial law chuah ah zeidah a cang kho? martial law chuah in zeidah an tuah khawh timi le US phunghram ah martial law chuah khawh a si le si lo ceihmainak tuchun ah an ngei.

Martial Law chuah ding ruahnak hi General Michael Flynn nih a chuahpi mi a si. President nih martial law a chuah hnu ah ralkap nih a herhning in tuanvo an laak lai, White House ah Joe Biden lut lo dingah an kham lai. Swing state 5 ah vote firnak le hrokhrawlnak a ummi vialte kherhhlai dingah special counsel caah Sidney Powell tuanvo pek an timh. Tuanvo an pek taktak ahcun voting machine pawl le vote firnak le hrokhrawlnak vialte an kherhhlai dih lai i, report an pek lai.

Martial law an chuah taktak ahcun vote thlakning le vote relning a buai tuknak, Battle ground state 5 ah thimnak a thar in tuah a si kho men. Asinain US constitution nih a onh taktak le onh taktak lo fiang tein an chim kho rih lo. President Trump nih biachahnak taktak a tuahmi um rih lo.

General Michael Flynn nih President Donald Trump cu martial law chuah i, Joe Biden he an i phomhnak swing state timi battle ground state poah ah a thar in thimnak tuah dingah ruahnak a pek. Newsmax nih General Michael Flynn interview an tuahmi ah “President Trump nih rianrang tein martial law chuah sehlaw battle ground i vote thlaknak seh, voting machine vialte la dih hna seh, ralkap nih white house le Federal zung vialte cong dih hna sehlaw Joe Biden lut kho lo ding in tuah hna seh, mah hnu ah battle ground state poah ah a thar in thimnak tuah seh” tiah ruahnak a pekmi cu interview ah a chim.

Democrats nih Governor an tuannak le Major an tuannak hmun cheukhat ah hin vote firnak le hrokhrawlnak tampi a um tiah an zumh. Inn cio ah vote an kuat hna, aho nih thimfung a thlak timi hngalh khawh a si lo. Chek khawh zong a si fawn lo. Citizen a si lomi zong nih rak thlak khawh a si, micheu inn ahcun cabawm in vote voi hnih le voithum tiang an kuatmi hna zong a um. Mi thi cia min in vote kuatmi cabawm zong a um ti a si. Vote thlanak seh hrimhrim hi a hlan tein Joe Biden caah software rak tuah hna sehlaw a dawh tiah an chim. Credit: Salai Lairamthang