Vawlei pi an thin a phawh hna.

Russia Ralkap nih Ukraine khuapi cu an dum cang!
==========
2014 lio ah Ukraine Mizapi nih President sinak in an rak tthumhmi, Victor Yanukovych cu Russia President Putin nih Ukraine uktu ah ser tthan a timh tiah news a chuak.

Ukraine President hlun, Victor hi Pro-Russia a si i, 2013 lio ah EU he “free trade agreement” minthut ding aa let i Russia sinah bamwhnak: loan tu a lak diam. Cucaah, Ukraine Mizapi nih sandah an piah hnawh i, Phaisa tawm he Russia ah a rak zaam. UKraine ah President a rak tling zong hi vote fir chawm in a rak tlingmi a si tiah civil society nihcun an chim.

Russia Ralkap nih Ukraine khuapi cu an dum cang. Expert tampi nihcun, Ukraine khuapi, supply vialte block dih in, anmah tein surrender/ submission ding hi an ibawmhmi si dawh a si tiah an chim.

PUTIN nih Kyvi Khuapi a lak bak in Ukraine Cozah, President Zalensky cu hnawn in, Ukraine Mipi nih an duh tilo I, an tthawl cia, Ukraine President hlun, Victor cu uktu ah chiah ding, “declare/ thanh” dingin timhlamhnak a ngei tiah an chim.

Russia ram cu UN ah Veto a ngeimi ram pakhat a si. Phundang in chim ahcun, Vawlei cung daihnak caah tuanvo ngeitu ram pakhat a si ve. Asinain UN ram chungtel a simi, ramri thate in a ngeimi Ukraine ram cu amak Russia hlawknak caah a tuk tikah Vawleipi an thin a hung.

Russia ram hruaitu Putin bantuk hi Vawlei cung daihtertu siloin, an buaiter chintu an si tiah Vawlei pi an thin a phawh hna. Vawlei caah ttihnung a sinak a zia a lang chin lengmang caah, North Korea bantuk in isolate an tuahnak hi a si.

Ukraine Mipi umnak ah bomb a tlak. Ukraine rammi millions deng in ral an zam cang. Nuhrin covo fak tuk in a buar. Cucaah, Ukraine President Zalensky nih Putin thil tuah hi War Crime a si tiah vawleipi theih in a au. UN Human Right council hna ah chungtel si dingin aa tlak lo tiah tampi nih an ti.

RUSSIA ram chung ah Russia Mipi cu an khuaruah a har an ti. A cheu nihcun Ukraine a tuknak kong hi felfai in an hngal lo ti a si. A cheu cu Russia Phaisa man a ttum an ttih caah, US dollar cawk ah banks Kip ah line up an tuah ti a si. Putin nih a rammi cu US dollar tamtuk cawk lo dingin a kham hna tiah an chim. India le Pakistan zong an thin a phang. INDIA ram Nuke hi Russia in an lakmi a si tikah, West bantuk in Russia kaltak an duh lo. West lei mithmai an zoh ve fawn. Karlak ah vaivuan in an um ve.

RUSSIA ram ah West company nganpipi cu an chuak thluahmah. BMW zong an chuak. Ukraine le Russia buainak hi, RUSSIA caah thawng chia a si I, West ram ca zong ah ah a tha hlei lo, asinain China ram ca belte ahcun, “Good War” a si tiah tampi nih an chim.

Tutan Ukraine- Russia War cu hlan lio, 1967 lio, Muslim ram, ram 5 nih Israel an rak tuk lio ka lawhter ngai. Egypt, Syria, Jordon, Iraq, Saudi Arabia nih Chin ram tia hrawng a simi, ram fate cu an rak dum nain an rak tei lo. Arab ram nih an rak iruah ning ahcun, zing rawl ei hlan ah tei colh phun dingin an rak iruah, asinain an tei kho lo. Ni 6 tiang an tuk i, an tei lo caah, an kir.

Russia nihhin Ukraine cu 24 hours chung ah lak viar dingin aa ruah. Asinain tuhi ni 5 hlei a rauh cang nain an khuapi a la kho rih lo. Russia tanks pawl lampi ah datsi a dih i, a kal kho ti lomi video a lang. 2014 lio i Crimea a lak bantuk in, fawi tuk in tei ding hi rak iruah dawh a si. Asinain Ukraine Mipi thazaang cu fawite in a pah kho ti lo.

Tutan Ukraine Mipi thazaang hi an hruaitu, Ukraine President Zalensky nih inspiration a pek tuk hna caah a si tiah an chim cio. A ral a tha. A nupi nih 100 ah in a dirpi. Meithal itlaih in front line ah a nunnak a pek. Kyvi khuapi kah dingin a rak zuangmi Russia jet fighter cu Ukraine jet-fighter Pilot pakhat nih a dawi hna i, 6 a tlak hna an ti. A cheu nihcun 10 a thlak an ti. A cheu nihcun Pathian kut aa tel an ti. Cucaah, “Ghost of Kyvi” tiah social media ah an vahpi cio.

Ukraine Russia War nih Putin cu Vawlei cung ah huat bikmi, a sual bikmi dirhmun a phakter i, Ukraine President Zalensky cu Vawlei pumpi nih uarmi dirhmun ah a cawisang chin chin. Ukraine President Zalensky hi Jewish miphun a si pinah, West he pehtlaih a duhmi a si. Ukraine Mipi nih an uar/ duhning a sang tuk. Cucaah, Putin nih a huat. Drug edict tiah a ti i, a cheu nihcun, Ukraine President thlak hrim hrim hi a duh caah a si tiah a zummi an um.

Russia ram Mipi cu an thin a phang chin lengmang. USD $1 Russia Phaisa 70 a si tawnmi kha, 100 lei a kai colh an ti. A bik in Google Adsense le Facebook Adsense an phih ahcun, Russia Mipi tamtuk harnak kan tong lai tiah an thinphannak an langhter. Putin nih ngol a timh lo. Ukraine ah Ralkap tam chin chin in a kuat hna. Ukraine cu a lak khawh zong ah a sung diam cang ti khawh a si. Ukraine a tei kha a caah sullam ngei dawh a si ti lo.

Tulio Vawlei cung ah mirum bik Elon Musk nih Ukraine cu free Internet a pek hna pinah, Ralzam hna caah free – super charging station cu Poland ah sak piak dingin a chim. Poland nih Ukraine refugees cu warmly welcome an rak tuah hna. Ukraine- Russia ral nih Europe le US alliance lungrualnak a chuahter chinchin. A thar in western power reboots a tuah tluk a si. Credit: Zasang Cinzah