Vawleicung Mirum Bik Elon Musk Nih Khua A Ruah Hnu Cu A Dih Cang Ko Hih

Vawleicung mirum bik, Tech billionaire Elon Musk nih Twitter cu ka chuah taak chung lai tiah tuchun ah ruah loin a chim caah minung tampi khuaruahhar in a tuah hna. Kan hnulei ah Twiitter i catlang pakhat te a tialmi ruangah Gamestop company stock 680% tiang a kai caah a dang company pawl nawisen an hnuk ti a si. Twitter a zuamcawh khotu social media pakhat zong a dirh men lai tiah thawngpang a chuak.

Twiitter le Facebook nih President Donald Trump an phih hnu ah an market value $51 billion tiang an sung. Telsla le Space ngeitu Elon Musk nih Twitter a chuah taak tik ah a hnuzul Follower 44.5 million a ngeimi a si caah Twitter market le stock value man cu faak ngai in a hnursuan rih lai tiah ruah a si. Elon Musk cu President Trump supporter pakhat ah ruahmi a si. A nih hi Amazon Boss a simi le vawleicung mirum bik pahnihnak Jeff Bezos he an business in a zuamcuah mi le a rem lomi a si an ti.

Relchap President Donald Trump cu February 8 ni thawk in biaceihnak hram an thawk cang lai. President Donald Trump nih a hlanmi sihni lawyer 5 cu nizan zanlei in an i let than. Zeirungah an i let timi fiang in an chimmi um rih lo. Asinain President Trump he an ruahnak a kalh caah a si lai tiah zumh a si. President Trump tazacuainak cu zarh khat lawng a duh cang caah aho nih a sihnih an tuan lai timi a fiang rih lo.

Senator cheukhat nih an chimnak ahcun President a si ti lomi impeachment tuah le tazacuai cu US phunghrampi ah a um lomi a si caah sihni caah phaisa tampi pek a phu lo, democrats pawl nih a tei zong an tei lo dingmi a si caah sihni hlan hrimhrim a phu lo tiah a chimmi zong an um. Sihni hlan nak caah hin $300,000 tal cu a tlawn lei in a dih lai tiah ruah a si.

Senator 100 chungah Democrats le Republican senator minung 50 veve an um, Senator 67 nih a sual tiah vote thlak lawngah President hlun Trump cu sual phawt khawh a si lai. Republican minung 17 nih democrats lei i an ttannak ding lam a um lo. News cheukhat nih cun President Trump nih a sihni pawl cu keimah tein tazacuainak ah ka kal ko lai tiah a ti hna caah atu bantuk in a sihni pawl an i letnak a si tiah an chim. Credit: Salai Lairamthang