Very Good News: KIA Hriamtlai Phu Nih Bohmu Hein Htet An Thah Than

KIA hriamtlai phu nih Palik sakhaan pakhat an luhhnawh than i, Bohmu reng sang pakhat a nunnka a liam, tiah thawng theih a si. May 3, 2021 ni zan suimilam 8:00pm hrawngah Kachin ramkulh, Bhamo District, Mansi peng chung palik sakhaan pakhat cu KIA hriamtlai phu nih an luhhnawh hi a si. KIA hriamtlai phu cu cunglei vanlawng in an phomh peng hna nain tanglei bak in sakhaan pawl lak khawh le luhhnawh an i zuam ve.

Hi kong he pehtlai in khuami pakhat nih a chim ning ahcun Bohmu Hein Htet hi Bomb nih a umnak innchung ah a khen caah a thi mi a si, tiah a chim. Cun, KIA hriamtlai phu nih Bohmu Hein Htet pumpak hrim hi hmuitinh in an kah mi a si, tiah a chim chap. Cu hlei ah Mansi sakhaan uktu Sakhaan hmu Min Min zong fak ngai in a hliam ve, tiah thawng theih a si. KIA hriamtlai phu uar an um khun nak cu ral an doh lai ah thlacamnak an ngeih pengmi hrimhrim hi upat awk an tlak bak.

March 25, 2021 ni ah KIA hriamtlai phu nih ALAW BUM ralhrang sakhaan cu an rak lak hnu ah nifatin tein ke ralkap he, cunglei vanlawng he an phomh peng hna. Kachin ramkulh, Moemout pengkomh chungah Fighter Jet in KIA hriamtlai phu an phomh peng hna caah khuami 2 an thi, tiah thawng theih a si.

Nihin May 3, 2021 ni zingka suimilam 8:00am hrawng ah Moemout pengkomh, Myothit le Kalow karlak ah ralhrang helicopter cu KIA ralkap nih an kah thlak nak kong cu KIA hriamtlai phu biachimhnak nawlngeitu Bohmukyi Naw Bo nih Myanmar Now sin ah a chim. An i kap cuahmah lio ah kah thlak mi a si. Fighter aircraft zong a ra ko nain kan kah thlak kho mi cu Helicopter tu a si. Helicopter in pehzulh tein an kan kah peng. Ke ralkap he cu kahdohnak a um lo. Fighter Aircraft le hriam ngan in an kah peng, tiah Bohmukyi Naw Bo nih a chim.

Helicopter an kah hnu ah Myothit, Kalow le Sehan khuate pawngkam hrawng cu Ralhrang lei nih Fighter Aircraft le Hriam ngan pawl nih an kah peng ko, tiah a chim. Ralhrang buu nih fak pi in kahdohnak an tuahnak ah Sayadaw pakhat kum 60 a nunnak a liam hlei ah minung 10 leng hliamhma an tuar tiah Kachin Waves Media nih a tarlangh. April 29, 2021 ni ah Moemout pengkomh chungah KIA hriamtlai phu le ralhrang bu Tatmah 77 fak pi in kahdohnak ah ralhrang ralkap 20 an thi i, hriamnam pawl zong lak piak an si, tiah KIA lei nih an chim.

March 25, 2021 ni ah KIA nih an lak mi ALAW BUM sakhaan hi lak than ding ah ke ralkap he cunglei vanlawng he an phomh hna hi a si. Ralhrang ralkap pawl cu Kachin ramkulh lawng si loin Karen ramkulh chung zongah vanlawng in an kahdoh peng hna. April 27, 2021 ni ah Thailand le Myanmar ramri Tawlethar ralhrang sakhaan cu Karen National Liberation Army – Tatmaha 5 nih an rak kahdoh hna i, an lak khawh. Cu hnu ah cunglei vanlawng in an phomh ve hna hi a si. Darkun hmunram chung minung 200 hrawng umnak khuate pawl cu Ralhrang pawl nih vanlawng in bomb an thlak hnawh hna caah Karen mipi pawl cu dornak kawl in an zam cio, tiah theih a si.

Tuzing ah KIA hriamtlai phu nih an kah thlak mi Helicopter hi Russian serchuah a si i MI-35 Fighter a si. KIA hriamtlai phu lei nih MANPADS FN – 6 kan kah mi a si, tiah a chim. KIA hriamtlai phu nih an kah thlak mi Helicopter hi MI-35 asiloah MI-24P zei set dah a si, timi hi a fiang rih lo. MI-24V zong MI-35 in auh khawh a si. MI-35 chung ah hin Pilot pahnih telh in thil dangdang le minung 8 nih zulh khawhmi a si. Nain an kah thlak lio ah hin minung pa zeizat an um lai timi hi a fiang rih lo. Ralhrang lei zong nih thawng fiangternak an tuahmi a um rih lo.

2015 – 2021 tiang ah ralram ah hin MI – 35 kah thlak mi atu voikhat nak a si lai. 2018 – 2020 tiang ah Rakhine ramkulh Arakan Army (AA) le Ralhrang pawl an i kahdohnak ah tu bantuk in Helicopter kah thlak piak a rak um bal lo. MI – 24P hi a chungleng a lo nain raltuk nak thazang an i loh lo. MI -24P raltuk hriam seh hi 12.7MM pungsan a si i, pahnih a um. MI-35 hi cu OPS-24N vanleiram kahdohnak le hmangbiluh zoh khawhmi pungsan a tel. MI -35 Hinde a man hi U.S dollars 35 million tiang a si. Source: Myanmar Now