Vice President Henry Van Thio Tawlrelnak In Bungzung Khua Ah Dinti An Cawhpiak Hna Lawmhpi Cio Hna Usih.

Chin ramkulh chung NLD Cozah nih thanchonak lei rian an tuanmi hi cu a mak kho tuk ko, party dang pawl nih kan soisel lengmang mi hi khat lei in cu a dik ve ko nain, thanchonak lei in tuak ahcun aho party hmanh nih an tluk ti men hna lai lo. USDP party cozah nih Chin ramkulh kum 5 chung an hruai nakin thanchonak lei cu tam ngai an tuan ve ko. Asinain, NLD Cozah hruai hnu ah thanchonak an tuahmi cu hlan lio Chin ramkulh sining he cu zoh ngam hmanh a si ti lo. 2015 – 2020 kum tiang NLD cozah nih Chin state an uk hruaimi kan van thatnak pakhat cu Kawlram pumpi uktu Vice President U Henry Van Thio an kan pekmi hrimhrim nih Chin ramkulh thanchonak tamtuk an tuah ti khawh an si. Chin ramkulh chungah Vice President Henry Van Thio cawlcanghnak thawngin khuapi kip ah a um bal rih lomi inn le lo, zung le mei ti bantuk tampu a kan tuahpiak manh cang.

Chin ramkulh chung khuapi; Tonzang, Tedim, Falam, Hakha, Thantlang, Matupi, Mindat, Kanpalet le Paletwa khuapi kip ah thanchonak pakhat tal tuah loin a um lo. Tahchunhnak ah Mindat ah Mindat College an sak cuahmah cang mi hmuh khawh a si. Cun, Khuapi cheukhat ah GTI sianginn zong pek an si rih hlei ah Hakha khualipi leibang cu Biabeihnak zung nganpi an sak hlei ah Hakha University tiang hmuh a si cang fawn. Falam khuapi ah Vanlawng ground an kan tuahpiak cang. Hakha khualipi ah Nursing sianginn zong sak a si cang fawn, a dang chimhcolh lo thanchonak an tuahmi hi a tam tuk hringhran ko.

Tutan ah a hleice in lawmh a umtukmi pakhat Vice President Henry Van THio nih an kan tuahpiak mi pawl cu, Hakha le Thantlang khuapi ah dinti cawk hram an thok hna i, an dih hnu ah Hnaring khuapi zong dinti cawhpiak le bawmh an si than. Cun, Hakha pengchung um Bungzung khua zongah Vice President Henry Van Thio tawlrelnak in dinti cu cawh piak cuahmah an si tikah Bungzung khuanu khuapa an i lawmhtuk hringhran tiah thawngpang theih a si. Kan biakmi Pa Pathian tu nih bawmhchantu KBZ le Vice President Henry Van Thio zong thluachuah pe chin ko hna seih.